ଲଣ୍ଡନ,୧୮।୧୧(ଏପି): ଏଠାରେ ଚାଲିଥିବା ୫,୭୦୦,୦୦ ଅମେରିକୀୟ ଡଲାର ପୁରସ୍କାର ରାଶି ବିଶିଷ୍ଟ ଏଟିପି ଫାଇନାଲ୍ସରେ ରୁଷିଆ ତାରକା ଡାନିଲ ମେଡ୍ଭେଡେଭ ବିଜୟରୁ ଅଭିଯାନ ଆରମ୍ଭ କରିଛନ୍ତି। ଏହି ଇନ୍ଡୋର ହାର୍ଡକୋର୍ଟ ଟୁର୍ନାମେଣ୍ଟର ଦ୍ୱିତୀୟ ଦିବସରେ ସେ ଜର୍ମାନୀର ଆଲେକ୍ଜାଣ୍ଡର ଜେଭେରେଭଙ୍କୁ ୬-୩, ୬-୪ ସେଟ୍ରେ ହରାଇଛନ୍ତି। ପରବର୍ତ୍ତୀ ପର୍ଯ୍ୟାୟରେ ସେ ବୁଧବାର ବିଶ୍ୱର ୧ ନମ୍ବର ଖେଳାଳି ସର୍ବିୟାର ନୋଭାକ ଜୋକୋଭିଚ୍ଙ୍କୁ ଭେଟିବେ। ଅନ୍ୟପଟେ ଜୋକୋଭିଚ୍ ସୋମବାର ଏଟିପି ଫାଇନାଲ୍ସରେ ପଦାର୍ପଣ କରିଥିବା ଡିଏଗୋ ସ୍ବାର୍ଜମ୍ୟାନଙ୍କୁ ୬-୩, ୬-୨ ସେଟ୍ରେ ପରାସ୍ତ କରିଛନ୍ତି। ଗ୍ରୁପ୍ ଲିଡ୍ ପାଇଁ ଜୋକୋଭିଚ୍ ଓ ମେଡଭେଡେଭ ପ୍ରତିଯୋଗିତାରେ ଅବତୀର୍ଣ୍ଣ ହେବେ।
ଦ୍ୱିତୀୟ ସେଟ୍ରେ ମେଡ୍ଭେଡେଭ ୪-୩, ୩୦-୩୯ରେ ଅଗ୍ରଣୀ ଥିବା ବେଳେ ଏକ କୁଇକ୍ ଅଣ୍ଡର ଆର୍ମ ସର୍ଭ କରି ଜେଭେରେଭଙ୍କୁ ଚକିତ କରିଥିଲେ। ଏହା ଦ୍ୱାରା ଜେଭେରେଭ ନେଟ୍ ନିକଟକୁ ଆସିଥିଲେ ଓ ପଏଣ୍ଟ ହରାଇଥିଲେ। ୨୦୧୮ରେ ଜେଭେରେଭ ଚାମ୍ପିୟନ ହୋଇଥିଲେ। ତେବେ ଗତ ସଂସ୍କରଣରେ ଗ୍ରୀକ୍ର ଷ୍ଟିଫାନୋ ସିତିସପାସ ଟାଇଟଲ ହାସଲ କରିଥିଲେ। ଏହା ମୋ କ୍ୟାରିୟର ଅନ୍ୟତମ ସଂଘର୍ଷପୂର୍ଣ୍ଣ ମ୍ୟାଚ୍ ଥିଲା ବୋଲି ମେଡ୍ଭେଡେଭ କହିଛନ୍ତି। ୨୦୦୭ ପରଠାରୁ ଜେକୋଭିଚ୍ ଏଟିପି ଫାଇନାଲ୍ସର କୌଣସି ପ୍ରାରମ୍ଭିକ ମ୍ୟାଚ୍ରେ ପରାଜୟ ବରଣ କରିନାହାନ୍ତି। ଶେଷଥର ସେ ଡେଭିଡ୍ ଫେରରଙ୍କଠାରୁ ପରାସ୍ତ ହୋଇଥିଲେ। ଗତ ୬ଟି ମ୍ୟାଚ୍ରେ ସେ ସ୍ବାର୍ଜମ୍ୟାନଙ୍କଠାରୁ କେବେ ପରାସ୍ତ ହୋଇନାହାନ୍ତି। ସ୍ବାର୍ଜମ୍ୟାନ ଦକ୍ଷିଣ ଆମେରିକାର ପ୍ରଥମ ଖେଳାଳିଭାବେ ୨୦୧୩ଠାରୁ ଏଟିପି ଫାଇନାଲ୍ସ ସିଙ୍ଗଲ୍ସରେ ଖେଳୁଛନ୍ତି।
ରବିବାର ଡୋମିନିକ୍ ଥିମ୍ ଗତଥରର ଚାମ୍ପିୟନ ସିତିସପାସ୍ଙ୍କୁ ୭-୬, ୪-୬, ୬-୩ ସେଟ୍ରେ ପରାସ୍ତ କରିଥିଲେ। ସେହିପରି ସ୍ପେନର ରାଫାଲ ନାଡାଲ ୬-୩, ୬-୪ ସେଟ୍ରେ ଆନ୍ଦ୍ରେ ରୁବ୍ଲେଭଙ୍କୁ ହରାଇଥିଲେ। ଉଲ୍ଲେଖଥାଉ କି, ୧ ନମ୍ବର ଖେଳାଳିଭାବେ ବର୍ଷ ଶେଷ କରି ରେକର୍ଡର ସମକକ୍ଷ ହୋଇଥିବା ଜୋକୋଭିଚ୍ଙ୍କୁ ରବିବାର ଏକ ଟ୍ରଫି ପ୍ରଦାନ କରାଯାଇ ସମ୍ମାନିତ କରାଯାଇଥିଲା।
