ଦିଗପହଣ୍ଡି, ୧୦।୬(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ସହରର ଆଗାମୀ ୫୦ ବର୍ଷର ଆବଶ୍ୟକତାକୁ ଦୃଷ୍ଟିରେ ରଖି ଏକ ସୁଚିନ୍ତିତ ମାଷ୍ଟର ପ୍ଲାନ୍ ଓ ସୁଦୃଢ଼ ଡ୍ରେନେଜ୍ ବ୍ୟବସ୍ଥା ପ୍ରସ୍ତୁତ କରିବା ପାଇଁ ବ୍ରହ୍ମପୁର ଏମ.ପି ଡ଼. ପ୍ରଦୀପ କୁମାର ପାଣିଗ୍ରାହୀ ଗୁରୁତ୍ୱାରୋପ କରିଛନ୍ତି। ବୁଧବାର ଅପରାହ୍ନରେ ସ୍ଥାନୀୟ ତହସିଲ କାର୍ଯ୍ୟାଳୟ ସମ୍ମିଳନୀ କକ୍ଷରେ ଏକ ଗୁରୁତ୍ୱପୂର୍ଣ୍ଣ ଆଲୋଚନା ସଭା ଅନୁଷ୍ଠିତ ହୋଇଯାଇଛି।
ଏହି ସଭାରେ ଏମ.ପି ଉପସ୍ଥିତ ରହି ସହରର ବିଭିନ୍ନ ଅଞ୍ଚଳରୁ ନିଷ୍କାସିତ ନାଳ ନର୍ଦ୍ଦମା ପାଣି ଓ ବର୍ଷାଜଳର ସଠିକ୍ ପରିଚାଳନା ପାଇଁ ଏକ ବିସ୍ତୃତ ବ୍ଲ୍ୟୁ-ପ୍ରିଣ୍ଟ ଓ ଆକ୍ସନ ପ୍ଲାନ୍ ପ୍ରସ୍ତୁତ କରିବାକୁ ସେଠାରେ ଉପସ୍ଥିତ ଥିବା ପୂର୍ତ୍ତ ବିଭାଗ, ଡ୍ରେନେଜ୍ ଏବଂ ଜାତୀୟ ରାଜପଥ ପ୍ରାଧିକରଣ (NHAI) କର୍ତ୍ତୃପକ୍ଷଙ୍କୁ ପରାମର୍ଶ ଦେଇଛନ୍ତି। ଏହି ସମଗ୍ର ପ୍ରକ୍ରିୟାର ସୂଚାରୁ ପରିଚାଳନା ପାଇଁ ତହସିଲଦାରଙ୍କ ଅଧ୍ୟକ୍ଷତାରେ ଏକ ସମନ୍ୱୟ କମିଟି ଗଠନ କରିବାକୁ ସେ ନିର୍ଦ୍ଦେଶ ଦେଇଛନ୍ତି।
ସହର ଉପକଣ୍ଠ ଚାଙ୍ଗୁଡ଼ି ପାହାଡ଼ରୁ ଆସୁଥିବା ବର୍ଷା ଜଳ ସିଧାସଳଖ ସହରର ବିଭିନ୍ନ ଖାଲୁଆ ଅଞ୍ଚଳକୁ ପ୍ରବେଶ କରୁଛି। ଉପଯୁକ୍ତ ଡ୍ରେନେଜ ବ୍ୟବସ୍ଥା ନ ଥିବାରୁ ସହରର ବସଷ୍ଟାଣ୍ଡ ସମେତ ୩ ନଂ ୱାର୍ଡ ନୂଆସାହି, ଉମାଶଙ୍କର କଲୋନୀ , ଅମ୍ବିକା ନଗର, ପିଏଚଡି ରୋଡ଼, ବିଲ ହୁଡା ନଗର ଅଞ୍ଚଳରେ କୃତ୍ରିମ ବନ୍ୟା ପରିସ୍ଥିତି ସୃଷ୍ଟି ହେଉଛି।ବର୍ଷା ଋତୁରେ ଲୋକେ ଜଳବନ୍ଦୀ ଅବସ୍ଥାରେ ରହୁଛନ୍ତି।
ସଭାରେ ଆଇନଜୀବି ପ୍ରମୋଦ ପାଣିଗ୍ରାହୀ ଅଭିଯୋଗ କରିଛନ୍ତି ଯେ, ୧୭ ନଂ ରାଜ୍ୟ ରାଜପଥର ଉଭୟ କଡ଼ରେ ପୁଞ୍ଜି କଂୟା ଛକରୁ ଅନଙ୍ଗପୁର ବଡ଼ ନାଳ ଯାଏଁ କରାଯାଇଥିବା ତ୍ରୁଟିପୂର୍ଣ୍ଣ ଡିପ ଡ୍ରେନ ଯୋଗୁଁ ପାଣି ନିଷ୍କାସନ ହୋଇପାରୁ ନାହିଁ। ପାହାଡ଼ରୁ ଖସୁଥିବା ବର୍ଷା ପାଣିକୁ ଯଦି ସାପୁଆ ନାଳ ସହ ସଂଯୋଗ କରାଯାଏ, ତେବେ ଏହି ସମସ୍ୟାର ସ୍ଥାୟୀ ସମାଧାନ ହୋଇପାରିବ।
