ପ୍ରତିଭା ବେଶି ଦିନ ପର୍ଯ୍ୟନ୍ତ ଲୁଚି ରହେ ନାହିଁ। କେବେ ନା କେବେ ଏହା ପ୍ରସ୍ଫୁଟିତ ହୋଇଥାଏ। ସେମିତି ଏକ ପ୍ରତିଭା ଦେଖିବାକୁ ମିଳିଛି ଜଣେ ଅଟୋ ଡ୍ରାଇଭରଙ୍କଠାରେ। ଅଟୋ ଡ୍ରାଇଭର ଜଣଙ୍କ ଏମିତି ଡ୍ୟାନ୍ସ କଲେ ଯେ, ତାଙ୍କ ଭିଡିଓ ସୋସିଆଲ ମିଡିଆରେ ଖୁବ୍ ଭାଇରାଲ ହେଲା। ଏହା ପରେ ରାତାରାତି ତାଙ୍କ ଭାଗ୍ୟ ବଦଳିଗଲା।
ଭାଇରାଲ ହୋଇଥିବା ଭିଡିଓରେ ଅଟୋ ଚାଳକ ଜଣକ ମହାରାଷ୍ଟ୍ରର ମହିଳାମାନଙ୍କ ଦ୍ୱାରା କରାଯାଉଥିବା ପାରମ୍ପରିକ ଲୋକନୃତ୍ୟ ‘ଲାବଣୀ’ କରୁଥିବା ନଜର ଆସିଛନ୍ତି। ଅନ୍ୟ ଡ୍ରାଇଭରମାନେ ପାଖରେ ଠିଆ ହୋଇ ତାଳି ବଜାଇ ତାଙ୍କୁ ଉତ୍ସାହିତ କରୁଥିବା ଦେଖିବାକୁ ମିଳିଛି।
लावणी सम्राज्ञी ला लाजवेल असे नृत्य पाहिले आहे का कधी..?
Atrist Unknown.. pic.twitter.com/ZRm2REZuH1
— Dayanand Kamble (@dayakamPR) March 12, 2021
ମହାରାଷ୍ଟ୍ରର ଡେପୁଟୀ ଡାଇରେକ୍ଟର ଦୟାନନ୍ଦ କାମ୍ବଲେ ଏହି ଭିଡିଓକୁ ତାଙ୍କ ଟୁଇଟର ଆକାଉଣ୍ଟରେ ଶେୟାର କରିଛନ୍ତି। ଏଥିରେ ସେ କ୍ୟାପଶନ ଲେଖିଛନ୍ତି, ଆପଣ କେବେ ଏମିତି ଡାନ୍ସ ଦେଖିବେ ତ ଲାବଣୀ ସମାଜ ଲାଜେଇ ଯିବେ।
୪୫ ବର୍ଷୀୟ ବାବାଜୀ କାମ୍ବଲେ ଗତ କିଛି ବର୍ଷ ଧରି ବାରାମତୀ ସହରରେ ଅଟୋ ଚଳାଇ ଆସୁଛନ୍ତି। ତାଙ୍କ ପରିବାର କହିଲେ ସ୍ତ୍ରୀ ଏବଂ ଦୁଇ ପୁଅ। ବଡ଼ ପୁଅ ଦଶମରେ ପଢୁଥିବା ବେଳେ ସାନ ସପ୍ତମରେ ପଢୁଛି।
କରୋନା ଯୋଗୁ ବାବାଜୀଙ୍କ ଅଟୋ ବେପାର ମାନ୍ଦା ହୋଇପଡ଼ିଛି। ଏଥିରୁ ଟିକେ ସମୟ ପାଇବାରୁ ସେ ‘ଲାବଣୀ’ ଡ୍ୟାନ୍ସ କରି ଲୋକଙ୍କ ମନୋରଞ୍ଜନ କରୁଥିଲେ। ଏହି ଡ୍ୟାନ୍ସର ଭିଡିଓକୁ କେହି ଶୁଟିଂ କରି ସୋସିଆଲ ମିଡିଆରେ ପୋଷ୍ଟ କରିଦେଇଥିଲେ। ଚାହୁଁଚାହଁୁ ଭିଡିଓଟି ଭାଇରାଲ ହୋଇଗଲା। ଏଥିସହିତ ବାବାଜୀଙ୍କ ଭାଗ୍ୟ ବଦଳିଗଲା। ତାଙ୍କ ପ୍ରତିଭାରେ ପ୍ରଭାବିତ ହୋଇ ଫିଲ୍ମ ନିର୍ଦ୍ଦେଶକ ଘନଶ୍ୟାମ ୟେଡେ ତାଙ୍କୁ ଦୁଇଟି ମରାଠୀ ଫିଲ୍ମ ‘ଚଲ୍ ରେ ଫୌଜୀ’ ଏବଂ ‘କବଚ’ରେ କାମ କରିବାକୁ ଅଫର ଦେଇଛନ୍ତି।
ଏହା ପରେ ବାବାଜୀ କହିଛନ୍ତି, ମଁୁ କେବେ ସ୍ବପ୍ନରେ ଭାବି ନ ଥିଲି ମୋ ଭାଗ୍ୟ ଦିନେ ଏମିତି ବଦଳିଯିବ। ବର୍ତ୍ତମାନ ତାଙ୍କୁ ସବୁ ଲୋକ ଚିହ୍ନିବେ। ବାବାଜୀଙ୍କୁ ତାଙ୍କ ବନ୍ଧୁବାନ୍ଧବ, ସମ୍ପର୍କୀୟମାନେ ଶୁଭେଚ୍ଛା ଜଣାଇଛନ୍ତି। ବାବାଜୀ ଅଭିନେତା କମଲ ହାସନଙ୍କ ଜଣେ ବଡ଼ ପ୍ରଶଂସକ। କମଲଙ୍କ ନୃତ୍ୟ ବାବାଜୀଙ୍କୁ ବେଶ୍ ପ୍ରଭାବିତ କରିଥିଲା।
