ଅହମ୍ମଦାବାଦ,୧୨।୧୨: ଗୁଜରାଟ ବିଧାନସଭା ନିର୍ବାଚନରେ ଦେଡିଆପଡାରୁ ନିର୍ବାଚିତ ହୋଇଥିବା ଆମ୍ ଆଦମୀ ପାର୍ଟି(ଏଏପି)ବିଧାୟକ ଚୈତର ବାସଭା ଏବେ ବେଶ୍ ଚର୍ଚ୍ଚାରେ ଅଛନ୍ତି। ସେ ଏଏପିର ୫ ବିଜୟୀ ବିଧାୟକଙ୍କ ମଧ୍ୟରୁ ଜଣେ। ଗୁଜରାଟରେ ଭାଜପାର ରେକର୍ଡ ବିଜୟ ଭିତରେ ଚୈତର ଏଏପି ପକ୍ଷରୁ ଜିତିବା ବଡ କଥା। ସେ ପ୍ରାୟ ୪୦,୦୦୦ ଭୋଟରେ ନିର୍ବାଚନ ଜିତିବା ପରେ ଏବେ ବ୍ୟକ୍ତିଗତ ଜୀବନକୁ ନେଇ ଚର୍ଚ୍ଚାକୁ ଆସିଛନ୍ତି। ଚୈତରଙ୍କ ଦୁଇଟି ସ୍ତ୍ରୀ ଅଛନ୍ତି। ପୁରା ପରିବାର କେବଳ ଏକାଠି ରୁହନ୍ତି ନାହିଁ ବରଂ ଏକ ଟିମ୍ ଭାବରେ ମଧ୍ୟ କାର୍ଯ୍ୟ କରନ୍ତି। ସେ ନିଜ ବିଜୟର ଶ୍ରେୟ ମଧ୍ୟ ନିଜ ୨ ସ୍ତ୍ରୀ ବର୍ଷା ଏବଂ ଶକୁନ୍ତଳାଙ୍କୁ ଦିଅନ୍ତି।
ଚୈତର କହିଛନ୍ତି, ମୋ ୨ ସ୍ତ୍ରୀ ଏକ ଟିମ୍ ଭାବରେ କାମ କରିଥିଲେ ଏବଂ ମୋର ବିଜୟରେ ବହୁତ ସାହାଯ୍ୟ କରିଥିଲେ। ପ୍ରଚାର ସମୟରେ ସେମାନେ ନିରନ୍ତର ପରିଶ୍ରମ କରିବା ସହ ପରିଚାଳନା କରିଥିଲେ। ମୋର ସରକାରୀ ଚାକିରି ଥିଲା ଏବଂ ମୋ ସ୍ତ୍ରୀମାନେ ମଧ୍ୟ ସରକାରୀ ସଂଗଠନରେ କାର୍ଯ୍ୟ କରୁଥିଲେ। କିନ୍ତୁ ମୁଁ ଆଦିବାସୀଙ୍କ କଲ୍ୟାଣ ପାଇଁ କାମ କରିବାରୁ ଚାକିରି ଛାଡିବାକୁ ସ୍ଥିର କଲି। ପରେ ଶକୁନ୍ତଳା ଏବଂ ବର୍ଷା ଚାକିରି ଛାଡି ବର୍ଷ ବର୍ଷ ଧରି ମୋ ରାଜନୈତିକ ଅଭିଳାଷକୁ ସମର୍ଥନ କରିବା ଆରମ୍ଭ କଲେ। ଶକୁନ୍ତଳା ଏବଂ ବର୍ଷା ସର୍ବଦା ଭଲ ବନ୍ଧୁ ଅଟନ୍ତି।
ବାସଭା ଏକ ଦଶନ୍ଧି ପୂର୍ବରୁ ଆଦିବାସୀ ସମ୍ପ୍ରଦାୟ ପାଇଁ କାର୍ଯ୍ୟ ଆରମ୍ଭ କରିଥିଲେ ଏବଂ ୨୦୧୪ରେ ବିଟିପିରେ ଯୋଗ ଦେଇଥିଲେ। ଏହାପରେ ସେ ବିଟିପି ଛାଡି ଏଏପିରେ ଯୋଗ ଦେଇଥିଲେ। ବାସଭା ପ୍ରାୟ ୧୩ ବର୍ଷ ପୂର୍ବେ ଶକୁନ୍ତଳା ଏବଂ ଦୁଇ ବର୍ଷ ପରେ ବର୍ଷାଙ୍କୁ ବିବାହ କରିଥିଲେ। ୩୪ ବର୍ଷୀୟ ଚୈତରଙ୍କର ତିନୋଟି ସନ୍ତାନ ଅଛନ୍ତି। ଶକୁନ୍ତଳାଙ୍କର ଗୋଟିଏ ଏବଂ ବର୍ଷାଙ୍କର ଦୁଇଟି ସନ୍ତାନ ଅଛନ୍ତି।
