ଜେନାପୁର,୧୨ା୧୧(ଅଶୋକ ଦାସ):ଶିକ୍ଷା ବ୍ୟବସ୍ଥାକୁ ସୁଦୃଢ଼ କରିବା ପାଇଁ କେନ୍ଦ୍ର ଓ ରାଜ୍ୟ ସରକାରଙ୍କ ପକ୍ଷରୁ ବ୍ୟାପକ ବ୍ୟବସ୍ଥା ଗ୍ରହଣ କରାଯାଉଥିଲେ ସୁଦ୍ଧା ଏବେ ବି ବହୁ ସ୍ଥାନରେ ଆବଶ୍ୟକ ଭିତ୍ତିଭୂମି ଅଭାବରୁ ଶିକ୍ଷାଦାନ ପ୍ରଭାବିତ ହେଉଛି। କେଉଁଠି ଭିତ୍ତିଭୂମି ନାହିଁ ତ’ ଅନ୍ୟ କେଉଁଠି ଶିକ୍ଷକ ଅଭାବ ସମସ୍ୟା ରହୁଛି। ଏହି କ୍ରମରେ ଯାଜପୁର ଜିଲା ଧର୍ମଶାଳା ବ୍ଲକ ଅନ୍ତର୍ଗତ ଜେନାପୁର ସରକାରୀ ଉଚ୍ଚ ବିଦ୍ୟାଳୟରେ ଶିକ୍ଷକ ଅଭାବ ସମେତ ବିଭିନ୍ନ ସମସ୍ୟା ଲାଗିରହିଛି, ଫଳରେ ପିଲାମାନଙ୍କ ପାଠପଢ଼ାରେ ବହୁ ଅସୁବିଧା ଦେଖା ଦେଉଛି।
୧୯୫୯ ମସିହାରେ ସ୍ଥାପିତ ଏହି ବିଦ୍ୟାଳୟରେ ପୂର୍ୱରୁ ଅଷ୍ଟମରୁ ଦଶମ ଶ୍ରେଣୀ ଯାଏ ଥିଲା। ୨୮ା୯ା୨୦୧୮ରେ ପ୍ରଥମରୁ ସପ୍ତମ ଶ୍ରେଣୀ ପର୍ଯ୍ୟନ୍ତ ହାଇସ୍କୁଲରେ ସାମିଲ ହେବା ସହିତ ୨୦୨୫-୨୬ ଶିକ୍ଷାବର୍ଷରେ ଶିଶୁ ବାଟିକା ସାମିଲ ହୋଇଥିଲା। ଏବେ ଏଠାରେ ଶିଶୁବାଟିକାଠାରୁ ୧୦ମ ଶ୍ରେଣୀ ପର୍ଯ୍ୟନ୍ତ ମୋଟ ୧୧ଟି ଶ୍ରେଣୀରେ ୫୭୪ଜଣ ପିଲା ପାଠ ପଢ଼ୁଛନ୍ତି। ସେଥିମଧ୍ୟରୁ କେବଳ ନବମରେ ୧୧୮, ୧୦ମ ଶ୍ରେଣୀରେ ୧୨୭ ଛାତ୍ରୀଛାତ୍ର ଅଧ୍ୟୟନ କରୁଛନ୍ତି। ଶିକ୍ଷାଦାନ ପାଇଁ ୧୪ଜଣ ଶିକ୍ଷକ ଥିବାବେଳେ ହିନ୍ଦୀ ଶିକ୍ଷକ, ଖେଳ ଶିକ୍ଷକ, କମ୍ପ୍ୟୁଟର ଶିକ୍ଷକ ପଦ ଖାଲିପଡ଼ିଛି। ସ୍କାଉଟ୍ ଦାୟିତ୍ୱରେ ଥିବା ଟିଜିଟି ଇତିହାସ ଶିକ୍ଷକଙ୍କୁ ଡେପୁଟେଶନରେ ଧର୍ମଶାଳା ବାଣିପୀଠକୁ ନିଆଯାଇଛି। ଏସବୁକୁ ଦେଖିଲେ ଏଠାରେ ଛାତ୍ରୀଛାତ୍ରଙ୍କ ସ୍କାଉଟ, ଲାଇବ୍ରେରି, ଶାରୀରିକ ଶିକ୍ଷା ସହ ପାଠପଢ଼ା