ଦୁନିଆ ରହସ୍ୟମୟ ଜିନିଷରେ ପରିପୂର୍ଣ୍ଣ। ସେଥିରୁ କିଛି ଚମକାଇବା ଭଳି ଥାଏ। ଯେମିତିକି କୋଲକାତାରେ ଥିବା ବେଗନ କୋଡାର ଷ୍ଟେଶନ। ସାଧାରଣତଃ ଷ୍ଟେଶନରେ ସବୁ ସମୟରେ ଭିଡ ପରିଲକ୍ଷିତ ହୋଇଥାଏ। ହେଲେ ସନ୍ଧ୍ୟା ପରେ ଉକ୍ତ ଷ୍ଟେଶନକୁ ଯିବାକୁ ଲୋକେ ଡରିଥାନ୍ତି। କାରଣ କିଛି ଏଭଳି।
୧୯୬୦ ମସିହାରେ ନିର୍ମିତ ହୋଇଥିଲା ବେଗନ କୋଡାର ଷ୍ଟେଶନ । କିନ୍ତୁ ପ୍ରାୟ ୪୦ ବର୍ଷ ପର୍ଯ୍ୟନ୍ତ ଏହା ସମ୍ପୂର୍ଣ୍ଣ ବନ୍ଦ ରହିଥିଲା। ଷ୍ଟେଶନ ପୁଣି ଖୋଲା ହେବା ପରେ ଲୋକମାନେ ସେଠାକୁ ଯିବାକୁ ଭୟ କରୁଛନ୍ତି। ଷ୍ଟେଶନରେ ’ଭୂତ’ଥିବା ନେଇ ସମଗ୍ର ଅଞ୍ଚଳରେ ଆଲୋଚନା ହୋଇଆସୁଛିା। ଏବେ ବି ସେଭଳି ଭୟ ରହିଛି।
ଷ୍ଟେଶନ ନିର୍ମାଣ ହେବାବେଳେ ସବୁକିଛି ଠିକ୍ ଥିଲା। କିନ୍ତୁ ପ୍ରାୟ ସାତ ବର୍ଷ ପରେ ଜଣେ କର୍ମଚାରୀ ଏହି ଷ୍ଟେଶନରେ ଭୂତ ଥିବା ନେଇ ଦାବି କରିଥିଲେ। ସେ ଅନ୍ୟ କର୍ମଚାରୀଙ୍କୁ ଏ ବିଷୟରେ ଜଣାଇଥିଲେ। ସେତେବେଳେ କେତେକ ଲୋକ ଏହି କଥାରେ ହଁ ଭରିଥିଲେ। ଷ୍ଟେଶନରେ ଜଣେ ମହିଳାଙ୍କୁ ହତ୍ୟା କରାଯାଇଥିଲା। ଏବେ ତାଙ୍କ ଭୂତ ଏଠାରେ ବୁଲୁଛି ବୋଲି ଚାରିଆଡେ ପ୍ରଚାର ହୋଇଥିଲା। ପ୍ରଥମେ ରେଳ ବିଭାଗର ବରିଷ୍ଠ ଅଧିକାରୀମାନେ ଏହି କଥାକୁ ଏଡ଼ାଇ ଦେଇଥିଲେ। ହେଲେ କିଛି ଦିନ ପରେ ଏକ ବଡ ଦୁର୍ଘଟଣା ଘଟିଥିଲା। ଏହା ପରେ ସମସ୍ତଙ୍କ ଚିନ୍ତାଧାରା ବଦଳିଯାଇଥିଲା।
ରେଳ କ୍ୱାର୍ଟରରେ ସେତେବେଳର ଷ୍ଟେଶନ ମାଷ୍ଟର ଏବଂ ତାଙ୍କ ପରିବାରଲୋକଙ୍କ ମୃତଦେହ ପଡିଥିବା ଦେଖିବାକୁ ମିଳିଥିଲା। ଏହି ଘଟଣାରେ ସମାନ ମହିଳା ଭୂତ ସମ୍ପୃକ୍ତ ଥିବା ଲୋକେ କହିଥିଲେ। ତଥାପି ଅନ୍ୟ ରେଳ ଅଧିକାରୀମାନେ ଏହି ତଥ୍ୟ ଗ୍ରହଣ କରିବାକୁ ପ୍ରସ୍ତୁତ ନ ଥିଲେ। ଘଟଣା ପରେ ଅନ୍ୟଜଣେ ଷ୍ଟେଶନ ମାଷ୍ଟର ଏଠାକୁ ଆସିଥିଲେ। ହେଲେ ସେ ଅଧିକ ସମୟ ରହିପାରି ନ ଥିଲେ।
ସନ୍ଧ୍ୟା ହେବା ମାତ୍ରେ ଭୂତମାନେ ଏହି ଷ୍ଟେସନରେ ଦେଖାଯାଉଥିବା, ଅନେକ ଥର ଟ୍ରେନ ସାମ୍ନାରେ ଭୂତ ଆସିଯିବା କଥା ପବନ ପରି ଚାରିଆଡେ ବ୍ୟାପିଥିଲା। ଧୀରେ ଧୀରେ ଲୋକଙ୍କ ମଧ୍ୟରେ ଏହାକୁ ନେଇ ଆତଙ୍କ ବୃଦ୍ଧି ପାଇଥିଲା। ଲୋକମାନେ ଷ୍ଟେଶନକୁ ଆସିବାକୁ ଭୟ କରିଥିଲେ। ଫଳସ୍ବରୂପ ଟ୍ରେନଗୁଡିକ ଏହି ଷ୍ଟେଶନରେ ଅଟକିିବା ବନ୍ଦ କରିଦେଲା।
ପ୍ରାୟ ୪୦ ବର୍ଷ ପର୍ଯ୍ୟନ୍ତ ଏପରି ଚାଲିଥିଲା। ୨୦୦୯ରେ ଷ୍ଟେଶନକୁ ପୁନଃ ଖୋଲାଯାଇଥିଲା। ସେବେଠାରୁ ଏବେ ଯାଏ ସନ୍ଧ୍ୟା ପରେ ଏହି ଷ୍ଟେଶନରେ କେହି ରହୁ ନାହାନ୍ତି। ଶ୍ରମିକମାନେ ମଧ୍ୟ ରାତି ହେବା ପୂର୍ବରୁ ଚାଲିଯାଆନ୍ତି। ଏବେବି ଲୋକଙ୍କ ମନରେ ଡର ରହିଛି ବୋଲି କୁହାଯାଉଛି।
