ନୂଆଦିଲ୍ଲୀ,୩୦।୩: ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କ ଘର ଉପରେ ଆକ୍ରମଣ ହୋଇଛି। କିଛି ଦୁର୍ବୃତ୍ତ ତାଙ୍କ ଘର ଉପରେ ଆକ୍ରମଣ କରିଥିବା ଜଣାପଡ଼ିଛି। ଏନେଇ ଦିଲ୍ଲୀ ଉପମୁଖ୍ୟମନ୍ତ୍ରୀ ମନୀଷ ସିସୋଡିଆ ଟୁଇଟ କରି ସୂଚନା ଦେଇଛନ୍ତି। ସେ କହିଛନ୍ତି, କିଛି ଦୁର୍ବୃତ୍ତ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କ ଘର ଉପରେ ଆକ୍ରମଣ କରିବା ସହ ସିସିଟିଭି କ୍ୟାମେରା ଏବଂ ସୁରକ୍ଷା ବ୍ୟାରିକେଡକୁ ଭାଙ୍ଗିଦେଇଛନ୍ତି। ଏତଦ୍ ବ୍ୟତୀତ ଫାଟକରେ ଲାଗିଥିବା ବୁମ ବ୍ୟାରିକେଡକୁ ମଧ୍ୟ ଭାଙ୍ଗିଦିଆଯାଇଛି। ଭାଜପା ଗୁଣ୍ଡା ଏଭଳି ଭଙ୍ଗାରୁଜା କରିଛନ୍ତି ବୋଲି ସିସୋଡିଆ ଅଭିଯୋଗ କରିଛନ୍ତି। ଏଥିସହ ସେ କହିଛନ୍ତି, ଭାଜପା ପୋଲିସ ସେମାନଙ୍କୁ ଅଟକାଇବା ବଦଳରେ ଗେଟ୍ ସମ୍ମୁଖକୁ ନେଇ ଆସିଥିଲା ବୋଲି ସିସୋଡିଆ କହିଛନ୍ତି। ସୂଚନା ମୁତାବକ ଭାଜପା ଯୁବ ମୋର୍ଚ୍ଚାର ପ୍ରାୟ ୧୫୦ରୁ ୨୦୦ କର୍ମକର୍ତ୍ତା ବୁଧବାର ସକାଳ ସାଢ଼େ ୧୧ଟାରେ ମୁଖ୍ୟମନ୍ତ୍ରୀ କେଜ୍ରିଓ୍ବାଲଙ୍କ ବାସଭବନରେ ପହଞ୍ଚି ବିରୋଧ ପ୍ରଦର୍ଶନ କରିଥିଲେ। ‘ଦ କଶ୍ମୀର ଫାଇଲ୍ସ’ ଫିଲ୍ମକୁ ନେଇ କେଜ୍ରିଓ୍ବାଲ ଦେଇଥିବା ବୟାନ ଉପରେ ଏହି ପ୍ରଦର୍ଶନ କରାଯାଇଥିଲା। ତେବେ ପ୍ରାୟ ଗୋଟାଏ ସମୟରେ କିଛି ପ୍ରଦର୍ଶନକାରୀ ବ୍ୟାରିକେଡ ଭଙ୍ଗାରୁଜା କରିବା ସହ ମୁଖ୍ୟମନ୍ତ୍ରୀଙ୍କ ବାସଭବନ ନିକଟକୁ ପହଞ୍ଚିଯାଇଥିଲେ। ଏହାପରେ ତାଙ୍କ ଘର ଉପରକୁ ରଙ୍ଗ ପକାଇବା ସହ ସିସିଟିଭି କ୍ୟାମେରାକୁ ମଧ୍ୟ ଭାଙ୍ଗିଦେଇଥିଲେ। ଘଟଣାସ୍ଥଳରେ ତୁରନ୍ତ ପୋଲିସ ପହଞ୍ଚି ୭୦ଜଣଙ୍କୁ ଗିରଫ କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ କରିଛି ବୋଲି ଉତ୍ତର ଦିଲ୍ଲୀ ଡିସିପି ସୂଚନା ଦେଇଛନ୍ତି। ଅନ୍ୟପଟେ ଏହି ପ୍ରସଙ୍ଗରେ ରାଜ୍ୟ ସଭା ଏମ୍ପି ରାଘବ ଚଡ୍ଡା ଟୁଇଟ କରି ଏହି ଆକ୍ରମଣକୁ ନିନ୍ଦା କରିଛନ୍ତି। ପୋଲିସ ଉପସ୍ଥିତିରେ ଭାଜପାର ଏହି ଗୁଣ୍ଡାମାନେ ବ୍ୟାରିକେଡ ଓ ସିସିଟିଭି କ୍ୟାମେରା ଭାଙ୍ଗିଛନ୍ତି। ପଞ୍ଜାବରେ ଶୋଚନୀୟ ପରାଜୟ ପରେ କ୍ରୋଧରେ ଭାଜପା ଏଭଳି ଖରାପ ରାଜନୀତିକୁ ଓହ୍ଲାଇଛି ବୋଲି ରାଘବ ଚଡ୍ଡା କହିଛନ୍ତି।
