ବେଙ୍ଗାଲୁରୁ,୩୦।୫ : ମଙ୍ଗଳବାର କର୍ନାଟକର ନବନିଯୁକ୍ତ ପ୍ରାଥମିକ ଓ ମାଧ୍ୟମିକ ଶିକ୍ଷା ମନ୍ତ୍ରୀ ମଧୁ ବଙ୍ଗାରପ୍ପା ସଙ୍କେତ ଦେଇଛନ୍ତି ଛାତ୍ରୀଛାତ୍ରଙ୍କ ସ୍ବାର୍ଥକୁ ଦୃଷ୍ଟିରେ ରଖି ଆଗାମୀ ଦିନରେ ସ୍କୁଲ ପାଠ୍ୟକ୍ରମ ସଂଶୋଧନ କରାଯାଇପାରେ। ହିଜାବ ନିଷେଧାଦେଶ ହଟାଇବାକୁ ନେଇ ସେ କୌଣସି ମନ୍ତବ୍ୟ ଦେବାକୁ ମନା କରି ଦେଇଛନ୍ତି। ଏହି ମାମଲା କୋର୍ଟରେ ବିଚାରାଧୀନ ରହିଛି। ରାଷ୍ଟ୍ରୀୟ ଶିକ୍ଷା ନୀତିକୁ ରଦ୍ଦ କରିବା ପାଇଁ ସରକାରଙ୍କ ଯୋଜନା ଉପରେ ଉତ୍ତରକୁ ଅପେକ୍ଷା କରିବାକୁ ସେ କହିଛନ୍ତି।
ଭାଜପା ସରକାର ସମୟରେ ବିଦ୍ୟାଳୟ ପାଠ୍ୟପୁସ୍ତକରେ ପରିବର୍ତ୍ତନ କରାଯାଇଥିଲା। କଂଗ୍ରେସ ଏହାର ନିର୍ବାଚନୀ ଇସ୍ତାହାରରେ ସ୍କୁଲ ପାଠ୍ୟପୁସ୍ତକରେ କରାଯାଇଥିବା ପରିବର୍ତ୍ତନଗୁଡ଼ିକୁ ଫେରାଇ ଆଣିବାକୁ ପ୍ରତିଶୃତି ଦେଇଥିଲା। ଦଳ ମଧ୍ୟ ଶିକ୍ଷାନୀତିକୁ ରଦ୍ଦ କରିବାକୁ ପ୍ରତିଶୃତି ଦେଇଥିଲା। ବଙ୍ଗାରପ୍ପା କହିଛନ୍ତି, ମୁଁ କଂଗ୍ରେସର ମନିଫେଷ୍ଟୋ କମିଟିର ଉପାଧ୍ୟକ୍ଷ ଥିଲି ଏବଂ ମନିଫେଷ୍ଟୋରେ ଆମେ ସ୍ପଷ୍ଟ ଭାବରେ କହିଥିଲୁ ଛାତ୍ରୀଛାତ୍ରଙ୍କ ଭବିଷ୍ୟତକୁ ଦୃଷ୍ଟିରେ ରଖି ପାଠ୍ୟ ପୁସ୍ତକରେ ସଂଶୋଧନ କରାଯିବ। ଆମେ ଚାହୁଁନାହୁଁ ସେମାନଙ୍କ ମନ ପ୍ରଦୂଷିତ ହେଉ। ସେମାନଙ୍କ ମନରେ ଖରାପ ପ୍ରଭାବ ପକାଇବାକୁ ଦିଆଯିବ ନାହିଁ।
ଖବରଦାତାମାନଙ୍କ ସହ କଥାବାର୍ତ୍ତା କରି ସେ କହିଛନ୍ତି ଆମେ ଏହା ମଧ୍ୟ କହିସାରିଛୁ ଛାତ୍ରୀଛାତ୍ରମାନେ ଶିକ୍ଷିତ ହେବା ପାଇଁ ବିଦ୍ୟାଳୟକୁ ଆସନ୍ତି ଏବଂ ଆମେ ଏଥିରେ କୌଣସି ବିଶୃଙ୍ଖଳା ଚାହୁଁନାହୁଁ। ସରକାର କିମ୍ବା ମୁଁ କିମ୍ବା ଅଧିକାରୀ କିମ୍ବା ବ୍ୟବସ୍ଥାରେ କୌଣସି ଭୁଲ ହେବା ଉଚିତ ନୁହେଁ। ଆମେ ଏକ ପ୍ରତିଶ୍ରୁତି ଦେଇଛୁ।
ବୁଧବାରଠାରୁ ବିଦ୍ୟାଳୟ ଆରମ୍ଭ ହେବା ପାଇଁ କିଛି ପରିମାଣରେ ପାଠ୍ୟପୁସ୍ତକ ପଠାଯାଇଛି। ବର୍ତ୍ତମାନ ଆମ ସମ୍ମୁଖରେ ଆହ୍ବାନ ହେଉଛି ଛାତ୍ରୀଛାତ୍ରମାନଙ୍କର ଅଧ୍ୟୟନ ଯେଭଳି ପ୍ରଭାବିତ ନ ହେବ ସେଥି ପାଇଁ ଆମେ ଏହାର ଯତ୍ନ ନେବା। ମୁଖ୍ୟମନ୍ତ୍ରୀ ଏବଂ ଉପମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶରେ ମନିଫେଷ୍ଟର ପ୍ରତିବଦ୍ଧତା ଆଗକୁ ବଢ଼ାଯିବ।
ଏହାପୂର୍ବରୁ ମୁଖ୍ୟମନ୍ତ୍ରୀ ସିଦ୍ଦାରାମାୟା ସୋମବାର କହିଥିଲେ ପାଠ ମାଧ୍ୟମରେ ପିଲାମାନଙ୍କ ମନକୁ ପ୍ରଦୂଷିତ କରୁଥିବା କାର୍ଯ୍ୟକୁ କ୍ଷମା କରାଯାଇପାରିବ ନାହିଁ। ଶିକ୍ଷାବର୍ଷ ଆରମ୍ଭ ହୋଇଛି, ଆମେ ଏନେଇ ଆଲୋଚନା କରିବୁ ଏବଂ କାର୍ଯ୍ୟାନୁଷ୍ଠାନ ଗ୍ରହଣ କରିବୁ ଯାହା ଦ୍ୱାରା ପିଲାମାନଙ୍କର ଶିକ୍ଷା ବାଧାପ୍ରାପ୍ତ ହେବ ନାହିଁ। ଶିକ୍ଷାନୀତି ନାମରେ ଶିକ୍ଷା କ୍ଷେତ୍ରରେ ଅପମିଶ୍ରଣକୁ ଅନୁମତି ଦିଆଯିବ ନାହିଁ। ଏ ବାବଦରେ ପୁଣି ଥରେ ଏକ ପୃଥକ ବୈଠକ ଡକାଯିବ ଯାହା ଦ୍ୱାରା ଏହା ବିସ୍ତୃତ ଭାବରେ ଆଲୋଚନା ହୋଇପାରିବ ଏବଂ କଠୋର ନିଷ୍ପତ୍ତି ନିଆଯାଇପାରିବ ।
ବଙ୍ଗାରପ୍ପା କହିଛନ୍ତି ସେ ମୁଖ୍ୟମନ୍ତ୍ରୀଙ୍କ ସହ ଏକ ରାଉଣ୍ଡ ଆଲୋଚନା କରିସାରିଛନ୍ତି ଏବଂ ସେ ଏନେଇ ଏକ ଟିମ ଗଠନ କରିବେ। ସେ କହିଛନ୍ତି ମୁଁ ବର୍ତ୍ତମାନ ଏହା ବିଷୟରେ ଅଧିକ କିଛି ପ୍ରକାଶ କରିପାରିବି ନାହିଁ, ଜୁନ ୧ ରେ କ୍ୟାବିନେଟ ବୈଠକ ଅନୁଷ୍ଠିତ ହେବାକୁ ଯାଉଛି ଏବଂ ଅଧିକ ବିବରଣୀ ସେଦିନ ମିଳିପାରେ।
ପୂର୍ବ ସରକାର ସମୟରେ ପାଠ୍ୟପୁସ୍ତକକୁ ନେଇ ବିବାଦ ଦେଖାଦେଇଥିଲା, ବିରୋଧୀ କଂଗ୍ରେସ ଏବଂ କିଛି ଲେଖକ ତତ୍କାଳୀନ ପାଠ୍ୟ ପୁସ୍ତକ ସମୀକ୍ଷା କମିଟି ମୁଖ୍ୟ ରୋହିତ ଚକ୍ରବର୍ତ୍ତୀଙ୍କ ବହିଷ୍କାର ଦାବି କରିଥିଲେ। ଯେଉଁଥିରେ ଆରଏସଏସର ପ୍ରତିଷ୍ଠାତା କେଶବ ବଲିରାମ ହେଡଗେୟାରଙ୍କ ଭାଷଣକୁ ଅଧ୍ୟାୟ ଭାବରେ ଅନ୍ତର୍ଭୁକ୍ତ କରାଯାଇଥିଲା। ବିଦ୍ୟାଳୟ ପାଠ୍ୟପୁସ୍ତକରେ ସ୍ବାଧୀନତା ସଂଗ୍ରାମୀ, ସାମାଜିକ ସଂସ୍କାରକ ପରି ବିଶିଷ୍ଟ ବ୍ୟକ୍ତିତ୍ୱ ଉପରେ ଅଧ୍ୟାୟ ହଟାଇ ଦିଆଯାଇଥିଲା।
