ମୁମ୍ବାଇ,୧୦।୫: ଭାରତୀୟ ଦଳର ଷ୍ଟାର ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟାଙ୍କୁ କାହିଁକି ବିସିସିଆଇ ସେଣ୍ଟ୍ରାଲ କଣ୍ଟ୍ରାକ୍ଟ ପଦାନ କଲା, ଏହାର ଖୁଲାସା କରିଛନ୍ତି ଜୟ ଶାହା। ବୁଧବାର ମୁମ୍ବାଇରେ ଏକ କାର୍ଯ୍ୟକ୍ରମରେ ଯୋଗ ଦେଇ ସେ କହିଛନ୍ତି ଯେ, ‘ଘରୋଇ ଟୁର୍ଣ୍ଣାମେଣ୍ଟରେ ଖେଳିବା ପ୍ରତିଶ୍ରୁତି ଦେବା ପରେ ପାଣ୍ଡ୍ୟାଙ୍କୁ ବିସିସିଆଇ ଗ୍ରେଡ଼-ଏ କଣ୍ଟ୍ରାକ୍ଟ ପ୍ରଦାନ କରିଥିଲା’।
ଦିନିକିଆ ବିଶ୍ୱକପ ସମୟରେ ହାର୍ଦ୍ଦିକ ଆହତ ହେବା ପରେ ଭାରତୀୟ ଟିମ୍ ପାଇଁ ଖେଳି ନାହାନ୍ତି। ତେବେ ଆଇପିଏଲ ପୂର୍ବରୁ ସେ ସୁସ୍ଥ ହୋଇଥିଲେ ମଧ୍ୟ ଘରୋଇ କ୍ରିକେଟ ଟୁର୍ଣ୍ଣାମେଣ୍ଟରେ ଅଂଶଗ୍ରହଣ କରି ନଥିଲେ, ବରଂ ଆଇପିଏଲ ପାଇଁ ପ୍ରସ୍ତୁତି କରିଥିଲେ। ଏହି ସମୟରେ ବିସିସିଆଇ ଭାରତୀୟ ଟିମ୍ ସହିତ ନଥିବା ଖେଳାଳି ମାନଙ୍କୁ ଘରୋଇ କ୍ରିକେଟ ଖେଳିବାକୁ ପରାମର୍ଶ ଦେଇଥିଲା। ତେବେ ଏହା ନ କରିବାରୁ ବିସିସିଆଇ ଶ୍ରେୟସ ଆୟାର ଏବଂ ଈଶାନ କିଶନଙ୍କୁ ସେଣ୍ଟ୍ରାଲ କଣ୍ଟ୍ରାକ୍ଟ ପ୍ରଦାନ କରି ନ ଥିଲା।
ଏଥିସହ ଘରୋଇ କ୍ରିକେଟର ଢାଞ୍ଚା ଖୁବ ଶୀଘ୍ର ଉନ୍ମୋଚିତ ହେବ ବୋଲି ସେ ଉଲ୍ଲେଖ କରିଛନ୍ତି ଏବଂ ବେଙ୍ଗାଲୁରୁର ଜାତୀୟ କ୍ରିକେଟ୍ ଏକାଡେମୀ (ଏନସିଏ) ରେ ଉଚ୍ଚ-ପ୍ରଦର୍ଶନ କେନ୍ଦ୍ର ଅଗଷ୍ଟରୁ କାର୍ଯ୍ୟକ୍ଷମ ହେବ ବୋଲି ନିଶ୍ଚିତ କରିଛନ୍ତି।
