ମେଲବୋର୍ନ, ୨୧ା୭ (ପି.ଟି.)-ଅଷ୍ଟ୍ରେଲିଆ କ୍ରିକେଟ ଦଳର ପ୍ରସ୍ତାବିତ ଇଂଲଣ୍ଡ ଟୁର୍ ସେପ୍ଟେମ୍ବର ୪ରୁ ଆରମ୍ଭ ହେବ। ଏକ ଦୈନିକ ଖବରକାଗଜ ରିପୋର୍ଟରେ ଏହା ପ୍ରକାଶ ପାଇଛି। ମ୍ୟାଚଗୁଡ଼ିକର ଜୈବ ସୁରକ୍ଷିତ ପରିବେଶ ମଧ୍ୟରେ ଖେଳାଯିବ। ରିପୋର୍ଟ ଅନୁସାରେ ଏହି ଟୁର୍ର ଆରମ୍ଭରେ ସେପ୍ଟେମ୍ବର ୪,୬ ଓ ୮ରେ ତିନୋଟି ଅନ୍ତର୍ଜାତୀୟ ଟି୨୦ ଖେଳାଯିବ। ପରେ ସେପ୍ଟେମ୍ବର ୧୦, ୧୨ ଓ ୧୫ ତାରିଖରେ ତିନୋଟି ଅନ୍ତର୍ଜାତୀୟ ଦିନିକିଆ ମ୍ୟାଚ ହେବ। ଅଷ୍ଟ୍ରେଲିଆ ଦଳ ଏକ ଘରୋଇ ଜେଟ୍ ବିମାନରେ ୟୁନାଇଟେଡ୍ କିଙ୍ଗଡମ୍ (ୟୁକେ) ଯିବ। ସମସ୍ତ ୬ଟି ଯାକ ମ୍ୟାଚ ସାଉଥାମ୍ପଟନ ଏବଂ ମାଞ୍ଚେଷ୍ଟରର ଓଲ୍ଡଟ୍ରାଫୋର୍ଡଠାରେ ଖେଳାଯିବ। ଉଭୟ ସାଉଥାମ୍ପଟନ ଏବଂ ମାଞ୍ଚେଷ୍ଟରରେ ରହିଥିବା ଭେନ୍ୟୁ ସହ ହୋଟେଲ ସଂଯୁକ୍ତ ରହିଛି। ଦୁଇ ଦଳର ଖେଳାଳି ଓ ମ୍ୟାଚ ଅଫିସିଆଲ ଏବଂ ବ୍ରଡକାଷ୍ଟରମାନଙ୍କ ରହଣିରେ ସୁବିଧା ରହିଛି। ଏହି ଦୁଇଟି ଗ୍ରାଉଣ୍ଡରେ ବର୍ତ୍ତମାନ ଇଂଲଣ୍ଡ-ଓ୍ବେଷ୍ଟଇଣ୍ଡିଜ ସିରିଜ ଖେଳାଯାଉଛି। କରୋନା ଭାଇରସ୍ ମହାମାରୀ ଯୋଗୁ କିଛି ମାସ କ୍ରୀଡ଼ା କାର୍ଯ୍ୟକଳାପକୁ ସ୍ଥଗିତ ଅବା ବାତିଲ ନିଷ୍ପତ୍ତି ପରେ ପ୍ରଥମ ଥର ଅନ୍ତର୍ଜାତୀୟ କ୍ରିକେଟ ଆରମ୍ଭ ହୋଇଛି। ଓ୍ବେଷ୍ଟଇଣ୍ଡିଜ ବିପକ୍ଷ ସିରିଜ ଶେଷ ହେବା ପରେ ଘରୋଇ ଦଳ ପାକିସ୍ତାନ ବିପକ୍ଷ ସିରିଜ ଖେଳିବ। ଅଷ୍ଟ୍ରେଲିଆର ଚୟନକର୍ତ୍ତାମାନେ ଗତ ସପ୍ତାହରେ ୨୬ ଜଣିଆ ସମ୍ଭାବ୍ୟ ଖେଳାଳି ତାଲିକା ପ୍ରସ୍ତୁତ କରିଛନ୍ତି। ଏଥିରୁ ଟୁର୍ ପାଇଁ ଚୂଡ଼ାନ୍ତ ଦଳ ମନୋନୟନ ହେବ।
