ନୂଆଦିଲ୍ଲୀ,୧ା୫(ପି.ଟି.):କେନ୍ଦ୍ର ସରକାରଙ୍କ ଆୟୁଷ୍ମାନ୍ ଭାରତ ସ୍ବାସ୍ଥ୍ୟ ଯୋଜନାକୁ ଅତି ଦୁର୍ବଳ ଭାବେ ଗଢ଼ାଯାଇଛି। ଏହାକୁ ଉପଯୁକ୍ତ ପାଣ୍ଠି ମଧ୍ୟ ଯୋଗାଇ ଦିଆଯାଉ ନାହିଁ ବୋଲି ମଙ୍ଗଳବାର ଇଣ୍ଡିଆନ୍ ମେଡିକାଲ୍ ଆସୋସିଏଶନ୍ (ଆଇଏମ୍ଏ) ମୁଖ୍ୟ ଡ. ଆର୍.ଭି. ଅଶୋକନ୍ କହିଛନ୍ତି। ଏପରି କି ଭାରତର ସ୍ବାସ୍ଥ୍ୟ ବ୍ୟବସ୍ଥା ଏକ ଅନାଥ ‘ସଦୃଶ’। କୋଭିଡ୍-୧୯ ମହାମାରୀ ସଙ୍କଟରୁ ସରକାର କିଛି ଶିକ୍ଷାଲାଭ କଲେନାହିଁ। କୌଣସି ରାଜନୈତିକ ଦଳ ଏହାକୁ ସର୍ବୋଚ୍ଚ ପ୍ରାଥମିକତା ରୂପେ ଗ୍ରହଣ ନ କରିବା ଅତ୍ୟନ୍ତ ଦୁର୍ଭାଗ୍ୟଜନକ ବୋଲି ଅଶୋକନ୍ ନ୍ୟୁଜ୍ ଏଜେନ୍ସି ପିଟିଆଇକୁ ସାକ୍ଷାତ୍କାର ଦେଇ କହିଛନ୍ତି। କେନ୍ଦ୍ର ସରକାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ମହତ୍ତ୍ୱାକାଂକ୍ଷୀ ‘ଆୟୁଷ୍ମାନ ଭାରତ’ ଯୋଜନାକୁ ସବୁ ରାଜ୍ୟରେ କାର୍ଯ୍ୟକାରୀ କରାଇବା ଉପରେ ଜୋର୍ ଦେଉଛନ୍ତି। ବିରୋଧୀ ଦଳ ଶାସିତ କେତେକ ରାଜ୍ୟରେ ଏହାକୁ ଲାଗୁ କରାଯାଇ ନ ଥିବାରୁ ସମ୍ପୃକ୍ତ ରାଜ୍ୟଗୁଡ଼ିକର ସରକାରଙ୍କୁ ରାଜନୈତିକ ଭାବେ ଟାର୍ଗେଟ କରୁଛନ୍ତି। ଏଭଳି ସ୍ଥିତିରେ ଲୋକ ସଭା ନିର୍ବାଚନ ପୂର୍ବରୁ ଅଶୋକନ୍ଙ୍କ ଏହି ମନ୍ତବ୍ୟ କେନ୍ଦ୍ରର ମୁଖା ଖୋଲିଦେଇଛି।
ଅଶୋକନ୍ଙ୍କ ମତରେ ସ୍ବାସ୍ଥ୍ୟ ଏକ ଅନାଥ, ଯାହାର ମା’ବାପା ନାହାନ୍ତି। ଦେଶର ଆଭ୍ୟନ୍ତରୀଣ ସୁରକ୍ଷା ପ୍ରତି ବିପଦ ସୃଷ୍ଟିକାରୀ କୋଭିଡ୍ ମହାମାରୀ ପରବର୍ତ୍ତୀ ସମୟରେ ସ୍ବାସ୍ଥ୍ୟ ବ୍ୟବସ୍ଥା ଉପରେ କେହି ଆଲୋଚନା କରିବାକୁ ଚାହୁଁନାହାନ୍ତି। ‘ସବୁକିଛି ଠିକ୍ଠାକ୍ ଚାଲିଛି’ ଭଳି ସମସ୍ତେ ମନେକରୁଛନ୍ତି। ଲୋକ ସଭା ନିର୍ବାଚନ ପାଇଁ ରାଜନୈତିକ ଦଳଗୁଡ଼ିକ ଜାରି କରିଥିବା ଇସ୍ତାହାରରେ ସ୍ବାସ୍ଥ୍ୟକୁ ଗୁରୁତ୍ୱ ଦିଆଯାଇ ନାହିଁ। ଆୟୁଷ୍ମାନ ଭାରତ ପ୍ରଧାନମନ୍ତ୍ରୀ ଜନ ଆରୋଗ୍ୟ ଯୋଜନା (ଏବି-ପିଏମ୍ଜେଏଓ୍ବାଇ)ରେ ‘ମହାନ୍ ଦୂରଦୃଷ୍ଟି’ ରହିଥିଲା ଏବଂ ଏଥିରୁ ଲୋକେ ମଧ୍ୟ ବହୁ ଆଶା କରିଥିଲେ। ତେବେ ପ୍ରଧାନମନ୍ତ୍ରୀଙ୍କ ଏହି ଯୋଜନାକୁ ନୀତି ଆୟୋଗ ଓ ଅମଲାତନ୍ତ୍ରୀମାନେ ଦୁର୍ବଳ କରି ପ୍ରଣୟନ କରିଥିଲେ। ଯୋଜନାଟି ଯେମିତି ଭୁଶୁଡ଼ିବ, ସେଭଳି ଭାବେ ଏହାକୁ ପାଣ୍ଠି ଯୋଗାଇ ଦିଆଯାଇଛି। ସ୍ବାସ୍ଥ୍ୟସେବା କ୍ଷେତ୍ରରେ ଅଧିକ ନିବେଶର ଆବଶ୍ୟକତା ରହିଥିବା ଅଶୋକନ୍ କହିଛନ୍ତି।
ପୂର୍ବରୁ ଅମଲାତନ୍ତ୍ରୀମାନେ ଏହି ଯୋଜନାରେ ବାର୍ଷିକ ୧.୬ ଲକ୍ଷ କୋଟି ଟଙ୍କା ଖର୍ଚ୍ଚ ହେବ ବୋଲି ଆକଳନ କରିଥିଲେ। କିନ୍ତୁ ଯୋଜନାଟି ମାତ୍ର ୬,୮୦୦ କୋଟି ଟଙ୍କାରେ ଆରମ୍ଭ ହୋଇଥିଲା। ବର୍ତ୍ତମାନ ଏହାକୁ ଚଳାଇବା ପାଇଁ ବର୍ଷକୁ ୧୨,୦୦୦ କୋଟି ଟଙ୍କା ଖର୍ଚ୍ଚ ହେଉଛି ବୋଲି ଆଇଏମ୍ଏ ଅଧ୍ୟକ୍ଷ ଅଶୋକନ୍ ସୂଚନା ଦେଇଛନ୍ତି। ଅଶୋକନ୍ଙ୍କ ମତରେ ସ୍ବାସ୍ଥ୍ୟ ସେବା କ୍ଷେତ୍ରରେ ଯାହାକିଛି ନିବେଶ ହେଉଛି, ତାହା ପର୍ଯ୍ୟପ୍ତ ନୁହେଁ। ସେମାନେ ଏହି ସ୍ବାସ୍ଥ୍ୟସେବାରେ ମୋଟ ଘରୋଇ ଉତ୍ପାଦ (ଜିଡିପି)ର ପ୍ରାୟ ୩.୯% ଖର୍ଚ୍ଚ କରୁଛନ୍ତି। କେନ୍ଦ୍ର ଏବଂ ରାଜ୍ୟ ସରକାରମାନେ ନିଜ ନିଜ ଜିଡିପିର ୧.୧%ରୁ ୧.୩% ପର୍ଯ୍ୟନ୍ତ ବ୍ୟୟ କରୁଥିବାରୁ ଅଣ୍ଟୁନାହିଁ।
