ନୂଆଦିଲ୍ଲୀ,୧୬।୪: ମାଫିଆ ଅତିକ ଅହମଦ ଓ ତାଙ୍କ ଭାଇ ଅଶରଫଙ୍କୁ ଶନିବାର ଗୁଳି କରି ହତ୍ୟା କରାଯିବା ପରଠାରୁ ରାଜନୈତିକ ଜଗତରୁ ଲଗାତାର ପ୍ରତିକ୍ରିୟାମାନ ଆସୁଛି। ଶାସକ ଓ ବିରୋଧି ସମସ୍ତେ ଏହି ହତ୍ୟାକାଣ୍ଡକୁ ନେଇ ଭିନ୍ନ ଭିନ୍ନ ବୟାନ ଦେଉଛନ୍ତି। ବିଶେଷ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ଭାରତୀୟ ଜନତା ପାର୍ଟି(ଭାଜପା) ତା’ର ନେତାଙ୍କ ବୟାନକୁ ନେଇ ଅସନ୍ତୁଷ୍ଟ ଅଛି। ଭାଜପା ହାଇକମାଣ୍ଡ କ୍ୟାବିନେଟ ମନ୍ତ୍ରୀ ସ୍ବତନ୍ତ୍ର ଦେବ ସିଂଙ୍କ ଟୁଇଟ ଓ ସୁରେଶ ଖାନ୍ନାଙ୍କ ବାଇଟକୁ ନେଇ ଅସନ୍ତୁଷ୍ଟ ବ୍ୟକ୍ତ କରିଛି। ସମସ୍ତ ନେତାଙ୍କୁ ମିଡିଆଠାରୁ ଦୂରେଇ ରହିବାକୁ ନିର୍ଦ୍ଦେଶ ଦିଆଯାଇଛି। ଏପଟେ ଭାଜପା ହାଇକମାଣ୍ଡ ଅତିକ ହତ୍ୟାକାଣ୍ଡର ପ୍ରତି ମୁହୂର୍ତ୍ତର ସୂଚନା ନେଉଛି।
ସୂଚନାଯୋଗ୍ୟ, ମାଫିଆ ଅତିକ ଅହମଦ ଓ ତାଙ୍କ ଭାଇ ଅଶରଫଙ୍କୁ ଗୁଳି କରି ହତ୍ୟା କରିବାର ଗୋଟିଏ ଦିନ ପୂର୍ବରୁ ଅତିକଙ୍କ ପୁଅ ଅସଦ ଓ ତାଙ୍କ ସହଯୋଗୀ ଗୁଲାମଙ୍କୁ ଏନକାଉଣ୍ଟ କରାଯାଇଥିଲା। ଏ ସମସ୍ତ ଘଟଣା ପରେ ରାଜାନେତାଙ୍କ ପ୍ରତିକ୍ରିୟା ଭିତରେ କିନ୍ତୁ ଭାଜପା ନେତା ସ୍ବତନ୍ତ୍ର ଦେବ ସିଂଙ୍କ ଟୁଇଟ ଓ ସୁରେଶ ଖାନ୍ନାଙ୍କ ବାଇଟ ଦଳର ହାଇକମାଣ୍ଡଙ୍କୁ ପସନ୍ଦ ଆସି ନ ଥିଲା। ସେଥିପାଇଁ ଭାଜପା ପକ୍ଷରୁ କଡା ନିର୍ଦ୍ଦେଶ ଜାରି କରାଯାଇଛି।