ଅପରପକ୍ଷରେ, ଏନଏସି ଉପାଧ୍ୟକ୍ଷାଙ୍କ ପ୍ରତିନିଧି କେ. କୁନା କହିଛନ୍ତି ଯେ, ପୁଞ୍ଜିକଂୟା ଛକରୁ ବସଷ୍ଟାଣ୍ଡ ଯାଏଁ ପୂର୍ତ୍ତ ବିଭାଗ ପକ୍ଷରୁ ନିର୍ମାଣ କରାଯାଇଥିବା ଡ୍ରେନ ଅଧାପନ୍ତରିଆ ହୋଇ ପଡ଼ିରହିଛି। ଏହାକୁ ସମ୍ପୂର୍ଣ୍ଣ କରାଯାଇ ଅନଙ୍ଗପୁର ନିକଟ ବଡ଼ ନାଳ ସହ ସଂଯୋଗ କରିବା ଆବଶ୍ୟକ। ଶେଷରେ ସମସ୍ୟାର ସମାଧାନ ପାଇଁ ଏକ ୭ ଜଣିଆ ବିଶେଷ କମିଟି ଗଠନ କରାଯାଇଛି।
ଏହି ସମୀକ୍ଷା ସଭାରେ ତହସିଲଦାର ସନ୍ତୋଷ କୁମାର ସାହୁ,ଏନଏସି ଅଧ୍ୟକ୍ଷ ପ୍ରଫୁଲ୍ଲ ପଣ୍ଡା,ଉପାଧ୍ୟକ୍ଷା ପ୍ରତିନିଧି କେ.କୁନା,ପୂର୍ତ୍ତ ବିଭାଗ ସହକାରୀ ନିର୍ବାହୀ ଯନ୍ତ୍ରୀ ଇଂ.ସୋମନାଥ ତ୍ରିପାଠୀ,ଉପ ନିର୍ବାହୀ ଯନ୍ତ୍ରୀ ଇଂ. ତାପସ କୁମାର ଦାସ,ସହକାରୀ ଯନ୍ତ୍ରୀ ଇଂ. ମନୋଜ ମହାରଣା,ଦିଗପହଣ୍ଡି ଡ୍ରେନେଜ ଉପଖଣ୍ଡ କାର୍ଯ୍ୟାଳୟ ସହକାରୀ ଯନ୍ତ୍ରୀ ଇଂ. ଭଗବାନ ରଥ,ଜାତୀୟ ରାଜପଥ ବିଭାଗ ର ସହକାରୀ ଯନ୍ତ୍ରୀ ଇଂ.ସମ୍ବିତ ମହାରଣା,କନିଷ୍ଠ ଯନ୍ତ୍ରୀ ଇଂ. ଶିବୁ କୁମାର ସାହୁ ପ୍ରମୁଖ ଉପସ୍ଥିତ ଥିଲେ। ଏହାଛଡ଼ା ଭାଜପା ଜିଲା କାର୍ଯ୍ୟକର୍ତ୍ତା ପରେଶ ଚନ୍ଦ୍ର ରଥ, ପ୍ରାଧ୍ୟାପକ ଆଦିତ୍ୟ ପଟ୍ଟନାୟକ, ପୂର୍ବତନ କାଉନସିଲର ଏମ. ତ୍ରିନାଥଙ୍କ ସମେତ ସହରର ବହୁ ଗଣ୍ୟମାନ୍ୟ ବ୍ୟକ୍ତି ଉପସ୍ଥିତ ଥିଲେ।
ସୂଚନାଯୋଗ୍ୟ, ମଙ୍ଗଳବାର ସନ୍ଧ୍ୟାରେ ବ୍ରହ୍ମପୁର ଏମ.ପି ଦିଗପହଣ୍ଡି ଦେଇ ଗଜପତି ଜିଲାର ମୋହନା ଯାଉଥିବା ସମୟରେ ବସଷ୍ଟାଣ୍ଡ ରାସ୍ତାରେ ପ୍ରାୟ ୩ ଫୁଟ ଉଚ୍ଚର ପାଣି ଜମି ରହିଥିବା ଦେଖିବାକୁ ପାଇଥିଲେ। ସେ ତତକ୍ଷଣାତ୍ ଗାଡ଼ିରୁ ଓହ୍ଲାଇ ପ୍ରଭାବିତ ସ୍ଥାନୀୟ ଲୋକଙ୍କ ସହ ଆଲୋଚନା କରିଥିଲେ ଏବଂ ଏହି ଦୀର୍ଘଦିନର ସମସ୍ୟା ବିଷୟରେ ଜାଣି ଆଶ୍ଚର୍ଯ୍ୟ ପ୍ରକଟ କରିଥିଲେ।
ସେ ସେହି ସ୍ଥାନରୁ ହିଁ ଫୋନ ଯୋଗେ ତହସିଲଦାର, ପୂର୍ତ୍ତବିଭାଗ ଯନ୍ତ୍ରୀ ଓ ଏନଏସି ନିର୍ବାହୀ ଅଧିକାରୀଙ୍କୁ ଘଟଣାସ୍ଥଳକୁ ଡକାଇଥିଲେ। ଏମ.ପିଙ୍କ ପ୍ରତ୍ୟକ୍ଷ ଉପସ୍ଥିତିରେ ପ୍ରଶାସନ ପକ୍ଷରୁ ମୋଟର ଲଗାଇ ବସଷ୍ଟାଣ୍ଡ ରାସ୍ତାରୁ ଜମି ରହିଥିବା ପାଣି ନିଷ୍କାସନ କରାଯାଇଥିଲା। ଏମ.ପିଙ୍କ ଏଭଳି ତତ୍କାଳୀନ ପଦକ୍ଷେପକୁ ଦିଗପହଣ୍ଡି ସହରବାସୀ ସାଧୁବାଦ ଜଣାଇଛନ୍ତି।
