ବରଗଡ଼ ଅଫିସ୍,୧୫।୧୧: ବରଗଡ଼ ଧନୁଯାତ୍ରା ମହୋତ୍ସବର ମଥୁରାନଗରୀ କଳାକାର ଚୟନ ସରିବା ପରେ ସୋମବାର ସନ୍ଧ୍ୟାରେ ଗୋପପୁର କଳାକାର ଚୟନ କରାଯାଇଥିଲା। ଗୋପପୁର କମିଟି କରିଥିବା ଏହି ଚୟନ ପ୍ରକ୍ରିୟାରେ ଏଥର ସମ୍ରାଟ ମହାପାତ୍ର କୃଷ୍ଣ ଏବଂ ଶ୍ରେୟସ ପୂଜାରୀ ବଳରାମ ଚରିତ୍ର ପାଇଁ ମନୋନିତ ହୋଇଛନ୍ତି। ସେହିପରି ବୈଷ୍ଣବୀ ବିର୍ତ୍ତିଆଙ୍କୁ ରାଧା ଏବଂ ସତ୍ୟନାରାୟଣ ଷଡ଼ଙ୍ଗୀଙ୍କୁ ମଧୁମଙ୍ଗଳ ଚରିତ୍ର ପାଇଁ ମନୋନୟନ କରାଯାଇଛି। ସମ୍ରାଟ ଅମ୍ବାପାଲି ଗ୍ରାମର ସୁରେଶ ମହାପାତ୍ର ଓ ମିନତୀଙ୍କ ପୁଅ ହୋଇଥିବାବେଳେ ଶ୍ରେୟସ ମହେନ୍ଦ୍ର ପୂଜାରୀ ଓ ଜୟନ୍ତୀଙ୍କ ପୁଅ ଅଟନ୍ତି। ଉଭୟେ ବରଗଡ଼ ସରସ୍ବତୀ ଶିଶୁ ମନ୍ଦିର ହିନ୍ଦୀ ବିଭାଗର ଛାତ୍ର ଅଟନ୍ତି। ସ୍ଥାନୀୟ ଦୁର୍ଗାମଣ୍ଡପରେ ହୋଇଥିବା ଚୟନ ପ୍ରକ୍ରିୟାରେ ଦୟାନିଧି ପ୍ରଧାନ, ରାଜକୁମାର ପ୍ରଧାନ, ମହାଦେବ ବିର୍ତ୍ତିଆ, ଦଶରଥ ଅଗ୍ରୱାଲ, ଈଶ୍ୱର ବାଗ, ସତ୍ୟନାରାୟଣ ପୋଢ଼, ସୁଖଦେବ ଭୋଇ, ଗୁଲଠୁ ପ୍ରଧାନ, ରାକେଶ ବୁଡ଼େକ, ସୁରେନ୍ଦ୍ର ମହାପାତ୍ର ପ୍ରମୁଖ ଉପସ୍ଥିତ ଥିଲେ।
