ବସ୍ତା,୨୩।୪(ଡି.ଏନ.ଏ.): ବାଲେଶ୍ୱର ଜିଲା ବସ୍ତା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଦିନକୁ ଦିନ ମଧ୍ୟସ୍ଥଙ୍କ ଦୌରାତ୍ମ୍ୟ ବଢ଼ିବାରେ ଲାଗିଛି। ଡାକ୍ତରଖାନାରେ ରୋଗୀଙ୍କୁ ଶୋଷଣ କରାଯାଉଥିବା ଅଭିଯୋଗ ହୋଇଛି। ଚିକିତ୍ସା ସମୟରେ ଡାକ୍ତରଖାନାରେ ସମସ୍ତ ଔଷଧ ଏବଂ ସୁବିଧା ଯୋଗାଇଦେବା ପାଇଁ ସରକାରୀ ନିୟମ ରହିଛି। ଡାକ୍ତର ସରକାରୀ ଔଷଧ ନ ଦେଇ ବାହାରୁ ଔଷଧ କିଣିବା ପାଇଁ କହୁଥିବା ରୋଗୀଙ୍କ ସମ୍ପର୍କୀୟ ଅଭିଯୋଗ ଆଣିଛନ୍ତି। ଏପରିକି ରୋଗୀଙ୍କ ମୃତ୍ୟୁ ପରେ ମଧ୍ୟ ଡାକ୍ତରଖାନା ବାହାରୁ ଇସିଜି କରାଇ ଆଣିବାକୁ କୁହାଯାଉଛି। ପରୀକ୍ଷା କରାଇ ଆଣିବା ପରେ ଡାକ୍ତର ମୃତ ଘୋଷଣା କରୁଛନ୍ତି। ବାଲିଆପାଳ ବ୍ଲକ ବିରିପାଲିଆ ଗ୍ରାମର ଲକ୍ଷ୍ମୀକାନ୍ତ ସାହୁ ତାଙ୍କ ବୋହୂଙ୍କ ଗର୍ଭଯନ୍ତ୍ରଣା ହେବାରୁ ବସ୍ତା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଗୁରୁବାର ଆଣିଥିଲେ। ଡାକ୍ତର ପ୍ରସୂତିଙ୍କୁ ଡାକ୍ତରଖାନା ଔଷଧ ଦେବା ବଦଳରେ ବାହାରୁ ଆଣିବା ଔଷଧ ଲେଖିଥିଲେ। ଏମିତିକି ପ୍ରସବ କରାଇବା ପାଇଁ ୩ହଜାର ଟଙ୍କା ଦାବି କରିଥିଲେ। ନ ଦେଲେ ଏଠାରେ ପ୍ରସବ ନ କରାଇ ବାଲେଶ୍ୱର ସ୍ଥାନାନ୍ତର କରାଇଦେବାକୁ କହିଥିବା ଲକ୍ଷ୍ମୀକାନ୍ତ ଅଭିଯୋଗ କରିଛନ୍ତି। ଫଳରେ ରୋଗୀଙ୍କ ସମ୍ପର୍କୀୟ ବହୁ କାକୁତି ମୀନତି ହୋଇ ୨ହଜାର ଟଙ୍କା ଦେବାରୁ ଡାକ୍ତର ପ୍ରସବ କରାଇଥିଲେ। ସେହିପରି ଡିସଚାର୍ଜ ସମୟରେ ସରକାରୀ ଔଷଧ ନ ଥିବା କହି ବାହାରୁ ନେବା ପାଇଁ ପ୍ରେସକ୍ରିପସନ କରିଥିଲେ, ଯାହାର ମୂଲ୍ୟ ୫ ହଜାର ଟଙ୍କା ହେବ। ତେବେ ସରକାର ଡାକ୍ତରଖାନାରେ ମାଗଣା ଚିକିତ୍ସା କରାଇବାକୁ ନିର୍ଦ୍ଦେଶ ଦେଇଥିବାବେଳେ ଏଠାରେ ସାମାନ୍ୟ ପ୍ରସବ ପାଇଁ ୧୦ରୁ ୧୨ହଜାର ଟଙ୍କା ଖର୍ଚ୍ଚ ହେଉଥିବାରୁ ସାଧାରଣରେ ଅସନ୍ତୋଷ ଦେଖାଦେଇଛି। ପ୍ରସୂତିଙ୍କ ଶ୍ୱଶୁର ଲକ୍ଷ୍ମୀକାନ୍ତ ସାହୁ ଏବଂ ବାପା ମହେଶ୍ୱର ସାହୁ ଏନେଇ ଅଭିଯୋଗ କରିଛନ୍ତି। ଏ ସଂକ୍ରାନ୍ତରେ ଡାକ୍ତରଖାନାର ଭାରପ୍ରାପ୍ତ ଅଧିକାରୀ ଦେବବ୍ରତ ଜେନାଙ୍କୁ ଯୋଗାଯୋଗ କରାଯିବାରୁ ସମ୍ପୃକ୍ତ ରୋଗୀଙ୍କ ପରିବାର ପକ୍ଷରୁ କୌଣସି ଲିଖିତ ଅଭିଯୋଗ ହୋଇ ନ ଥିବା କହିଛନ୍ତି।
