ଲଣ୍ଡନ,୨୩।୧୧(ଏପି): ବର୍ଷ ଶେଷରେ ଏଠାରେ ଚାଲିଥିବା ହାଇପ୍ରୋଫାଇଲ ଏଟିପି ଫାଇନାଲ୍ସ ଟୁର୍ନାମେଣ୍ଟର ଫାଇନାଲ ମୁକାବିଲା ସ୍ପଷ୍ଟ ହୋଇଛି। ଟାଇଟଲ ପାଇଁ ଏହି ଇନ୍ଡୋର ହାର୍ଡକୋର୍ଟ ଟୁର୍ନାମେଣ୍ଟ ଫାଇନାଲରେ ଏଥର ବିଶ୍ୱର ୩ ନମ୍ବର ଖେଳାଳି ଅଷ୍ଟ୍ରିଆର ଡୋମିନିକ୍ ଥିମ୍ ଓ ୪ ନମ୍ବର ଖେଳାଳି ରୁଷିଆର ଡାନିଲ ମେଡ୍ଭେଡେଭ ପରସ୍ପରକୁ ଭେଟିବେ।
ପ୍ରଥମ ସେମିଫାଇନାଲରେ ଥିମ୍ ୭-୫, ୬-୭, ୭-୬ ସେଟ୍ରେ ସର୍ବିୟାର ନୋଭାକ ଜୋଭୋଭିଚ୍ଙ୍କୁ ହରାଇ ଫାଇନାଲକୁ ଉଠିଥିଲେ। ସେହିପରି ଶନିବାର ଦ୍ୱିତୀୟ ସେମିଫାଇନାଲରେ ମେଡ୍ଭେଡେଭ ୩-୬, ୭-୬, ୬-୩ ସେଟ୍ରେ ହରାଇ ଫାଇନାଲରେ ପ୍ରବେଶ କରିଥିଲେ। ତେଣୁ ଜୋକୋଭିଚ୍- ନାଡାଲଙ୍କ ବଦଳରେ ଥିମ୍- ମେଡ୍ଭେଡେଭଙ୍କ ମଧ୍ୟରେ ଏଥର ଏହି ନିର୍ଣ୍ଣାୟକ ମୁକାବିଲା ହେବ।
ସେମିରେ ନାଡାଲ ପ୍ରଥମ ସେଟ୍ ଜିତି ଭଲ ଆରମ୍ଭ କରିଥିଲେ। ତେବେ ପରେ ସେ ଏହାକୁ ବଜାୟ ରଖିପାରି ନ ଥିଲେ। ପ୍ରଥମ ସେଟ୍ ଜିତିବା ପୂର୍ବରୁ ନାଡାଲ କ୍ରମାଗତ ୭୧ ମ୍ୟାଚ୍ ଜିତି ଜବରଦସ୍ତ ଫର୍ମରେ ଥିଲେ। କିନ୍ତୁ ବାକି ଦୁଇଟି ସେଟ୍ରେ ମେଡ୍ଭେଡେଭ ଦମ୍ଦାର ପ୍ରଦର୍ଶନ କରି ବିଜୟୀ ହେବା ସହ ନାଡାଲଙ୍କୁ ନିରାଶ କରିଥିଲେ। ଏପର୍ଯ୍ୟନ୍ତ ଟୁର୍ନାମେଣ୍ଟରେ ନାଡାଲ ଟାଇଟଲ ଜିତି ପାରି ନାହାନ୍ତି। ଫଳରେ ତାଙ୍କର ଏହି ଆଶା ଏବେ ଅପୂରଣୀୟ ରହିବ। ଏହାପୂର୍ବରୁ ମେଡ୍ଭେଡେଭ ଓ ନାଡାଲ ୩ଟି ମ୍ୟାଚ୍ରେ ପରସ୍ପରକୁ ଭେଟିଥିଲେ ଓ ସବୁଥିରେ ପରାସ୍ତ ହୋଇଥିଲେ। ୨୪ ବର୍ଷୀୟ ମେଡଭେଡେଭ ୨୦୧୯ ୟୁଏସ୍ ଓପନ୍ ଫାଇନାଲରେ ନାଡାଲଙ୍କଠାରୁ ୫ ସେଟ୍ରେ ପରାସ୍ତ ହୋଇଥିଲେ।
