ବେଗୁନିଆ,୨୮।୧(ଡି.ଏନ୍.ଏ.): ବେଗୁନିଆ ଥାନା ଅଧୀନ ପିଚୁକୁଳି-ସାନପଦର ଗ୍ରାମ ମଧ୍ୟରେ ଥିବା କେନାଲ ନିକଟରେ ମଙ୍ଗଳବାର ରାତିରେ କେତେଜଣ ଦୁର୍ବୃତ୍ତ ଦୁଇ ଗୋରୁ ବ୍ୟବସାୟୀଙ୍କୁ ମାଡ଼ମାରି ୬,୭୨,୦୦୦ଟଙ୍କା ଲୁଟି ନେଇଛନ୍ତି। ବ୍ୟବସାୟୀ ଲିୟାକତ ଖାନ ଓ ମୁସ୍ତାଫା ଖାନଙ୍କ ଅଭିଯୋଗକ୍ରମେ ପୋଲିସ ଏକ ମାମଲା(ନଂ.୧୩/୨୧) ରୁଜୁକରି ତଦନ୍ତ ଚଳାଇଛି। ସୂଚନା ମୁତାବକ, କଡ଼ବ ଅଞ୍ଚଳର ଏହି ଦୁଇ ବ୍ୟବସାୟୀ ଭଣଜା ଦାରୁଦ୍ ଅଲ୍ଲୀଙ୍କ ସହ କାର (ନଂ. ଓଡି୦୨ ବିଏଚ୍ ୮୧୩୬)ରେ ପଶ୍ଚିମବଙ୍ଗରୁ ଗ୍ରାମକୁ ଫେରୁୁଥିଲେ। ମଙ୍ଗଳବାର ରାତି ପ୍ରାୟ ୧ଟାରେ ପିଚୁକୁଳି-ସାନପଦର ଗ୍ରାମ ମଧ୍ୟରେ ଥିବା କେନାଲ ନିକଟରେ କେତେଜଣ ଦୁର୍ବୃତ୍ତ କାରକୁ ଅଟକାଇଥିଲେ। ହଠାତ୍ ଦୁର୍ବୃତ୍ତମାନେ କାର ଚାଳକ ଗଶେଶ ନାୟକଙ୍କୁ ଲୁହା ରଡ୍ରେ ବାଡ଼େଇବା ପରେ ବ୍ୟବସାୟୀଙ୍କୁ ମାଡ଼ ମାରି ବ୍ୟାଗରେ ଥିବା ସମସ୍ତ ଟଙ୍କା ଲୁଟି ନେଇ ଫେରାର ହୋଇଯାଇଥିଲେ। ଏନେଇ ରାତି ପ୍ରାୟ ୩ଟାରେ ବ୍ୟବସାୟୀ ଦ୍ୱୟ ଥାନାରେ ଅଭିଯୋଗ କରିଥିଲେ। ପ୍ରକାଶ ଯେ, ଏହି ଅଞ୍ଚଳରେ ବାରମ୍ବାର ବ୍ୟବସାୟୀଙ୍କଠାରୁ ଲୁଟ୍ ହେଉଥିବା ନଜିର ରହିଛି। ପୋଲିସ କେବଳ ମାମଲା ରୁଜୁକରି ଚୁପ୍ ବସିପଡୁଛି ବୋଲି ସାଧାରଣରେ ଆଲୋଚନା ହେଉଛି।
