ଛତ୍ରପୁର,୫/୯(ଡି.ଏନ୍.ଏ.):ରାଜ୍ୟରେ ସର୍ବାଧିକ ସଡ଼କ ଦୁର୍ଘଟଣା ଗଞ୍ଜାମ ଜିଲାରେ ଘଟୁଛି। ଏପରିକି ଅଜଣା ଗାଡି ଧକ୍କାରେ ପ୍ରତିବର୍ଷ ବହୁ ଲୋକଙ୍କ ଜୀବନ ମଧ୍ୟ ଯାଉଛି। ଅଜଣା ଗାଡି ଧକ୍କାରେ ଯଦି କୌଣସି ବ୍ୟକ୍ତିଙ୍କ ମୃତ୍ୟୁ ଘଟେ କିମ୍ବା ଗୁରୁତର ଆହତ ହୋଇଥାନ୍ତି ସେମାନଙ୍କ ପରିବାରକୁ ରାଜ୍ୟ ସରକାରଙ୍କ ପକ୍ଷରୁ ସହାୟତା ରାଶି ପ୍ରଦାନ କରିବା ବ୍ୟବସ୍ଥା କରାଯାଇଛି। ୨୦୧୮ମେ ୧୪ ତାରିଖରେ ରାଜ୍ୟ ସରକାର ହିଟ୍ ଆଣ୍ଡ ରନ୍ ମୋଟରଯାନ ଦୁର୍ଘଟଣା ମାମଲାର ସହାୟତା ପାଇଁ ସୋଲେସିଅମ ଫଣ୍ଡ ଆରମ୍ଭ କରିଥିଲେ। ଏହି ଯୋଜନାରେ ଦୁର୍ଘଟଣାରେ ପ୍ରାଣ ହରାଇଥିବା ବ୍ୟକ୍ତିଙ୍କ ପରିବାରକୁ ୨ଲକ୍ଷ ଟଙ୍କା ଓ ଅଧିକ ଗୁରୁତର ଆହତ ହୋଇଥିବା ବ୍ୟକ୍ତିଙ୍କୁ ୫୦ ହଜାର ଟଙ୍କା ସହାୟତା ଦିଆଯାଇଥାଏ। ଦୁର୍ଘଟଣାର ବର୍ଷକ ମଧ୍ୟରେ ଏହି ଯୋଜନା ମାଧ୍ୟମରେ ସହାୟତା ପାଇଁ ଆବେଦନ କରିବା ନିୟମ ରହିଛି। ତେବେ ଏହି ସ୍କିମ ଆରମ୍ଭ ହେବା ପରଠାରୁ ଗଞ୍ଜାମ ଜିଲାରେ ଦୁର୍ଘଟଣାରେ ମୃତ ଓ ଗୁରୁତର ଆହତ ବହୁ ବ୍ୟକ୍ତିଙ୍କ ପରିବାର ସହାୟତା ଅର୍ଥ ପାଇ ନ ଥିବା ଜଣାପଡିଛି।
ସୋଲେସିଅମ ଯୋଜନା କାର୍ଯ୍ୟକାରୀ କରିବା ଲାଗି ଗଞ୍ଜାମ ଜିଲାରେ ୨୦୧୮ରେ ୫ଜଣିଆ କମିଟି ଗଠନ କରାଯାଇଥିଲା। ଏହି କମିଟିରେ ଜିଲାପାଳ ଅଧ୍ୟକ୍ଷ ରହିଛନ୍ତି। ପ୍ରତିବର୍ଷ ଜିଲାରେ ବହୁ ଲୋକଙ୍କ ଅଜଣା ଗାଡି ଧକ୍କାରେ ମୃତ୍ୟୁ ହେଉଥିବା ବେଳେ ଗୁରୁତର ଆହତ ମଧ୍ୟ ହେଉଛନ୍ତି। ସୋଲେସିଅମ ସ୍କିମ ଲାଗୁ ହେବା ଦିନଠାରୁ ଏ ପର୍ଯ୍ୟନ୍ତ ସହାୟତା ପାଇଁ ମାତ୍ର ୭୧ଜଣ ଦୁର୍ଘଟଣାଗ୍ରସ୍ତଙ୍କ ପରିବାର ସହାୟତା ପାଇଁ ଆବେଦନ କରିଛନ୍ତି। ଏହି ଆବେଦନ ପତ୍ରକୁ କଟକସ୍ଥିତ ପରିବହନ କମିଶନରଙ୍କ କାର୍ଯ୍ୟାଳୟକୁ ପଠାଯାଇଥିଲା। ସେଥିମଧ୍ୟରୁ ୩୧ ଜଣଙ୍କ ପରିବାରକୁ ସହାୟତା ରାଶି ମିଳିଥିବା ବେଳେ ୪୦ଟି ଆବେଦନ ଖାରଜ ହୋଇଥିବା ଛତ୍ରପୁର ଆଞ୍ଚଳିକ କାର୍ଯ୍ୟାଳୟ ପକ୍ଷରୁ ସୂଚନା ମିଳିଛି। ସଚେତନତା ଅଭାବରୁ ଏହାର ସୁଫଳ ମିଳିପାରୁନାହିଁ। ଯାହାଫଳରେ ଏହାର ଲକ୍ଷ୍ୟ ସାଧିତ ହୋଇପାରୁନି। ଜିଲାପ୍ରଶାସନ ଓ ଜିଲା ଆଞ୍ଚଳିକ ପରିବହନ କାର୍ଯ୍ୟାଳୟର ବ୍ୟାପକ ସଚେତନତା ଅଭାବରୁ ଯୋଜନା ସମ୍ପର୍କରେ ବହୁ ଲୋକ ଜାଣିନାହାନ୍ତି। ଯୋଜନା କେବଳ ପୋଷ୍ଟର ମାରିବାରେ ସୀମିତ ରହିଯାଇଛି। ସେହିପରି ଦୁର୍ଘଟଣା ବେଳେ ଯଦି କୌଣସି ଲୋକ ସେଠାରୁ ଗୁରୁତରଙ୍କୁ ମେଡିକାଲକୁ ନେବେ ପୋଲିସ ସେମାନଙ୍କ ଉପରେ କୌଣସି ମାମଲା ରୁଜୁ କରିବ ନାହିଁ ଏବଂ ସମ୍ପୃକ୍ତ ବ୍ୟକ୍ତିଙ୍କୁ ଆରଟିଓ ପକ୍ଷରୁ ସମ୍ମାନିତ କରାଯିବା ବ୍ୟବସ୍ଥା ସରକାର କରିଛନ୍ତି। ଏଥିସହ ଦୁଇ ହଜାର ଟଙ୍କା ପୁରସ୍କାର ପ୍ରଦାନ କରିବାର ନିୟମ ରହିଥିଲେ ମଧ୍ୟ ବହୁ ଲୋକ ପୋଲିସ କେସ ଭୟରେ ଦୁର୍ଘଟଣା ହେଲେ ଆହତଙ୍କୁ ମେଡିକାଲ ନେବାପାଇଁ ରାଜି ହେଉନାହାନ୍ତି।
