ବ୍ରହ୍ମପୁର ଅଫିସ,୧୨ା୧୨: ବ୍ରହ୍ମପୁର ମହାନଗର ୨୬ନଂ ୱାର୍ଡ ଅନ୍ତର୍ଗତ ଗୋଷାଣି ନୂଆଗାଁ ଅଞ୍ଚଳରେ ଅଛି ଶତାଧିକ ବର୍ଷର ପୁରାତନ ବିଶାଳ ଜଳାଶୟ ବେଢ଼ାବନ୍ଧ। ଏବେ ଊକ୍ତ ପୋଖରୀ ପାଣି ପ୍ରଦୂଷିତ ହେବା ସହ ଲଟାବୁଦା ମାଡ଼ିଛି। ଆଧୁନିକୀ ଓ ସୌନ୍ଦର୍ଯ୍ୟକରଣ ପାଇଁ ୧୫ ବର୍ଷ ତଳୁ ଯୋଜନା ପରେ ଯୋଜନା ପ୍ରସ୍ତୁତ କରାଯାଉଛି। ପରବର୍ତ୍ତି ପର୍ଯ୍ୟାୟରେ ତାହା ବାଟବଣା ହୋଇଯାଉଥିବା ନଜିର ରହିଛି। ବେଢ଼ାବନ୍ଧର କେବେ ବିକାଶ ହେବ ତାହା ମଧ୍ୟ ଅନିଶ୍ଚିତ ହୋଇଯାଇଛି।
୨୦୦୪ ଲୋକସଭା ନିର୍ବାଚନରେ ବ୍ରହ୍ମପୁର ଆସନରୁ କଂଗ୍ରେସ ପ୍ରାର୍ଥୀ ଚନ୍ଦ୍ରଶେଖର ସାହୁ ଏମ୍ପି ନିର୍ବାଚିତ ହୋଇଥିଲେ। ବର୍ଷକ ପରେ ଉପା ସରକାରଙ୍କ ପ୍ରଥମ ପାଳି ସରକାରରେ ସେ କେନ୍ଦ୍ରମନ୍ତ୍ରୀ ହୋଇଥିଲେ। ସାହୁ ଅତୀତରେ ବ୍ରହ୍ମପୁର ପୌର ପରିଷଦର ଦୁଇଥର ନଗରପାଳ ହୋଇଥିବାରୁ ସହରର ଭୌଗୋଳିକ ଚିତ୍ର ଭଲ ଭାବେ ଜାଣିଥିଲେ। ସହରରେ ଭୂତଳ ଜଳସ୍ତର ହ୍ରାସ ପାଇ ପୋଖରୀ ଓ କୂଅଗୁଡ଼ିକ ଶୁଖି ଯାଉଥିବାରୁ ସବୁ ବନ୍ଧ ପୁନରୁଦ୍ଧାର ଲାଗି ଉଦ୍ୟମ କରିଥିଲେ। କେନ୍ଦ୍ର ସହରାଞ୍ଚଳ ମନ୍ତ୍ରଣାଳୟର ୱାଟର ବଡ଼ି ଯୋଜନାରେ ବ୍ରହ୍ମପୁର ପୌର ପରିଷଦ ନିମେନ୍ତ ୧୫ କୋଟିରୁ ଊର୍ଦ୍ଧ୍ୱ ଟଙ୍କା ମଞ୍ଜୁର କରାଇଥିଲେ। ଯୋଜନାରେ ରାଜ୍ୟ ସରକାର ଓ ପୌର ସଂସ୍ଥା ସମୁଦାୟ ବ୍ୟୟର ୧୦% ଲେଖାଏଁ ଦେବାର ବ୍ୟବସ୍ଥା ଥିଲା। ସେତେବେଳେ ପୌର ସଂସ୍ଥା ଶାସନ ପ୍ରଥମ କରି ବିଜେଡି ଦଖଲକୁ ଯାଇଥିଲା। କେନ୍ଦ୍ର ଅନୁଦାନକୁ ଠିକ୍ ସମୟରେ ବିନିଯୋଗ କରାଯାଇ ନ ଥିଲା। ତାଗିଦ ପରେ ତରବରିଆ ଭାବେ କେତୋଟି ପୋଖରୀ ପୁନରୁଦ୍ଧାର କରାଗଲା।
