କଣିହାଁ ,୩୦ା୩ (ଡି.ଏନ.ଏ.): ଅନୁଗୋଳ ଜିଲା କଣିହାଁ ବ୍ଲକସ୍ଥିତ ରେଙ୍ଗାଳି ଡ୍ୟାମ୍ କଲୋନୀ ଅଞ୍ଚଳ ଓ ବଜାରର ଆଲୋକୀକରଣ ସହ ରକ୍ଷଣାବେକ୍ଷଣ ଦାୟିତ୍ୱ ତୁଲାଉଥିବା ଓଡ଼ିଶା ଜଳ ବିଦ୍ୟୁତ୍ ନିଗମ ବା ଓଏଚ୍ପିସି ଏହି ଦାୟିତ୍ୱକୁ ଏକ ବିଦ୍ୟୁତ୍ ବଣ୍ଟନକାରୀ କମ୍ପାନୀକୁ ହସ୍ତାନ୍ତର କରିସାରିଛି। କିନ୍ତୁ ଓଏଚ୍ପିସିର ଏପରି କାର୍ଯ୍ୟକୁ ପ୍ରକଳ୍ପ ଅଞ୍ଚଳବାସୀ ନାପସନ୍ଦ କରିବା ସହ ଏହାକୁ ନେଇ ତୀବ୍ର ପ୍ରତିକ୍ରିୟା ପ୍ରକାଶ କରିଛନ୍ତି। ଓଏଚ୍ପିସି ଉକ୍ତ ବ୍ୟବସ୍ଥା ପରିଚାଳନା ନ କଲେ ଡ୍ୟାମ୍ ଅଞ୍ଚଳ ରାତିରେ ଅନ୍ଧକାର ମଧ୍ୟରେ ରହିବ ବୋଲି ସ୍ଥାନୀୟ ଲୋକେ ଆଶଙ୍କା କରିଛନ୍ତି।
ପ୍ରକାଶ ଯେ, ୧୯୭୩ ମସିହାରେ ରେଙ୍ଗାଳି ବହୁମୁଖୀ ନଦୀବନ୍ଧ ଯୋଜନାର ଶୁଭ ଦିଆଯାଇଥିଲା। ୧୯୭୫ରେ ଡ୍ୟାମ୍ ନିର୍ମାଣ କାର୍ଯ୍ୟ ଆରମ୍ଭ ହୋଇ ୧୯୮୫ରେ ଶେଷ ହୋଇଥିଲା। ପ୍ରଥମେ ପ୍ରକଳ୍ପର ସମସ୍ତ କଲୋନୀ, ବଜାର, ମନ୍ଦିର, ବସ୍ତି ଅଞ୍ଚଳର ଆଲୋକୀକରଣ, ରକ୍ଷଣାବେକ୍ଷଣ ଓ ଜଳ ଯୋଗାଣ ବ୍ୟବସ୍ଥା ଡ୍ୟାମ୍ କର୍ତ୍ତୃପକ୍ଷଙ୍କ ଦ୍ୱାରା କରାଯାଉଥିଲା। ହେଲେ ୧୯୯୬ ଏପ୍ରିଲ ୨୧ରେ ଡ୍ୟାମ୍ ଡିଭିଜନରୁ ଅଲଗା ହୋଇ ଓଏଚ୍ପିସି ଗଠନ ପରଠାରୁ ସମଗ୍ର ପ୍ରକଳ୍ପ ଅଞ୍ଚଳର ଆଲୋକୀକରଣ ଓ ରକ୍ଷଣାବେକ୍ଷଣ ଦାୟିତ୍ୱ ଓଏଚ୍ପିସି କରିଆସୁଥିଲା। କିନ୍ତୁ
ଏହି ଦାୟିତ୍ୱରୁ ଓହରିଯିବା ନେଇ ନିଷ୍ପତ୍ତି ହେବା ପରେ ଓଏଚ୍ପିସି ପକ୍ଷରୁ ରେଙ୍ଗାଳି ସରପଞ୍ଚ ପ୍ରଭାତୀ ସେଠୀଙ୍କୁ ଏକ ପତ୍ର ମାଧ୍ୟମରେ ଷ୍ଟ୍ରିଲ ଲାଇଟ୍ର ରକ୍ଷଣାବେକ୍ଷଣ ଓ ବିଲ୍ ପ୍ରଦାନ ଦାୟିତ୍ୱ ନେବା ପାଇଁ ଜଣାଇଥିଲା। କିନ୍ତୁ ଅର୍ଥର ଅଭାବ ଥିବାରୁ ସରପଞ୍ଚ ଓଏଚ୍ପିସି ପ୍ରସ୍ତାବରେ ରାଜି ହୋଇ ନ ଥିଲେ। ଇତିମଧ୍ୟରେ ଓଏଚ୍ପିସି ଏକ ବିଦ୍ୟୁତ୍ ବିତରଣ କମ୍ପାନୀକୁ ଉକ୍ତ ଦାୟିତ୍ୱ ହସ୍ତାନ୍ତର କରିସାରିଥିବାରୁ ଏବେ ପ୍ରକଳ୍ପ ଅଞ୍ଚଳରେ ଥିବା ଆଲୋକୀକରଣ ବ୍ୟବସ୍ଥାକୁ ନେଇ ସ୍ଥାନୀୟ ଲୋକେ ସନ୍ଦେହରେ ରହିଛନ୍ତି। ଆଗାମୀ ଦିନରେ ପ୍ରକଳ୍ପର କଲୋନୀ, ବଜାର ଆଦି ଅଞ୍ଚଳରେ ବିଦ୍ୟୁତ୍ ସେବା ଗଭୀର ଭାବେ ପ୍ରଭାବିତ ହେବ ବୋଲି ସେମାନେ ଆଶଙ୍କା ପ୍ରକାଶ କରିଛନ୍ତି। ଏପରି ହେଲେ ଡ୍ୟାମ୍ ଅଞ୍ଚଳରେ ରାତିରେ ଆପରାଧିକ କାର୍ଯ୍ୟକଳାପ ବୃଦ୍ଧି ପାଇବ ବୋଲି ଅଞ୍ଚଳବାସୀ କହିଛନ୍ତି।
ଦାବିପତ୍ର ପ୍ରଦାନ କରାଯାଇଛି
ଦୀର୍ଘବର୍ଷ ହେଲା ପ୍ରକଳ୍ପ ଅଞ୍ଚଳକୁ ଓଏଚ୍ପିସି ଆଲୋକୀକରଣ କରିଆସିଥିଲା। ହେଲେ ଅନ୍ୟ କମ୍ପାନୀ ଏହି ଦାୟିତ୍ୱ ନେଇଥିବାରୁ ବହୁ ଅସୁବିଧା ସୃଷ୍ଟି ହେବ। ଏ ଦିଗରେ ଦୃଷ୍ଟି ଦେବାକୁ ବଣିକ ସଂଘ ପକ୍ଷରୁ ଏକ ଦାବିପତ୍ର ଓଏଚ୍ପିସିକୁ ପ୍ରଦାନ କରାଯାଇଛି।
-ପବିତ୍ର ଘଡ଼ାଇ, ସଭାପତି, ରେଙ୍ଗାଳି ଲକ୍ଷ୍ମୀବଜାର ବଣିକ ସଂଘ
ପ୍ରକଳ୍ପ ଅଞ୍ଚଳ ଅନ୍ଧକାର ହେବନି
ରାଜ୍ୟ ସରକାରଙ୍କ ନିଷ୍ପତ୍ତି କ୍ରମେ ପ୍ରକଳ୍ପ ଅଞ୍ଚଳର ଦାୟିତ୍ୱ ଏକ ବିଦ୍ୟୁତ୍ ବିତରଣ କମ୍ପାନୀକୁ ହସ୍ତାନ୍ତର କରାଯାଇଛି। ଏ ନେଇ ସରପଞ୍ଚଙ୍କୁ ଜଣାଇଥିଲୁ। କିନ୍ତୁ ତାଙ୍କ ନିକଟରେ ଅର୍ଥ ନ ଥିବାରୁ ସେ ମନା କରିଦେଲେ। ଓଏଚ୍ପିସି ପକ୍ଷରୁ ଷ୍ଟ୍ରିଟ୍ ଲାଇଟ୍ ବାବଦ ବିଲ୍ ପ୍ରଦାନ କରାଯିବାକୁ ଥିବାରୁ ପ୍ରକଳ୍ପ ଅଞ୍ଚଳ ଅନ୍ଧକାର ହେବନାହିଁ।
-ରୁଦ୍ରମୋହନ ନାୟକ, ବରିଷ୍ଠ ପରିଚାଳକ, ଓଏଚ୍ପିସି
