ନୂଆଦିଲ୍ଲୀ, ୮ା୭ (ପି.ଟି.)-ଭାରତୀୟ ଆଥଲେଟିକ୍ସ କୋଚ୍ ପଦବୀରୁ ବାହାଦୁୁର ସିଂ ଅବ୍ୟାହତି ନେଇଛନ୍ତି। ସେ ଦୀର୍ଘ ୨୫ବର୍ଷ ଧରି ଏହି ପଦବୀରେ ଥିଲେ। ଭାରତରେ କୌଣସି କୋଚ୍ ଏତେ ଦିନ ଧରି କାର୍ଯ୍ୟକରି ନାହାନ୍ତି। ବୟସ କଟକଣା ଯୋଗୁ ସ୍ପୋଟର୍ସ ଅଥରିଟି ଅଫ୍ ଇଣ୍ଡିଆ(ସାଇ) ତାଙ୍କ କାର୍ଯ୍ୟକାଳ ମିଆଦ ବୃଦ୍ଧି କରି ନ ଥିଲା। ୭୪ ବର୍ଷୀୟ ଏସିଆନ ଗେମ୍ସ ସ୍ବର୍ଣ୍ଣ ପଦକ ବିଜେତା (୧୯୭୮ ଓ ୧୯୮୨) ଏହି ଶଟ୍ପୁଟର କାର୍ଯ୍ୟକାଳ ଜୁନ୍ ୩୦ରେ ଶେଷ ହୋଇଥିଲା। ସ୍ପୋଟର୍ସ ଗାଇଡ୍ଲାଇନ୍ ଅନୁସାରେ ଜାତୀୟ କ୍ୟାମ୍ପଗୁଡ଼ିକରେ କୋଚ୍ମାନଙ୍କ ସର୍ବାଧିକ ବୟସ ସୀମା ୭୦ବର୍ଷ ରଖାଯାଇଛି। ସିଂ ୧୯୯୫ ଫେବୃୟାରୀରେ ମୁଖ୍ୟ କୋଚ୍ ଭାବେ ଦାୟିତ୍ୱ ଗ୍ରହଣ କରିଥିଲେ। ପ୍ରଥମେ ଜଣେ ଅନ୍ତର୍ଜାତୀୟ ପଦକ ବିଜେତା ଏବଂ ପରେ ମୁଖ୍ୟ କୋଚ୍୍ ଭାବେ ଭାରତୀୟ ଆଥଲେଟିକ୍ସ ପ୍ରତି ବାହାଦୁରଙ୍କ ଅବଦାନ ଉଲ୍ଲେଖନୀୟ ବୋଲି ଆଥଲେଟିକ୍ସ ଫେଡେରେଶନ ଅଫ୍ ଇଣ୍ଡିଆ(ଏଏଫ୍ଆଇ) ସଭାପତି ଆଡିଲ ସୁମାରିଓ୍ବାଲ କହିଛନ୍ତି। କୋଭିଡ୍ ୧୯ ଯୋଗୁ ବରିଷ୍ଠ ନାଗରିକମାନଙ୍କ ଆତଯାତ ଉପରେ ଗୃହ ମନ୍ତ୍ରଣାଳୟ କଟକଣା ଲଗାଇଛନ୍ତି। ଏହି ଦୃଷ୍ଟିରୁ ବାହାଦୁର ତାଙ୍କ ପଦବୀରୁ ଇସ୍ତଫା ଦେଇଛନ୍ତି। ଟୋକିଓ ୨୦୨୦ ଗେମ୍ସ ଯଦି ସ୍ଥଗିତ ହୋଇ ନ ଥାନ୍ତା ତେବେ ତାଙ୍କୁ ଭାରତୀୟ ଅଲିମ୍ପିକ୍ସ ଦଳରେ ଦେଖିବାକୁ ମିଳିଥାନ୍ତା। ବାହାଦୁରଙ୍କ ପ୍ରତ୍ୟକ୍ଷ ତତ୍ୱାବଧାନରେ ଭାରତ ୨୦୧୦ ଦିଲ୍ଲୀ ରାଜ୍ୟଗୋଷ୍ଠୀ କ୍ରୀଡ଼ା ଆଥଲେଟିକ୍ସରେ ୨ ସ୍ବର୍ଣ୍ଣ ସହ ୧୨ ପଦକ ହାସଲ କରିଥିଲା। ଜାକର୍ତ୍ତାରେ ୨୦୧୮ ଏସିଆନ ଗେମ୍ସରେ ଶ୍ରେଷ୍ଠ ପ୍ରଦର୍ଶନ ସହ ଭାରତ ଦୌଡ଼କୁଦ ପ୍ରତିଯୋଗିତାରେ ୮ ସ୍ବର୍ଣ୍ଣ ଓ ୯ ରୌପ୍ୟ ସହ ମୋଟ ୨୦ଟି ପଦକ ଜିତିଥିଲା।
