ଲକ୍ଷ୍ନୌ,୨୧।୪: ଗ୍ୟାଙ୍ଗଷ୍ଟର ଅତିକ୍ ଅହମ୍ମଦଙ୍କ ପୁଅ ଉମରଙ୍କୁ ଶୁକ୍ରବାର ସିବିଆଇ ସ୍ବତନ୍ତ୍ର କୋର୍ଟରେ ହାଜର କରାଯିବ। ଉମର ବର୍ତ୍ତମାନ ଲକ୍ଷ୍ନୌ ଜେଲରେ ଅଛନ୍ତି। ଭିଡିଓ କନଫରେନ୍ସିଂ ମାଧ୍ୟମରେ ତାଙ୍କୁ କୋର୍ଟରେ ହାଜର କରାଯିବ ବୋଲି ସୂଚନା ରହିଛି। ଜାଲିଆତି, ଚୋରା ଚାଲାଣ, ଡକାୟତି, ପ୍ରତାରଣା, ଅପରାଧିକ ଷଡଯନ୍ତ୍ର ସମେତ ଅନେକ ଗୁରୁତର ମାମଲାରେ ୭ ଏପ୍ରିଲରେ ଅତିକ୍ ଅହମ୍ମଦ ଏବଂ ପୁଅ ଉମରଙ୍କ ବିରୋଧରେ ମାମଲା ରୁଜୁ କରାଯାଇଥିଲା।ତେବେ ଉମର ଅତିକ୍ଙ୍କ ଆଉ ଗୋଟିଏ ପୁଅ।
ସୂଚନାଯୋଗ୍ୟ, ଲକ୍ଷ୍ନୌ ବ୍ୟବସାୟୀ ମୋହିତ ଜୟସାୱଲଙ୍କୁ ୨୦୧୮ରେ ଅପହରଣ କରାଯାଇ ଦେଓରିଆ ଜେଲରେ ମାଡମାରିବା ଅଭିଯୋଗ ହୋଇଥିଲା। ଏହାପରେ ଡିସେମ୍ବର ୨୯ରେ ବ୍ୟବସାୟୀ ମୋହିତଏକ ଏଫଆଇଆର ଦାଖଲ କରିଥିଲେ। ସେ କହିଥିଲେ ଯେ ଦେଓରିଆ ଜେଲରେ ଥିବା ଅତିକ ତାଙ୍କ ଲୋକଙ୍କ ମାଧ୍ୟମରେ ତାଙ୍କୁ ଅପହରଣ କରି ଦେଓରିଆ ଜେଲକୁ ଅଣାଯାଇଥିଲା। ଏହାପରେ ଜେଲରେ ଥିବା ମାଫିଆ ଅତିକ୍ ଏବଂ ତାଙ୍କ ପୁଅ ଉମର ତାଙ୍କୁ ର୍ନିଦ୍ଦୟ ଭାବରେ ପିଟିଥିଲେ। ବର୍ତ୍ତମାନ ଏହି ମାମଲାର ଶୁଣାଣି ଚାଲିଛି। ଏହି ମାମଲାର ସାକ୍ଷ୍ୟ ଆଜି ସିବିଆଇ ସ୍ବତନ୍ତ୍ର କୋର୍ଟରେ ଆରମ୍ଭ ହୋଇପାରେ।
ଏହି ମାମଲାର ମୁଖ୍ୟ ଅଭିଯୁକ୍ତ ଅତିକ୍ ଏବଂ ତାଙ୍କ ଭାଇ ଅଶ୍ରଫଙ୍କୁ ଏପ୍ରିଲ ୧୫ରେ ପ୍ରୟାଗରାଜର କଲଭିନ ହସ୍ପିଟାଲ ବାହାରେ ଗୁଳି କରି ହତ୍ୟା କରାଯାଇଥିଲା। ଏହି ଆକ୍ରମଣ ମାମଲାରେ ପୋଲିସ ତିନି ଅଭିଯୁକ୍ତଙ୍କୁ ଗିରଫ କରିଥିଲା।
