ଦେବଗଡ଼,୨୫।୧୨(ଡି.ଏନ୍.ଏ.): ଦେବଗଡ଼ ଇନ୍ଦିରା ଗାନ୍ଧୀ ଷ୍ଟାଡିୟମଠାରେ ଚାଲିଥିବା ୩୧ତମ ବାମଣ୍ଡା କପ୍ କ୍ରିକେଟ ଟୁର୍ନାମେଣ୍ଟର ଶନିବାର ମ୍ୟାଚରେ କଟକର ରାଇଜିଂ ଷ୍ଟୁଡେଣ୍ଟ ଦଳ ବାଲେଶ୍ବର ଏକାଦଶକୁ ୫୭ ରନ୍ରେ ପରାସ୍ତ କରିଛି।
ବାଲେଶ୍ୱର ଦଳ ଟସ୍ ଜିତି ପ୍ରଥମେ ବ୍ୟାଟିଂ ପାଇଁ କଟକ ଦଳକୁ ଆମନ୍ତ୍ରଣ କରିଥିଲା। କଟକ ପ୍ରଥମେ ବ୍ୟାଟିଂ କରି ୨୦ ଓଭରରେ ୩ ଉଇକେଟ ହରାଇ ୧୭୩ ରନ୍ କରିଥିଲା। ଦଳ ପକ୍ଷରୁ ଅରବିନ୍ଦ ସିଂ ୪୧ବଲରେ ୮୨ ରନ୍ ଓ ସୌଭାଗ୍ୟ ମିଶ୍ର ୪୦ରନ୍ କରିଥିଲେ। ବାଲେଶ୍ୱର ଦଳର ଆକାଶ ଶେଖ, ପ୍ରବୋଧ ଦ୍ବିବେଦୀ ଓ ଧନୁ ପ୍ରସାଦ ଗୋଟିଏ ଲେଖାଏଁ ଉଇକେଟ ନେଇଥିଲେ।
ବାଲେଶ୍ୱର ଦଳ ବ୍ୟାଟିଂ କରି ୨୦ ଓଭରରେ ୯ ଉଇକେଟ ହରାଇ ୧୧୬ ରନ୍ କରି ପରାସ୍ତ ହୋଇଥିଲେ। ଦଳ ପକ୍ଷରୁ ଉମେଶ ଗୌତମ ୩୦ ବଲରେ ୬୦ ରନ୍ କରିଥିଲେ। କଟକ ଦଳର ବିପ୍ଳବ ସାମନ୍ତରାୟ ୩, ଅରବିନ୍ଦ ସିଂ ଓ ଅଭିଜିତ ୨ଟି ଉଇକେଟ ନେଇଥିଲେ। କଟକ ଦଳର ଅରବିନ୍ଦ ସିଂଙ୍କୁ ମ୍ୟାନ ଅଫ୍ ଦି ମ୍ୟାଚ ପୁରସ୍କାର ପ୍ରଦାନ କରାଯାଇଛି। ବରିଷ୍ଠ ଓକିଲ ସଚ୍ଚିକାନ୍ତ ଦାଶ ମୁଖ୍ୟ ଅତିଥି ଭାବେ ଯୋଗଦେଇ ପୁରସ୍କାର ପ୍ରଦାନ କରିଥିଲେ। ମ୍ୟାଚକୁ ଅମ୍ପାୟାର ପରାସର ବିଶ୍ୱାଳ ଓ ସତ୍ୟ ରଥ ପରିଚାଳନା କରିଥିଲେ। ରବିବାର ମ୍ୟାଚ କଟକ ରାଇଜିଂ ଷ୍ଟୁଡେଣ୍ଟ ବନାମ ସମ୍ବଲପୁର ଜଗନ୍ନାଥ କ୍ରିକେଟ କ୍ଲବ ମଧ୍ୟରେ ଅନୁଷ୍ଠିତ ହେବ ବୋଲି ସମ୍ପାଦକ ସୁଜିତ କୁମାର ପ୍ରଧାନ ସୂଚନା ଦେଇଛନ୍ତି।
