ରାୟଗଡ଼ା ଅଫିସ/ଟିକିରି,୪।୯(ଡି.ଏନ୍.ଏ.): ଏକତରଫା ପ୍ରେମକୁ ନେଇ ରାୟଗଡ଼ା ଜିଲା ଟିକିରି ଥାନା ଅଧୀନ ଉଷାପଡ଼ା ଗ୍ରାମରେ ଶନିବାର ଅପରାହ୍ନରେ ଏକ ଅଭାବନୀୟ ଘଟଣା ଘଟିଯାଇଛି। ବାରମ୍ବାର ପ୍ରେମ ନିବେଦନ କରି ବିଫଳ ପ୍ରେମିକ ନାବାଳିକା ପ୍ରେମିକାଙ୍କ ଗଳାକାଟି ହତ୍ୟା କରିବା ସହ ନିଜେ ଆତ୍ମହତ୍ୟା ଉଦ୍ୟମ କରିଛନ୍ତି। ମୃତ ନାବାଳିକା ହେଲେ ଟିକିରି ଥାନା ଅଧୀନ ସାନମାଟିକଣା ଗ୍ରାମର ଦୁର୍ଯ୍ୟ ମାଝିଙ୍କ ଝିଅ ରିମା(୧୭) ଏବଂ ଗୁରୁତର ଯୁବକ ମୁଣ୍ଡାଗାଁର ରସିକ ପ୍ରଧାନ(୩୫)। ରସିକଙ୍କୁ ରାୟଗଡ଼ା ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି।
ସୂଚନା ଅନୁଯାୟୀ, ରିମା ଉଷାପଡ଼ାଠାରେ ଶ୍ରମିକ ଭାବେ ଏକ ବେସରକାରୀ ନିର୍ମାଣ କାମରେ ନିୟୋଜିତ ଥିଲେ। ଦିନ ଗୋଟାଏ ବେଳେ ମଧ୍ୟାହ୍ନଭୋଜନ ସାରି ନିର୍ମାଣସ୍ଥଳ ନିକଟରେ ବିଶ୍ରାମ ନେଉଥିବା ବେଳେ ରସିକ ସେଠାରେ ପହଞ୍ଚି ପୁଣି ପ୍ରେମ ନିବେଦନ କରିଥିଲେ। ଏହାକୁ ପ୍ରତ୍ୟାଖ୍ୟାନ କରିବାରୁ ଉତ୍ତ୍ୟକ୍ତ ହୋଇ ରସିକ ରିମାଙ୍କୁ ଛୁରିରେ ତଣ୍ଟିକୁ ଆକ୍ରମଣ କରିଥିଲେ। ଏହାପରେ ନିଜେ ମଧ୍ୟ ଆତ୍ମହତ୍ୟା ଉଦ୍ୟମ କରିଥିଲେ। ନିକଟରେ ଥିବା ରିମାଙ୍କ ସାଙ୍ଗ ଅଟକାଇବାକୁ ଚେଷ୍ଟାକରି ବିଫଳ ହୋଇଥିଲେ। ରିମାଙ୍କର ଘଟଣାସ୍ଥଳରେ ମୃତ୍ୟୁ ଘଟିଥିଲା। ସେହିପରି ରିମାଙ୍କ ସାଙ୍ଗଙ୍କ ହାତରେ ଗଭୀର ଆଘାତ ଲାଗିଥିବାରୁ ତାଙ୍କୁ ସ୍ଥାନୀୟ ଡାକ୍ତରଖାନାରେ ଭର୍ତ୍ତି କରାଯାଇଛି। ଟିକିରି ପୋଲିସ ପହଞ୍ଚି ରିମାଙ୍କ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଛି। ଏ ନେଇ ଥାନାରେ ୧୨୦/୨୨ ରେ ଏକ ମାମଲା ରୁଜୁ କରାଯାଇ ତଦନ୍ତ ଚାଲିଥିବା ଟିକିରି ଥାନା ଇନ୍ସପେକ୍ଟର ଦେବଦତ୍ତ ମଲ୍ଲିକ ସୂଚନା ଦେଇଛନ୍ତି। ଅନ୍ୟପକ୍ଷରେ ରସିକ ବିବାହିତ ବୋଲି ଜଣାପଡ଼ିଛି। ସ୍ତ୍ରୀଙ୍କ ମୃତ୍ୟୁ ହୋଇଥିବାବେଳେ ତାଙ୍କର ୩ ସନ୍ତାନ ରହିଛନ୍ତି। ମୁଣ୍ଡାଗାଁ ଗ୍ରାମ ଲୋକଙ୍କ କହିବା ହେଲା, ନାବାଳିକା ଏବଂ ଯୁବକ ମଧ୍ୟରେ ପ୍ରେମ ସମ୍ପର୍କ ଥିଲା। ତେବେ ହଠାତ ଏଭଳି ଘଟଣା କାହିଁକି ଘଟିଲା ତାହା ସମସ୍ତଙ୍କୁ ଆଶ୍ଚର୍ଯ୍ୟ କରିଛି।
