ଲଣ୍ଡନ, ୨୪।୧୧: ରୁଷିଆର ଡାନିଲ ମେଡ୍ଭେଡେଭ୍ ନିଜ କ୍ୟାରିୟରର ସବୁଠାରୁ ବଡ଼ ଟାଇଟଲ ହାସଲ କରିଛନ୍ତି। ଏଠାରେ ଅନୁଷ୍ଠିତ ବର୍ଷଶେଷ ଏଟିପି ଫାଇନାଲ୍ସ ଟେନିସ ଟୁର୍ନାମେଣ୍ଟରେ ସେ ଚାମ୍ପିୟନ ହୋଇଛନ୍ତି। ଫାଇନାଲରେ ସେ ୟୁଏସ ଓପନ ଚାମ୍ପିୟନ ଅଷ୍ଟ୍ରିଆର ଡୋମିନିକ୍ ଥିମ୍ଙ୍କୁ ୪-୬, ୭-୬(୨), ୬-୪ ସେଟ୍ରେ ପରାସ୍ତ କରିଛନ୍ତି। ମେଡଭେଡେଭ ସହଜରେ ଏଠାରେ ଟାଇଟଲ ବିଜୟୀ ହୋଇନାହାନ୍ତି। ବିଶ୍ୱ ର଼୍ୟାଙ୍କିଙ୍ଗ୍ର ଟପ୍-୩ ଖେଳାଳିଙ୍କୁ ହରାଇ ସେ ଏହି ସଫଳତା ପାଇଛନ୍ତି। ୩ ନମ୍ବର ଥିମ୍ଙ୍କୁ ହରାଇବା ପୂର୍ବରୁ ସେ ସେମିଫାଇନାଲରେ ୨ ନମ୍ବର ରାଫାଲ ନାଡାଲ ଏବଂ ଲିଗ୍ ପର୍ଯ୍ୟାୟରେ ନମ୍ବର ଓ୍ବାନ ନୋଭାକ୍ ଜୋକୋଭିଚ୍ଙ୍କୁ ପରାସ୍ତ କରିଛନ୍ତି। ବିଶ୍ୱର ୪ର୍ଥ ଖେଳାଳିଭାବେ ମେଡ୍ଭେଡେଭ୍ ଗୋଟିଏ ଟୁର୍ନାମେଣ୍ଟରେ ର଼୍ୟାଙ୍କିଙ୍ଗ୍ର ଟପ୍-୩ ଖେଳାଳିଙ୍କୁ ହରାଇଛନ୍ତି। ତାଙ୍କ ପୂର୍ବରୁ ବୋରିସ ବେକର, ନୋଭାକ୍ ଜୋକୋଭିଚ୍ ଓ ଡେଭିଡ ନାଲବଣ୍ଡିଆନ ଏହି ସଫଳତା ପାଇଥିଲେ। ମେଡଭେଡେଭ ଏବେ ଚମତ୍କାର ଫର୍ମରେ ଅଛନ୍ତି। ନିକଟ ଅତୀତରେ ସେ କ୍ରମାଗତ ୧୦ ମ୍ୟାଚ ଜିତିଛନ୍ତି। ଏହା ମଧ୍ୟରୁ ସେ ବିଶ୍ୱର ଟପ୍-୧୦ ଖେଳାଳିଙ୍କ ମଧ୍ୟରୁ ୭ ଜଣଙ୍କୁ ହରାଇଛନ୍ତି। ଏହା ପୂର୍ବରୁ ସେ କେବେହେଲେ ଏପରି ସଫଳତା ପାଇ ନ ଥିଲେ। ଏହା ତାଙ୍କର ଆତ୍ମବିଶ୍ୱାସକୁ ବହୁ ପରିମାଣରେ ବଢ଼ାଇଛି। ଆଗାମୀ ଦିନରେ ଏହି ପ୍ରଦର୍ଶନ ଜାରି ରଖିବାକୁ ଚାହିଁଛନ୍ତି ରୁଷୀୟ ଟେନିସ ତାରକା। ୨୦୧୯ ୟୁଏସ ଓପନ ଗ୍ରାଣ୍ଡସ୍ଲାମ ଫାଇନାଲରେ ସେ ରାଫାଲ ନାଡାଲଙ୍କଠାରୁ ହାରି ରନର୍ସଅପ୍ ହୋଇଥିଲେ। ଏହା ତାଙ୍କର ଶ୍ରେଷ୍ଠ ପ୍ରଦର୍ଶନ ଥିଲା। ଲଣ୍ଡନରେ କ୍ରମାଗତ ୧୨ ବର୍ଷଧରି ହୋଇ ଆସୁଥିବା ଏହି ଟୁର୍ନାମେଣ୍ଟ ଆସନ୍ତା ବର୍ଷରୁ ଇଟାଲିର ଟୁରିନ୍ରେ ଅନୁଷ୍ଠିତ ହେବ।
