ବାର୍ସିଲୋନା, ୨୦।୮(ଏପି)- ନେଦରଲାଣ୍ଡ୍ସର ରୋନାଲ୍ଡ କୋଏମ୍ୟାନ ବାର୍ସିଲୋନାର ନୂଆ କୋଚ୍ ନିଯୁକ୍ତ ହୋଇଛନ୍ତି। ବୁଧବାର ଏହା କ୍ଲବ ପକ୍ଷରୁ ବିଧିବଦ୍ଧଭାବେ ଘୋଷଣା କରାଯାଇଛି। ଚାମ୍ପିୟନ୍ସ ଲିଗ୍ର କ୍ୱାର୍ଟର ଫାଇନାଲରେ ବେୟରନ ମ୍ୟୁନିଚ୍ଠାରୁ ୨-୮ ଗୋଲରେ ଲଜ୍ଜାଜନକ ପରାଜୟର ୫ ଦିନ ପରେ ବାର୍ସିଲୋନା ଏହାର ନୂଆ କୋଚ୍ ପାଇଛି। ପୂର୍ବତନ ଡିଫେଣ୍ଡର କୋଏମ୍ୟାନଙ୍କ ସହ ବାର୍ସିଲୋନା ୨୦୨୨ ଜୁନ୍ ପର୍ଯ୍ୟନ୍ତ ଚୁକ୍ତି କରିଛି। ବିଦାୟୀ କୋଚ୍ ଫ୍ରେଡ୍ କ୍ୱିକ୍ ଷ୍ଟେଇନ୍ଙ୍କ ସ୍ଥାନରେ କୋଏମ୍ୟାନଙ୍କୁ ଏହି ନିଯୁକ୍ତି ମିଳିଛି। ଗତ ଜାନୁୟାରୀରେ ଏର୍ନାଷ୍ଟୋ ଭାଲଭେର୍ଡଙ୍କ ସ୍ଥାନରେ କୋଚ୍ ହୋଇଥିବା ଷ୍ଟେଇନଙ୍କ କାର୍ଯ୍ୟକାଳ ମାତ୍ର ୨୫ ମ୍ୟାଚରେ ସୀମିତ ରହିଥିଲା। କୋଏମ୍ୟାନଙ୍କର ୨୦ ବର୍ଷ ଧରି ମ୍ୟାନେଜର ରହିବା ଏବଂ ୮ ଟ୍ରଫି ଜିତିବାର ଅଭିଜ୍ଞତା ରହିଛି। ଡଚ୍ ନ୍ୟାଶନାଲ ଟିମ୍କୁ ସେ ୨୦୧୮ ପର୍ଯ୍ୟନ୍ତ କୋଚିଂ ଦେଇଥିଲେ। ପୂର୍ବରୁ ସେ ସ୍ପାଶିସ୍ ଲିଗ୍, ଡଚ୍ ଲିଗ୍ ଏବଂ ପର୍ତ୍ତୁଗୀଜ୍ ଲିଗ୍ରେ କୋଚ୍ ଦାୟିତ୍ୱ ତୁଲାଇଥିଲେ। ୫୭ ବର୍ଷୀୟ କୋଏମ୍ୟାନ ପୂର୍ବରୁ ୧୯୯୦ ଶେଷଭାଗରେ ବାର୍ସିଲୋନାର ସହକାରୀ କୋଚ୍ ଥିଲେ। ଜଣେ ଖେଳାଳିଭାବେ ସେ ବାର୍ସିଲୋନାକୁ ଏହାର ପ୍ରଥମ ୟୁରୋପିଆନ ଟାଇଟଲ ଜିତାଇବାରେ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିଥିଲେ। ଦୁଇ ଦଶନ୍ଧୀ ପୂର୍ବରୁ ଅନୁଷ୍ଠିତ ଫାଇନାଲରେ ତାଙ୍କ ଅତିରିକ୍ତ ସମୟ ଗୋଲ ବଳରେ ବାର୍ସିଲୋନା ପ୍ରତିପକ୍ଷ ସାମ୍ପଡୋରିଆକୁ ପରାସ୍ତ କରିଥିଲା।
