ଭାରତୀୟ ସଂସ୍କୃତିରେ ପାନର ଗୁରୁତ୍ୱ ରହିଛି। ପ୍ରତ୍ୟେକ ମାଙ୍ଗଳକ କାର୍ଯ୍ୟରେ ପ୍ରଥମେ ଖୋଜାପଡ଼େ ପାନ। ପାନ ନ ଥିଲେ ପୂଜା ଯେମିତି ଅଧୁରା। ସେହିପରି ଭାରତରେ ଅନେକ ପାନପ୍ରିୟ ଲୋକ ଅଛନ୍ତି। ସେଥିପାଇଁ ଦୋକାନ ବଜାରରୁ କିଣି କି ହେଉ କି ଘରେ ପାନ ଖାଇଥାନ୍ତି। ତେବେ ପାନ ଖାଉଥିବା ଲୋକଙ୍କ ପାଇଁ ଏବେ ଖୁସି ଖବର। ଭାରତର ପୁଣେରେ ପାନର ଏକ ଏଟିଏମ୍ ଖୋଲାଯାଇଛି। ଯେଉଁଠାରେ ୨୪ ଘଣ୍ଟା ପର୍ଯ୍ୟନ୍ତ ସେବା ମିଳିପାରିବ।
ପାନ ଖାଉଥିବା ଲୋକଙ୍କ ପାଇଁ ଏହି ମେଶିନ ବ୍ୟବସ୍ଥା କରାଯାଇଛି। ଏହାର ନାମ ରହିଛି ‘ସୌକିନ’। ଦୋକାନ ମାଲିକଙ୍କ କହିବା କଥା, ‘ଭାରତର ଏହା ପ୍ରଥମ ଅଟୋମେଟିକ୍ ପାନ ମେଶିନ’। ଏହି ମେଶିନରୁ ମନ ପସନ୍ଦର ପାନ ବାହାର କରିବା ପାଇଁ ମେଶିନରେ ଲଗାଯାଇଥିବା ବାର୍ କୋଡ୍ରେ ସ୍କାନ୍ କରିବାକୁ ପଡ଼ିବ। ଇଣ୍ଟରଫେସ୍ରେ ଆପଣଙ୍କ ଫୋନ୍ରେ ଉପଲବ୍ଧ ପାନର ଲିଷ୍ଟ ଆସିବ। ଏହା ପରେ ଅନ୍ଲାଇନ୍ ପେମେଣ୍ଟ କରିବା ପରେ ଏକ ଛୋଟ ବାକ୍ସରେ ସଫା ସୁତରା ପ୍ୟାକେଟ ହୋଇ ପାନ ବାହାରକୁ ଆସିବ। ଏହି ମେଶିନରୁ ପାନ ବ୍ୟତୀତ ଗ୍ରାହକ ଚକୋଲେଟ୍, ଆଇସକ୍ରିମ୍, ଡ୍ରାଏ ଫ୍ରୁଟ୍, ମସଲା ଆଦି ଫ୍ଲେଭରର ପାନ ବାହାର କରିପାରିବେ।
ମହାରାଷ୍ଟ୍ରରେ ଲଗାତର କରୋନା ସଂକ୍ରମଣ ବଢୁଥିବାରୁ ପୁଣେରେ ଏହି ମେଶିନ ଗୁରୁବାର ରାତିରେ ଲଗାଯାଇଛି। ଏପରି ମେଶିନ ଲଗାଯିବା ପଛରେ ୫୧ ବର୍ଷୀୟ ଶରତ ମୋରେଙ୍କ ହାତ ରହିଛି। ଶରତଙ୍କ ଦୋକାନରେ ୫ଟଙ୍କାରୁ ଆରମ୍ଭ କରି ୧୦୦୦ ଟଙ୍କା ପର୍ଯ୍ୟନ୍ତ ପାନ ରହିଛି। ଏପରି ମେଶିନ ଲଗାଇବା ପାଇଁ ଶରତଙ୍କ ମୁଣ୍ଡକୁ ୧୦ ବର୍ଷ ତଳେ ବୁଦ୍ଧି ଆସିଥିଲା। ଯାହା ବର୍ତ୍ତମାନ ସଫଳ ହୋଇଛି। ସେ ଏଥିରେ ୩-୪ ଲକ୍ଷ ଟଙ୍କା ଖର୍ଚ୍ଚ କରିଛନ୍ତି। କରୋନା ମହାମାରୀ ସମୟରେ ଏହା ସଫଳ ହୋଇଥିବା ଶରତ କହିଛନ୍ତି।
