ନୂଆଦିଲ୍ଲୀ: ରିଜର୍ଭ ବ୍ୟାଙ୍କ ଅଫ୍ ଇଣ୍ଡିଆ(ଆର୍ବିଆଇ)ର ଟୁଇଟର ହ୍ୟାଣ୍ଡେଲରେ ଫଲୋଅରଙ୍କ ସଂଖ୍ୟା ଏବେ ୧୦ ଲକ୍ଷ ଟପିଛି। ଆର୍ବିଆଇ ଗଭର୍ନର ଶକ୍ତିକାନ୍ତ ଦାସ ରବିବାର ଏ ନେଇ ସୂଚନା ଦେଇଛନ୍ତି। ଏହି ଅବସରରେ ସେ କେନ୍ଦ୍ରୀୟ ବ୍ୟାଙ୍କର ସମସ୍ତ କର୍ମକର୍ତ୍ତା ଏବଂ ସହଯୋଗୀଙ୍କୁ ଶୁଭେଚ୍ଛା ଜଣାଇଛନ୍ତି। ଦୁନିଆର ସବୁଠୁ ଶକ୍ତିଶାଳୀ କେନ୍ଦ୍ରୀୟ ବ୍ୟାଙ୍କ କୁହାଯାଉଥିବା ଫେଡରାଲ ରିଜର୍ଭର ଟୁଇଟର ହ୍ୟାଣ୍ଡେଲରେ ଫଲୋଅର ସଂଖ୍ୟା ୬.୬୭ଲକ୍ଷ ରହିଛି। କୌଣସି କେନ୍ଦ୍ରୀୟ ବ୍ୟାଙ୍କରେ ଏତେ ସଂଖ୍ୟକ ଫଲୋଅର ରହିବା କ୍ଷେତ୍ରରେ ରିଜର୍ଭ ବ୍ୟାଙ୍କ ପ୍ରଥମ ସ୍ଥାନରେ ରହିଛି। ସେହିଭଳି ୟୁରୋପୀୟ କେନ୍ଦ୍ରୀୟ ବ୍ୟାଙ୍କରେ ଫଲୋଅର ସଂଖ୍ୟା ୫.୯୧ ଲକ୍ଷ ରହିଛି। ଆମେରିକାର କେନ୍ଦ୍ରୀୟ ବ୍ୟାଙ୍କ ୨୦୦୯ ମାର୍ଚ୍ଚରେ ଟୁଇଟର ସହ ଯୋଡ଼ି ହୋଇଥିଲା। ସେହିଭଳି ୟୁରୋପୀୟ କେନ୍ଦ୍ରୀୟ ବ୍ୟାଙ୍କ ୨୦୦୯ ଅକ୍ଟୋବରରେ ଟୁଇଟର ସହ ଯୋଡ଼ି ହୋଇଥିଲା। ୮୫ ବର୍ଷ ପୁରୁଣା ରିଜର୍ଭ ବ୍ୟାଙ୍କ ୨୦୧୨ ଜାନୁୟାରୀରେ ଟୁଇଟରରେ ନୂଆ କରି ଆସିଥିଲା। ସୂଚନା ଯୋଗ୍ୟ, ଗଭର୍ନର ଶକ୍ତିକାନ୍ତ ଦାସଙ୍କର ଅନ୍ୟ ଏକ ଟୁଇଟର ଆକାଉଣ୍ଟ ରହିଛି। ସେଥିରେ ୧.୩୫ ଲକ୍ଷ ଫଲୋଅର ରହିଛନ୍ତି। ୨୦୧୯ ମାର୍ଚ୍ଚରେ ଆରବିଆଇ ଟୁଇଟର ହ୍ୟାଣ୍ଡେଲରେ ଫଲୋଅରଙ୍କ ସଂଖ୍ୟା ୩.୪୨ ଲକ୍ଷ ରହିଥିଲା। ଏହା ୨୦୨୦ ମାର୍ଚ୍ଚରେ ୨ ଗୁଣ ବଢି ୭.୫୦ ଲକ୍ଷରେ ପହଞ୍ଚିଥିଲା। ଜଣେ ଅଧିକାରୀଙ୍କ କହିବା ମୁତାବକ ଲକ୍ଡାଉନରେ ଆର୍ବିଆଇ ଫଲୋଅରଙ୍କ ସଂଖ୍ୟା ୧.୫ ଲକ୍ଷରୁ ଅଧିକ ବଢିଛି। ଚଳିତ ଆର୍ଥତ୍କ ବର୍ଷରେ ୨.୫ ଲକ୍ଷ ଫଲୋଅର ରିଜର୍ଭ ବ୍ୟାଙ୍କ ସହ ଯୋଡ଼ି ହୋଇଛନ୍ତି।
