ଲକ୍ଷ୍ନୌ,୧୬ା୩: ଉତ୍ତରପ୍ରଦେଶ ବରେଲି ଜିଲାର ଇଜ୍ଜତନଗର ପୋଲିସ ଷ୍ଟେସନ ଅଞ୍ଚଳର ରାହପୁରା ଚୌଧୁରୀ ଅଞ୍ଚଳରେ ସୋମବାର ଏକ ପାରିବାରିକ ବିବାଦର ସମାଧାନ ପାଇଁ ଏକ ବୈଠକ ବସିଥିଲା । ହେଲେ ଜ୍ବାଇଁ ହଠାତ୍ କ୍ରୋଧିତ ହୋଇ ତାଙ୍କ ଶାଶୁ ଏବଂ ଶଳାଙ୍କୁ ଛୁରୀ ଭୁସି ହତ୍ୟା କଲେ । ଉଭୟଙ୍କର ଘଟଣାସ୍ଥଳରେ ହିଁ ମୃତ୍ୟୁ ହୋଇଥିଲା । ଏହି ସମୟରେ, ତାଙ୍କ ପତ୍ନୀ ହସ୍ତକ୍ଷେପ କରିବାକୁ ଯାଇ ସେ ମଧ୍ୟ ଆହତ ହୋଇିଲେ । ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି ।
ରିପୋର୍ଟ ଅନୁଯାୟୀ, ରାହପୁରା ଚୌଧୁରୀର ବାସିନ୍ଦା ୩୫ବର୍ଷୀୟ ଅଫସର ଖାନ ଓରଫ ‘ବାଉରା’ ତାଙ୍କ ପତ୍ନୀ ୩୦ ବର୍ଷୀୟ ସାଇମା ଖାନଙ୍କ ସହିତ ଦୀର୍ଘ ଦିନ ଧରି ଘରୋଇ ବିବାଦ ଲାଗି ରହିଥିଲା । ଫଳରେ ସାଇମା ପ୍ରାୟ ଗତ ପାଞ୍ଚ ଦିନ ଧରି ତାଙ୍କ ବାପାମାଆଙ୍କ ଘରେ ରହୁଥିଲେ। ଏହି ବିବାଦର ସମାଧାନ ପାଇଁ, ସୋମବାର ଦିନ ଦୁଇ ପରିବାର ମଧ୍ୟରେ ଆଲୋଚନା ପାଇଁ ଏକ ବୈଠକ ଡକାଯାଇଥିଲା । ଯେଉଁଥିରେ ଉଭୟ ପକ୍ଷର ସଦସ୍ୟମାନେ ଉପସ୍ଥିତ ଥିଲେ।
ବୈଠକ ସମୟରେ, ଅଫସର ଖାନ ହଠାତ୍ କୌଣସି ଏକ ପ୍ରସଙ୍ଗକୁ ନେଇ କ୍ରୋଧିତ ହୋଇଥିଲେ । ସେ ପାଖରେ ରଖାଯାଇଥିବା ଏକ ଛୁରୀ ବାହାର କରି ତାଙ୍କ ଶ୍ୱଶୁର ଘର ଲୋକଙ୍କୁ ଆକ୍ରମଣ କଲେ। ପ୍ରଥମେ, ସେ ତାଙ୍କ ୫୪ ବର୍ଷୀୟ ଶାଶୁ ଆସମା ଏବଂ ତାଙ୍କ ୨୦ ବର୍ଷୀୟ ଭାଇ ଆଦିଲଙ୍କୁ ଅନେକ ଥରେ ଛୁରୀ ମାରିବାରୁ ତାଙ୍କର ଘଟଣାସ୍ଥଳରେ ମୃତ୍ୟୁ ହୋଇଥିଲା । ଯେତେବେଳେ ତାଙ୍କ ସ୍ତ୍ରୀ ସାଇମା ମଧ୍ୟସ୍ଥତା କରିବାକୁ ହସ୍ତକ୍ଷେପ କଲେ, ଅଭିଯୁକ୍ତ ତାଙ୍କୁ ମଧ୍ୟ ଆକ୍ରମଣ କଲେ, ଯାହା ଫଳରେ ସେ ଗୁରୁତର ଆହତ ହେଲେ। ତାଙ୍କୁ ଚିକିତ୍ସା ପାଇଁ ଏକ ଘରୋଇ ହସ୍ପିଟାଲରେ ଭର୍ତ୍ତି କରାଯାଇଛି, ଯେଉଁଠାରେ ତାଙ୍କ ଅବସ୍ଥା ସଙ୍କଟାପନ୍ନ ଥିବା ରିପୋର୍ଟ ହୋଇଛି ।
ଅପରାଧ କରିବା ପରେ ଅଭିଯୁକ୍ତ ଘଟଣାସ୍ଥଳରୁ ପଳାଇ ଯାଇଥିଲା। ସୂଚନା ପାଇବା ପରେ, ପୋଲିସ ତୁରନ୍ତ ଘଟଣାସ୍ଥଳରେ ପହଞ୍ଚିଥିଲା। ପୋଲିସ ଉଭୟ ମୃତଦେହକୁ ହେପାଜତକୁ ନେଇ ପୋଷ୍ଟମର୍ଟମ ପାଇଁ ପଠାଇଥିଲା ଏବଂ ଘଟଣାର ତଦନ୍ତ ଆରମ୍ଭ କରିଥିଲା। ଅଞ୍ଚଳରେ ଉତ୍ତେଜନାକୁ ଦୃଷ୍ଟିରେ ରଖି, ଅତିରିକ୍ତ ପୋଲିସ ଫୋର୍ସ ମୁତୟନ କରାଯାଇଛି। ପୋଲିସ ସ୍ଥାନୀୟ ବାସିନ୍ଦାଙ୍କୁ ପଚରାଉଚରା କରୁଛି ଏବଂ ଅଭିଯୁକ୍ତଙ୍କ ସନ୍ଧାନରେ ଚଢାଉ କରୁଛି।
