ଭୁବନେଶ୍ୱର,୨୬।୧୨(ବ୍ୟୁରୋ):ଖବରଦାତାଙ୍କୁ ହତ୍ୟା ଉଦ୍ୟମ ଓ ଆକ୍ରମଣ କରି ଲୁଟ କରିବା ଅଭିଯୋଗରେ ଭରତପୁର ଥାନା ପୋଲିସ ୨ଜଣଙ୍କୁ ଗିରଫ କରି ରବିବାର କୋର୍ଟ ଚାଲାଣ କରିଛି। ସେମାନେ ହେଲେ ବରମୁଣ୍ଡା ଅଞ୍ଚଳର ସୁନିଲ ସ୍ବାଇଁ ଓ କବି ପ୍ରସାଦ ମହାନ୍ତି। ସେହିପରି ଘଟଣାରେ ସଂପୃକ୍ତ ଅନ୍ୟ ଜଣେ ଅଭିଯୁକ୍ତ କମଳା ଫେରାର ଥିବା ଜଣାପଡ଼ିଛି। ସୂଚନାନୁଯାୟୀ, ଅଭିଯୋଗକାରୀ ସମ୍ବିତ ବେହେରା ଏକ ଗଣମାଧ୍ୟମରେ ଖବରଦାତା ଭାବେ କାମ କରନ୍ତି। ଶନିବାର ରାତିରେ ସେ ଡିୟୁଟି ସାରି ରୁମକୁ ଫେରୁଥିବା ବେଳେ ଫାୟାରଷ୍ଟେଶନ ଛକ ନିକଟରେ ଅଭିଯୁକ୍ତଦ୍ୱୟ ତାଙ୍କୁ ରାସ୍ତାରେ ଅଟକାଇବା ସହିତ ହଇରାଣ କରିଥିଲେ। ତାଙ୍କ ତଣ୍ଟି ଚିପି ଜୀବନରୁ ମାରିଦେବା ଲାଗି ଉଦ୍ୟମ କରିବାରୁ ଉଭୟଙ୍କ ମଧ୍ୟରେ ଯୁକ୍ତିତର୍କ ହେବା ସହ ଠେଲାପେଲା ହୋଇଥିଲା। ଏହି ସମୟରେ ସେମାନେ ସମ୍ବିତଙ୍କ ପକେଟରୁ ମନିପର୍ସକୁ କାଢି ନେଇଯାଇଥିଲେ। ପରେ ଏନେଇ ସମ୍ବିତ ଭରତପୁର ଥାନାରେ ଅଭିଯୋଗ କରିଥିଲେ।