ବାଧାପ୍ରାପ୍ତ ହେଉଛି। ସ୍କୁଲରେ ଶ୍ରେଣୀ ଅନୁସାରେ ଆବଶ୍ୟକ କୋଠରି ଥିବାବେଳେ ପାନୀୟ ଜଳର ସୁବ୍ୟବସ୍ଥା ରହିଛି। ହେଲେ ମଧ୍ୟାହ୍ନଭୋଜନ ପାଇଁ ରୋଷେଇ ଘର ନାହିଁ। ପୁରୁଣା ପରିତ୍ୟକ୍ତ ଶ୍ରେଣୀଗୃହରେ ରୋଷେଇ ହେଉଛି। ପିଲାମାନେ ବାରଣ୍ଡାରେ ବସି ଭୋଜନ କରୁଛନ୍ତି। ପାଚେରି ରହିଛି, ହେଲେ ଏହାର ଉଚ୍ଚତା କମ୍ ରହିଥିବାରୁ ସ୍କୁଲ ମଧ୍ୟକୁ ବୁଲାଗୋରୁ ଓ ଅସାମାଜିକ ବ୍ୟକ୍ତି ପଶି ପରିବେଶକୁ କଳୁଷିତ କରୁଛନ୍ତି। ବିଦ୍ୟାଳୟ ପରିସରରେ ନିର୍ମିତ ଶିଶୁ ଉଦ୍ୟାନର ଉନ୍ନତୀକରଣ କରାଯାଉ ନାହିଁ। ବିଦ୍ୟାଳୟରେ ପିଲାଙ୍କ ସଂଖ୍ୟା ଅନୁଯାୟୀ ଶୌଚାଳୟ ନାହିଁ। ଫଳରେ ପିଲାମାନଙ୍କୁ ଖାଇବା ବିରତି(ରିସେସ୍) ସମୟରେ ଶୌଚ ପାଇଁ ଦୀର୍ଘ ସମୟ ଅପେକ୍ଷା କରିବାକୁ ପଡୁଛି। ସେହିପରି ପିଲାଙ୍କ ଖେଳକୁଦ ପାଇଁ ଖେଳପଡ଼ିଆ ଏକାନ୍ତ ଅପରିହାର୍ଯ୍ୟ ହୋଇଥିଲେ ହେଁ ଏଠାରେ ଥିବା ଖେଳପଡ଼ିଆର ଆବଶ୍ୟକ ରକ୍ଷଣାବେକ୍ଷଣ କରାଯାଉନାହିଁ।
ଏ ନେଇ ପଞ୍ଚସଖା ଶିକ୍ଷାସେତୁ ସଭାପତି ପ୍ରଫୁଲ୍ଲ ଦାସଙ୍କୁ ପଚାରିବାରୁ ଶିକ୍ଷାନୁଷ୍ଠାନର ବହୁବିଧ ସମସ୍ୟା ସମ୍ପର୍କରେ ଅନେକବାର ବିଭାଗୀୟ ଉଚ୍ଚ କର୍ତ୍ତୃପକ୍ଷଙ୍କୁ ଅବଗତ କରାଯାଇଛି। ପ୍ରତିଶ୍ରୁତି ମିଳୁଛି ହେଲେ କୌଣସି ସୁଫଳ ମିଳୁନାହିଁ ବୋଲି ସେ କହିଛନ୍ତି। ବିଦ୍ୟାଳୟ ପରିଚାଳନା କମିଟି ସଭାପତି ସୁବାସ ସାମଲଙ୍କୁ ପଚାରିବାରୁ ୬୭ବର୍ଷର ଏହି ଶିକ୍ଷାନୁଷ୍ଠାନର ସମସ୍ୟା ସମାଧାନ ଦିଗରେ କେହି ଆନ୍ତରିକତା ଦେଖାଉ ନାହାନ୍ତି। ଆବଶ୍ୟକ ଶିକ୍ଷକ ପଦବୀ ପୂରଣ ନ ହେବାରୁ ପିଲାଙ୍କ ପାଠପଢ଼ା ଗୁରୁତରଭାବେ ବାଧାପ୍ରାପ୍ତ ହେଉଛି। ୫-ଟି ଯୋଜନାରେ ସ୍କୁଲକୁ ଯୋଗାଇ ଦିଆଯାଇଥିବା ସ୍ମାର୍ଟବୋର୍ଡ ଅଚଳ ହୋଇପଡ଼ିଛି। ଶିକ୍ଷା ବିଭାଗ କର୍ତ୍ତୃପକ୍ଷ ଅବିଳମ୍ୱେ ଏଦିଗରେ ପଦକ୍ଷେପ ନେବା ଜରୁରୀ ହୋଇପଡ଼ିଛି। ଏନେଇ ପୂର୍ୱତନ ପ୍ରଧାନଶିକ୍ଷକ ଚନ୍ଦ୍ରଶେଖର ସ୍ୱାଇଁଙ୍କୁ ପଚାରିବାରୁ ୫-ଟି ଯୋଜନାରେ ସ୍କୁଲକୁ ୫୦ଲକ୍ଷରୁ ଊର୍ଦ୍ଧ୍ୱ ଟଙ୍କାର ଅନୁଦାନ ଆସିଥିଲା। ସେଥିରେ ସ୍କୁଲ କୋଠାଗୁଡ଼ିକର ମରାମତି ସହ ରଙ୍ଗ ଦିଆଯାଇଥିଲା। ଏଥିସହିତ ପୁରୁଣା ଅଟ୍ଟାଳିକାକୁ ଉନ୍ନତୀକରଣ କରାଯାଇ ୨ଟି ସ୍ମାର୍ଟ ଶ୍ରେଣୀଗୃହ, ଇ-ଲାଇବ୍ରେରି, ଲାବରେଟୋରି କରାଯାଇଛି। ସ୍କୁଲ ପରିସର ରାସ୍ତା, ବଗିଚା, ଶିଶୁ ଉଦ୍ୟାନ ନିର୍ମାଣ କରାଯାଇଛି। ସେହିପରି ମୋ ସ୍କୁଲ ଅଭିଯାନର ୧କୋଟିରୁ ଊର୍ଦ୍ଧ୍ୱ ଟଙ୍କାରେ ୨ଟି ସ୍ମାର୍ଟ ଶ୍ରେଣୀଗୃହ, ୪ଟି ଶୌଚାଳୟ, ସାଇକେଲ ଷ୍ଟାଣ୍ଡ, ଖୋଲା ଅଡିଟୋରିୟମ, ବଗିଚା କରାଯାଇଛି ବୋଲି କହିଛନ୍ତି। ପ୍ରଧାନଶିକ୍ଷକ ନିତ୍ୟାନନ୍ଦ ନାୟକ କହିଛନ୍ତି, ସେ ଏଠାରେ ନୂତନ ଭାବେ ଯୋଗଦେଇଛନ୍ତି। ଉନ୍ନତ ଶିକ୍ଷାଦାନ ଓ ଶୃଙ୍ଖଳା ବ୍ୟବସ୍ଥା ପ୍ରତି ଧ୍ୟାନ ଦିଆଯାଉଛି। ଏଥିସହିତ ଆବଶ୍ୟକ ଆଉ ୭ ଶିକ୍ଷକ ପଦବୀ ପୂରଣ ହେଲେ ଛାତ୍ରୀଛାତ୍ରଙ୍କ ପାଠ ପଢ଼ାରେ କୌଣସି ଅସୁବିଧା ହେବନାହିଁ ବୋଲି ନାୟକ କହିଛନ୍ତି। ଏ ସଂକ୍ରାନ୍ତରେ ବିଇଓ ଅଭୟ କୁମାର ବେହେରାଙ୍କୁ ପଚାରିବାରୁ ସ୍କୁଲ ସମସ୍ୟା ବିଷୟରେ ଅବଗତ ଅଛି। ଶିକ୍ଷକ ନିଯୁକ୍ତି ନିମନ୍ତେ ଉଚ୍ଚ କର୍ତ୍ତୃପକ୍ଷଙ୍କୁ ଅବଗତ କରାଇଛି। ଖୁବ୍ଶୀଘ୍ର ନିଯୁକ୍ତି କରାଯିବ ବୋଲି ସେ କହିଛନ୍ତି।