ୱାଟର ବଡ଼ି ଯୋଜନାରେ ମଧ୍ୟ ସେତେବେଳେ ବେଢ଼ାବନ୍ଧକୁ ସ୍ଥାନିତ କରାଯାଇଥିଲା। ସେହି ବଡ଼ ଜଳାଶୟ ପୁନରୁଦ୍ଧାର, ସୌନ୍ଦର୍ଯ୍ୟ ଓ ଆଧୁନିକକରଣ ସହ ଲୋକଙ୍କ ମନୋରଞ୍ଜନ ଲାଗି ପାୱାର ବୋଟ ଓ ଅନ୍ୟ କାର୍ଯ୍ୟ କରାଯିବାର ପ୍ରଚାର କରାଗଲା। ଏହାର ୧୬ ବର୍ଷ ବିତିଛି ଏବଂ ବେଢ଼ାବନ୍ଧ ବିକାଶ ନ ହୋଇ ପୂର୍ବଭଳି ରହିଛି। ପୌର ସଂସ୍ଥାରୁ ମହାନଗର ନିଗମ ହୋଇଛି ଏବଂ ଚତୁର୍ଥଥର ପାଇଁ ପୌର ଶାସନ ବିଜେଡି ଦଖଲକୁ ଯାଇଛି। କରୁଛି। ଫଳାଫଳ ଘୋଷଣା ପରେ ନିଗମ ପାଶୋରି ଯାଇଛି। ୨୦୧୮ ସେପ୍ଟେମ୍ବର ୩୦ରେ ନିଗମକୁ ନିର୍ବାଚିତ ଜନ ପ୍ରତିନିଧିଙ୍କ ୫ ବର୍ଷିଆ କାର୍ଯ୍ୟକାଳ ସରିବା ପରଦିନ ଠାରୁ ସରକାରଙ୍କ ନିୟନ୍ତ୍ରଣକୁ ଯାଇଥିଲା। ନିଗମର ୨୦୨୧-୨୨ ବର୍ଷର ବଜେଟରେ କେବଳ ବେଢ଼ାବନ୍ଧ ବିକାଶ ପାଇଁ ୫୦ କୋଟି ଏବଂ ୨୨-୨୩ ବର୍ଷର ବଜେଟରେ ୪୮ କୋଟି ଟଙ୍କା ବ୍ୟୟବରାଦ କରାଯାଇଥିଲା। ଏହାର ଡିପିଆର ପ୍ରସ୍ତୁତ କରି ନଗର ଉନ୍ନୟନ ବିଭାଗକୁ ପଠାଯାଇଥିଲା। ଚଳିତ ମାସ ୨୨ ତାରିଖରେ ନଗର ଉନ୍ନୟନ ବିଭାଗର ସ୍ବତନ୍ତ୍ର ଶାସନ ସଚିବ ବ୍ରହ୍ମପୁର ଗସ୍ତରେ ଆସି ଅଫିସର ଓ ଇଞ୍ଜିନିୟରଙ୍କ ସହ ବେଢ଼ାବନ୍ଧ ପରିଦର୍ଶନ କଲେ। ପୂର୍ବ ଡିପିଆର ବଦଳାଇ ନୂଆ ଡିଜାଇନ ପ୍ରସ୍ତୁତ କରାଯିବାକୁ ନିର୍ଦ୍ଦେଶ ଦେଲେ। ଫଳରେ ପୂର୍ବ ବଜେଟ ମଧ୍ୟ ଅଚଳ ହେବା ସ୍ପଷ୍ଟ ହୋଇଛି। ଏହା ସମୟ ସାପେକ୍ଷ ହୋଇଥିବାରୁ ପୁଣି ବେଢ଼ାବନ୍ଧ ବିକାଶ ଯୋଜନା ସ୍ବପ୍ନରେ ରହିଯାଇଛି।
