ଖଜୁରୀପଡ଼ା,୧୨।୧୧(ବିଦୁର ବେହେରା): ଖଜୁରୀପଡ଼ା ବ୍ଲକ ଅନ୍ତର୍ଗତ ଖଜୁରୀପଡ଼ା ପଞ୍ଚାୟତର ଚାରିପଡା ଗ୍ରାମରେ ରହୁଥିବା ଭୂମିହୀନ ବିଧବା ମହିଳା ଗୋଲାପ ରଣାକୁ ଆର୍ଥିକ ବର୍ଷ ୨୦୨୫-୨୬ରେ ଅନ୍ତୋଦ୍ୟାୟ ଗୃହ ଯୋଜନାରେ ସାମିଲ କରି ଘର ନିର୍ମାଣ କରିବା ପାଇଁ ସମିତି ପକ୍ଷରୁ କାର୍ଯ୍ୟାଦେଶ ପ୍ରଦାନ କରାଯାଇଛି । ହେଲେ ସେ ଜଣେ ଅସହାୟ ବିଧବା ଗରିବ ମହିଳା ହୋଇଥିବାରୁ ଜାଗା ସମସ୍ୟା ଦେଇ ଗତି କରୁଛନ୍ତି।
ଗୋଲାପ ରଣାଙ୍କ ଅଭିଯୋଗ ଅନୁଯାୟୀ ଆଜିକୁ କିଛି ବର୍ଷ ହେବ ସ୍ବାମୀ ଆରପାରିକୁ ଚାଲିଗଲା ପରେ ଦୁଇ ଝିଅକୁ ଧରି ଦୁଃଖ କଷ୍ଟରେ ପରିବାର ଚଳୁଥିଲା । ତାଙ୍କର କୌଣସି ଜାଗା ଘରଡିହ ନ ଥିବାରୁ ଭୂମିହୀନରେ ସରକାରୀ ଜାଗା ପାଇଁ ଆବେଦନ କରିଥିଲେ । ସରକାରଙ୍କ ପକ୍ଷରୁ ତାଙ୍କୁ ୫ ଜାନୁଆରୀ ୨୦୨୩ ମସିହାରେ ଖଜୁରୀପଡ଼ା ସୁରଦେଇ ମୌଜାର ଖାତା ନଂ ୭୧୪/୯୦ର ପ୍ଲଟ ନଂ ୧୩୬୨/୨୭୦୩ ଉପରେ ୧୬ ଆର୍ ଘରବାରି ଜାଗାର ପଟ୍ଟା ତହସିଲଦାର ପ୍ରଦାନ କରିଥିଲେ। ସେହି ଜାଗାରେ ସରକାର ଦେଇଥିବା ଅନ୍ତୋଦ୍ୟାୟ ଗୃହ ଯୋଜନାର ଘର ନିର୍ମାଣ କରିବା ପାଇଁ ଯିବାରୁ ସେହି ଗାଁର ଜଣେ ବ୍ୟକ୍ତି ଏଇଟା ମୋର ଜାଗା ବୋଲି କହି ଗଣ୍ଡଗୋଳ କରିବା ସହିତ ଏହି ଜାଗାକୁ ପ୍ରବେଶ କରିବୁ ନାହିଁ ବୋଲି ମନା କରିଛନ୍ତି। ଫଳରେ ଏହି ସମସ୍ୟାକୁ ନେଇ ତହସିଲଦାର,ଉପ ଜିଲାପାଳ ,ଜିଲାପାଳ ,ଏବଂ ମୁଖ୍ୟମନ୍ତ୍ରୀଙ୍କ ଅଭିଯୋଗ ପ୍ରକୋଷ୍ଠରେ ଅଭିଯୋଗ କରିଛନ୍ତି। ଖଜୁରୀପଡ଼ା ଥାନାରେ ମଧ୍ୟ ଏ ନେଇ ଏତଲା ଦେଇଛନ୍ତି । ଥାନାରେ ୨୫୦/୨୫ ମାମଲା ରୁଜୁ ହୋଇଛି । ତଥାପି ଆଜି ପର୍ଯ୍ୟନ୍ତ ନ୍ୟାୟ ପାଇବାରୁ ବଞ୍ଚିତ ଅଛନ୍ତି ବୋଲି କହିଛନ୍ତି।
ଜାଗା ସମସ୍ୟା ନେଇ ସମସ୍ତ ସରକାରୀ ଅଧିକାରୀଙ୍କୁ ଜଣାଇବା ପରେ ଏବେ ହତାଶ ହୋଇଛନ୍ତି । କିପରି ଭାବେ ଅନ୍ତୋଦ୍ୟାୟ ଗୃହ ଯୋଜନାର ଘର ନିର୍ମାଣ କରିବେ ସେ ନେଇ ଚିନ୍ତାରେ ରହୁଛନ୍ତି ଗୋଲାପ ରଣା । ଏ ନେଇ ତହସିଲଦାର ଶୁଭଶ୍ରୀ ରଥଙ୍କୁ ପଚାରିବାରୁ ସେ କହିଛନ୍ତି ଯେ ତାଙ୍କୁ ପଟ୍ଟା ପ୍ରଦାନ କରାଯାଇଛି। ସେ ଉପ ଜିଲାପାଳଙ୍କ କାର୍ଯ୍ୟାଳୟ କିମ୍ବା ଥାନାରେ ଅଭିଯୋଗ କଲେ ଉଭୟ ପକ୍ଷକୁ ଡାକି ସମସ୍ୟାର ସମାଧାନ କରାଯାଇ ପାରିବ ବୋଲି କହିଛନ୍ତି।
ଘର ନିର୍ମାଣ ସମସ୍ୟାକୁ ନେଇ ବିଡ଼ିଓ ଶୁଭ ଦତ୍ତାତ୍ରେୟ ବାହିନୀପତିଙ୍କ ପ୍ରତିକ୍ରିୟା ନେବାରୁ ସେ କହିଛନ୍ତି ଯେ ଜିଲାପାଳଙ୍କ ଅଭିଯୋଗ ଶୁଣାଣୀ ଶିବିରରେ ସେ ଏହି ସମସ୍ୟା ଉପରେ ଅଭିଯୋଗ କରିଥିଲେ। ଏହା ଜାଗା ସମସ୍ୟା , ଜାଗା ସମସ୍ୟା ସମାଧାନ କରି ଘର ନିର୍ମାଣ କରି ପାରିବେ ।
ତେଣୁ ଜିଲା ପ୍ରଶାସନ ଏଥିପ୍ରତି ଦୃଷ୍ଟି ଦେଇ ଜାଗା ସମସ୍ୟାର ସମାଧାନ କଲେ ଜଣେ ଅସହାୟ ଗରିବ ବିଧବା ମହିଳା ଘର ଖଣ୍ଡେ ନିର୍ମାଣ କରି ଦୁଇ ଝିଅଙ୍କୁ ସାଙ୍ଗରେ ଧରି ଖୁସିରେ ରହି ପାରିବ। ନଚେତ ଅନ୍ତୋଦ୍ୟାୟ ଗୃହ ଯୋଜନାର ଘର ନିର୍ମାଣ ନ କରି ପାରି ହଇରାଣ ହେବ । ତେଣୁ ସରକାର ଏଥିପ୍ରତି ବିଶେଷ ଦୃଷ୍ଟି ଦେବା ପାଇଁ ବ୍ଲକ କଂଗ୍ରେସ ଦାବି କରିଛି।
