ଦୁବାଇ,୩।୧୨(ପି.ଟି.): ସଦ୍ୟ ପ୍ରକାଶିତ ଅନ୍ତର୍ଜାତୀୟ କ୍ରିକେଟ କାଉନସିଲ (ଆଇସିସି) ବିଶ୍ୱକପ୍ ସୁପର ଦିନିକିଆ ଲିଗ୍ ପଏଣ୍ଟ ତାଲିକାରେ ଅଷ୍ଟ୍ରେଲିଆ ଶୀର୍ଷ ସ୍ଥାନ ଅଧିକାର କରିଛି। ସଦ୍ୟ ସମାପ୍ତ ଭାରତ ବିପକ୍ଷ ଦିନିକିଆ ସିରିଜରେ ୨-୧ରେ ବିଜୟୀ ହୋଇ ଅଷ୍ଟ୍ରେଲିଆ ଏହି ସଫଳତା ପାଇଛି। ତେବେ ଭାରତକୁ ଷଷ୍ଠ ସ୍ଥାନରେ ସନ୍ତୁଷ୍ଟ ହେବାକୁ ପଡିଛି।
ଏହି ସିରିଜ ବିଜୟ ସହ ଅଷ୍ଟ୍ରେଲିଆ ୪୦ ପଏଣ୍ଟ ହାସଲ କରି ଇଂଲଣ୍ଡକୁ ପଛରେ ପକାଇଛି। ଇଂଲଣ୍ଡ ଦ୍ୱିତୀୟ ସ୍ଥାନରେ ରହିଛି। ଅପରପକ୍ଷରେ ଅନ୍ତିମ ଦିନିକିଆ ଜିତି ଭାରତ ଟୁର୍ନାମେଣ୍ଟରେ ତା’ର ପ୍ରଥମ ପଏଣ୍ଟ ଜିତି ମୋଟ ୯ ପଏଣ୍ଟ ହାସଲ କରି ଷଷ୍ଠ ସ୍ଥାନରେ ରହିଛି।
ଅଷ୍ଟ୍ରେଲିଆ ପୂର୍ବରୁ ୧୩ ଦଳ ବିଶିଷ୍ଟ ଦିନିକିଆ ଚାମ୍ପିୟନଶିପ୍ର ସିରିଜରେ ଇଂଲଣ୍ଡକୁ ୨-୧ରେ ପରାସ୍ତ କରିଥିଲା। ଦିନିକିଆ ଫର୍ମାଟରେ ସଂସ୍କାର ଆଣିବା ପାଇଁ ଚଳିତ ବର୍ଷ ଏହି ଚାମ୍ପିୟନଶିପ୍ ଆରମ୍ଭ କରାଯାଇଛି। ଚାମ୍ପିୟନଶିପ୍ର ଶ୍ରେଷ୍ଠ ୭ଟି ଦଳ ଆଇସିସି ପୁରୁଷ ଦିନିକିଆ ବିଶ୍ୱକପ୍ ଖେଳିବାକୁ ସିଧାସଳଖ ଯୋଗ୍ୟତା ହାସଲ କରିବେ। ଆସନ୍ତା ୨୦୨୩ ବିଶ୍ୱକପ୍ ଭାରତରେ ଆୟୋଜନ ହେବ। ତେଣୁ ଆୟୋଜକ ଭାବେ ଭାରତ ଯୋଗ୍ୟତା ହାସଲ କରିବା ସ୍ବାଭାବିକ। ବିଶ୍ୱ ଚାମ୍ପିୟନ ଇଂଲଣ୍ଡ ଆୟର୍ଲାଣ୍ଡକୁ ୨-୧ରେ ପରାସ୍ତ କରିବା ପରେ ୩୦ ପଏଣ୍ଟ ହାସଲ କରିଛି। ଏହି ଚାମ୍ପିୟନଶିପ୍ର ପ୍ରାରମ୍ଭିକ ସିରିଜ ଥିଲା। ଏହାପରେ ଅବଶ୍ୟ ଇଂଲଣ୍ଡ ୨-୧ରେ ଅଷ୍ଟ୍ରେଲିଆଠାରୁ ପରାସ୍ତ ହୋଇଥିଲା। ଅନ୍ୟପଟେ ଜିମ୍ବାଓ୍ବେକୁ ପାକିସ୍ତାନ ୨-୧ ପରାସ୍ତ କରିବା ପରେ ୨୦ ପଏଣ୍ଟ ହାସଲ କରିଛି। ସେହିପରି ଅନ୍ତିମ ଦିନିକିଆରେ ପାକିସ୍ତାନକୁ ସୁପର ଓଭରରେ ପରାସ୍ତ କରିବା ପରେ ଜିମ୍ବାଓ୍ବେ ୧୦ ପଏଣ୍ଟ ହାସଲ କରିଛି।
