ଜେରୁଜେଲମ୍ ,୮।୧ : ଗାଜାଷ୍ଟ୍ରିପ୍ରେ ହମାସ୍ ଆତଙ୍କବାଦୀଙ୍କ ବିରୋଧରେ ଇସ୍ରାଏଲ୍ର ଆକ୍ରମଣ ରବିବାର ଚତୁର୍ଥ ମାସରେ ପ୍ରବେଶ କରିଛି। ଗତ ୩ ମାସର ଆକ୍ରମଣରେ ଗାଜାର ପାଖାପାଖି ୨୩ ହଜାର ଲୋକଙ୍କ ମୃତ୍ୟୁ ଘଟିଥିବାବେଳେ ୫୮ ହଜାର ଆହତ ହୋଇଛନ୍ତି। ବ୍ୟାପକ ଅଞ୍ଚଳ ଧ୍ୱଂସସ୍ତୂପରେ ପରିଣତ ହୋଇଛି। ୮୫ ପ୍ରତିଶତରୁ ଊର୍ଦ୍ଧ୍ୱ ଲୋକ ଘରଦ୍ୱାର ଛାଡ଼ି ପଳାଇଗଲେଣି। ଇତିମଧ୍ୟରେ ହମାସ୍ର ସାମରିକ ଭିତ୍ତିଭୂମି ସମ୍ପୂର୍ଣ୍ଣ ଧ୍ୱଂସ ହୋଇସାରିଥିବାରୁ ଉତ୍ତର ଗାଜାରେ ବଡ଼ ଆକ୍ରମଣ ବନ୍ଦ କରିବାକୁ ଇସ୍ରାଏଲ୍ ସେନା ସଙ୍କେତ ଦେଇଛି। ତେବେ ସେଠାରେ ମୁତୟନ ଥିବା ସୈନ୍ୟଙ୍କୁ ହ୍ରାସ କରାଯାଇ ନାହିଁ। ଇସ୍ରାଏଲ୍ ସୈନ୍ୟ ସଫଳତା ହାସଲ ଜାରି ରଖିବେ। ଇସ୍ରାଏଲ୍-ଗାଜା ସୀମାନ୍ତରେ ପ୍ରତିରକ୍ଷା ବ୍ୟବସ୍ଥାକୁ ଅଧିକ ଦୃଢ଼ କରାଯିବା ସହ କେନ୍ଦ୍ରୀୟ ଓ ଦକ୍ଷିଣ ଭାଗ ଉପରେ ଅଧିକ ଫୋକସ୍ କରାଯିବ ବୋଲି ଇସ୍ରାଏଲ୍ ସେନା ମୁଖପାତ୍ର ଡାନିଏଲ୍ ହଗାରି କହିଛନ୍ତି।
ଆମେରିକା ପରରାଷ୍ଟ୍ର ସଚିବ ଆଣ୍ଟୋନି ବ୍ଲିଙ୍କେନ୍ଙ୍କ ଇସ୍ରାଏଲ୍ ଗସ୍ତ ପୂର୍ବରୁ ଏଭଳି ଘୋଷଣା କରାଯାଇଛି। ଗାଜା ଉପରେ ଆକାଶ ମାର୍ଗରୁ ଏବଂ ସ୍ଥଳପଥରେ ଆକ୍ରମଣକୁ ବନ୍ଦ କରିବା ପାଇଁ ଜୋ ବାଇଡେନ୍ ପ୍ରଶାସନ ବାରମ୍ବାର ଆହ୍ବାନ ଦେଇଆସୁଛି। ପାଲେଷ୍ଟିନୀୟ ନାଗରିକମାନଙ୍କର କ୍ଷତି ନ କରି କେବଳ ହମାସ୍ ନେତାମାନଙ୍କ ଉପରେ ଟାର୍ଗେଟ ଆକ୍ରମଣ ବଢ଼ାଇବାକୁ ଆମେରିକା ପରାମର୍ଶ ଦେଇଥିଲା। ନିକଟରେ ଉତ୍ତର ଗାଜାରେ ସାମରିକ କାର୍ଯ୍ୟାନୁଷ୍ଠାନକୁ ଇସ୍ରାଏଲ୍ ହ୍ରାସ କରିବା ସହ ଦକ୍ଷିଣ ଗାଜା ଉପରେ ଅଧିକ ଆକ୍ରମଣ ଜାରି ରଖିଥିଲା।
ଗତବର୍ଷ ଅକ୍ଟୋବର ୭ରେ ହମାସ୍ ଆତଙ୍କବାଦୀମାନେ ଇସ୍ରାଏଲ୍ର ଦକ୍ଷିଣ ପାର୍ଶ୍ୱରେ ଅଚାନକ ଆକ୍ରମଣ କରି ୧,୨୦୦ ଲୋକଙ୍କୁ ମାରିବା ସହ ୨୫୦ ଜଣଙ୍କୁ ପଣବନ୍ଦୀ କରି ନେଇଯାଇଥିଲେ। ଏହାର ଜବାବରେ ଇସ୍ରାଏଲ୍ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁ ହମାସ୍ ବିରୋଧରେ ଯୁଦ୍ଧ ଘୋଷଣା କରିଥିଲେ। ଯୁଦ୍ଧ ବନ୍ଦ ଲାଗି ଅନ୍ତର୍ଜାତୀୟ ସ୍ତରରେ ଚାପ ବଢ଼ୁଥିବା ସତ୍ତ୍ୱେ ହମାସ ଆତଙ୍କବାଦୀ ମୂଳପୋଛ ନ ହେବା ପର୍ଯ୍ୟନ୍ତ ଆକ୍ରମଣ ଜାରି ରହିବ ବୋଲି ନେତାନ୍ୟାହୁ କହିଥିଲେ। ଶନିବାର ଖାନ୍ ୟୁନିସ୍ ସହରରେ ଇସ୍ରାଏଲ୍ ସୈନ୍ୟଙ୍କ ଆକ୍ରମଣରେ ୧୨ ଶିଶୁଙ୍କ ସମେତ ୧୮ ଜଣଙ୍କ ମୃତ୍ୟୁ ଘଟିଥିବାବେଳେ ଶରଣାର୍ଥୀ ଶିବିରର ୫୦ରୁ ଊର୍ଦ୍ଧ୍ୱ ଆହତ ହୋଇଥିଲେ। ରବିବାର ରାଫାହ ସହରରେ ଏୟାରଷ୍ଟ୍ରାଇକ୍ ଫଳରେ ୨ ଖବରଦାତା ନିହତ ହୋଇଛନ୍ତି। ସେମାନଙ୍କ ମଧ୍ୟରେ ଅଲ୍ ଜଜିରାର ମୁଖ୍ୟ ସାମ୍ବାଦିକ ଓ୍ବାଏଲ୍ ଡାହଡୋଉଙ୍କ ପୁଅ ହମ୍ଜା ରହିଛନ୍ତି। ଗତ ଅକ୍ଟୋବର ୨୬ ଏୟାର ଷ୍ଟ୍ରାଇକ୍ରେ ଡାହଡୋଉ ପୂର୍ବରୁ ତାଙ୍କ ସ୍ତ୍ରୀଙ୍କ ସମେତ ୪ ଜଣ ସମ୍ପର୍କୀୟଙ୍କୁ ହରାଇଥିଲେ। ସେ ନିଜେ ମଧ୍ୟ ଗତମାସରେ ଇସ୍ରାଏଲ୍ ଆକ୍ରମଣରେ ଆହତ ହୋଇଥିଲେ।
