କେନ୍ଦୁଝର,୨୦ା୬(ସ୍ବ.ପ୍ର.): କେନ୍ଦୁଝର ଜିଲା ନୟାକୋର୍ଟ ଥାନା ଅଞ୍ଚଳରେ ରଜ ପୋଷାକ ପାଇଁ ମା’ଙ୍କୁ ହତ୍ୟା କରିଥିବା ନାବାଳକ ପୁଅଙ୍କୁ ରବିବାର ରାଉରକେଲାସ୍ଥିତ ବାଳାଶ୍ରମକୁ ନିଆଯାଉଥିବା ବେଳେ ଲହୁଣୀପଡ଼ା ନିକଟରେ ସେ ଚମ୍ପଟ ମାରିଥିଲେ। କିଛି ସମୟରେ ପରେ ତାଙ୍କୁ ପୁଣି କାବୁ କରାଯାଇଥିବା ସୂଚନା ମିଳିଛି। ଏସ୍ଡିପିଓ ପି. ଜେ. ଟପ୍ପୋ କହିଛନ୍ତି, ନାବାଳକଙ୍କୁ ନୟାକୋର୍ଟ ଥାନାରୁ ଅଣାଯାଇ ରବିବାର କେନ୍ଦୁଝର ଜୁଭେନାଇଲ ଜଷ୍ଟିସ୍ ବୋର୍ଡରେ ହାଜର କରାଯିବା ପରେ ରାଉରକେଲାସ୍ଥିତ ବାଳାଶ୍ରମକୁ ନିଆଯାଉଥିଲା। ଲହୁଣୀପଡା ନିକଟରେ ସମସ୍ତେ ଖାଇବା ଲାଗି ଏକ ଢ଼ାବା ନିକଟରେ ଅଟକିଥିଲେ। ଉକ୍ତ ନାବାଳକ ପରିସ୍ରା ଯିବା ବାହାନାରେ ପୋଲିସକୁ ଚକ୍ମା ଦେଇ ଫେରାର ଉଦ୍ୟମ କରିଥିଲେ। ତାଙ୍କୁ ଧରାଯାଇ ସୁରକ୍ଷିତ ଭାବେ ବାଳାଶ୍ରମକୁ ନିଆଯାଇଛି। ଉଲ୍ଲେଖଯୋଗ୍ୟ, ବାଂଶପାଳ ବ୍ଲକ ଉପରବରଡା ଗ୍ରାମର ମୁଗ ସାଆନ୍ତ ତାଙ୍କ ସ୍ବାମୀଙ୍କ ମୃତ୍ୟୁ ପରେ ଦୁଇ ପୁଅ ସହିତ ରହୁଥିଲେ। ବଡ଼ ପୁଅ ପଞ୍ଚମ ଶ୍ରେଣୀରେ ଓ ସାନ ପୁଅ ତୃତୀୟ ଶ୍ରେଣୀରେ ପଢୁଥିଲେ। ରଜରେ ସମସ୍ତେ ନୂଆ ପୋଷାକ ପିନ୍ଧିଥିବାରୁ ବଡପୁଅ ମା’ ସହ ଝଗଡା କରିଥିଲେ। ଗରିବ ମା’ ତାର ଇଛା ପୂରଣ କରିବାକୁ ଅସାମର୍ଥ୍ୟ ପ୍ରକାଶ କରିବାରୁ ମା’ ଓ ପୁଅ ମଧ୍ୟରେ ବଚସା ଉଗ୍ରରୂପ ଧାରଣ କରିଥିଲା। ଶେଷରେ ଉତ୍କ୍ଷିପ୍ତ ହୋଇ ବଡପୁଅ ଏକ ଟାଙ୍ଗିଆରେ ହାଣି ମା’ଙ୍କୁ ହତ୍ୟା କରିଥିଲେ। ଏନେଇ ଏକ ହତ୍ୟା ମାମଲା(ନଂ.୪୮/ ୨୦୨୨) ରୁଜୁ କରାଯାଇ ତଦନ୍ତ ଚାଲୁରହିଛି।
