ଗୋପାଳପୁର,୨୧ା୩(ନବୀନ ରାଜ ଆଚାରୀ): ଚାକିରି କରାଇ ଦେବାକୁ କହି ଯୁବତୀଙ୍କଠାରୁ ଲକ୍ଷାଧିକ ଟଙ୍କା ଠକେଇ କରିବା ଅଭିଯୋଗରେ ଗୁରୁବାର ଗୋପାଳପୁର ଥାନା ପୋଲିସ ଅବସରପ୍ରାପ୍ତ କର୍ମଚାରୀ ଗିରଫ କରି କୋର୍ଟ ଚାଲାଣ କରିଛି। ଗିରଫ ଅଭିଯୁକ୍ତ ଜଣକ ହେଲେ କଟକ ସିଡିଏ-୭ ଅଞ୍ଚଳର ଗଜେନ୍ଦ୍ର ନାଥ ସାହୁ (୬୧) ବୋଲି ତଦନ୍ତକାରୀ ଅଧିକାରୀ ଜନ୍ମେଜୟ ମଲ୍ଲିକ ସୂଚନା ଦେଇଛନ୍ତି।
ସୂଚନାନୁସାରେ, ଏହି ଥାନା ଅଧିନସ୍ଥ ମୋନାର୍କ ଛକରେ ଯୁବତୀ ଜଣକ ରହୁଥିଲେ। ଗତ ୨୦୨୨ରେ ଯୁବତୀ ଜଣକ ଏଏସ୍ଓ ପରୀକ୍ଷା ଦେଇଥିଲେ। ବ୍ରହ୍ମପୁର ବିଶ୍ୱବିଦ୍ୟାଳୟରେ କନିଷ୍ଠ ସହକାରୀ ଭାବେ ଗଜେନ୍ଦ୍ର ସାହୁ ଚାକିରି କରୁଥିଲେ। ୧୯୯୧ରେ କୋଣସି ଅନିୟମିତତା କାର୍ଯ୍ୟକରି ଗଜେନ୍ଦ୍ର ଚାକିରିରୁ ନିଲମ୍ବିତ ହୋଇଥିଲେ।ପରବର୍ତ୍ତୀ ସମୟରେ ଗଜେନ୍ଦ୍ରଙ୍କ ଉପରୁ ନିଲମ୍ବନ ଆଦେଶ ଉଠି ନ ଥିଲା।ଗତ ଜୁଲାଇ ମାସରେ ସେ ଅବସର ନେଇଥିଲେ। ଯୁବତୀଙ୍କ ପରିବାର ସହ ଗଜେନ୍ଦ୍ରଙ୍କ ସମ୍ପର୍କ ରହିଥିଲା। ଏଏସ୍ଓ ସରକାରୀ ଚାକିରି କରାଇ ଦେବି କହି ଯୁବତୀଙ୍କ ପରିବାର ଲୋକଙ୍କୁ ଗଜେନ୍ଦ୍ର କହିଥିଲେ। ପରେ ଯୁବତୀ ଜଣକ ଗତ ୨୦୨୨ ନଭେମ୍ବର ୭ତାରିଖଠାରୁ ୧୮ ନଭେମ୍ବର ୨୦୨୩ ଗୁଗ୍ଲ ପେ’ରେ ୧୮ ଲକ୍ଷ ୧୬ ହଜାର ୨୫୦ ଟଙ୍କା ପ୍ରଦାନ କରିଥିଲେ। ଗତ ବର୍ଷ ଡିସେମ୍ବର ୩୦ ତାରିଖରେ ଏଏସ୍ଓ ପରୀକ୍ଷା ଫଳ ପ୍ରକାଶ ପାଇଥିଲା। ଏଥିରେ ଯୁବତୀଙ୍କ ନାଁ ନ ଥିଲା। ଯୁବତୀଙ୍କ ପରିବାର ଲୋକ ଗଜେନ୍ଦ୍ରଙ୍କୁ ଟଙ୍କା ଫେରସ୍ତ କରିବା ପାଇଁ କହିଥିଲେ। ଏହି ଟଙ୍କା ଆଜି ଦେବି କିଛି ଦିନ ପରେ ଦେଇ ଦେବି କହି ଗଜେନ୍ଦ୍ର ଦିନ ପରେ ଦିନ ଗଡ଼ାଇ ଚାଲିଥିଲେ ଓ ଆଉ ଟଙ୍କା ଫେରସ୍ତ କରି ନ ଥିଲେ। ଏନେଇ ଯୁବତୀ ଜଣକ ଗୋପାଳପୁର ଥାନାରେ ଲିଖିତ ଅଭିଯୋଗ କରିଥିଲେ। ଥାନା କେସ୍ ନଂ ୧୧୧/୨୪ରେ ଏକ ର ଠକେଇ ମାମଲା ରୁଜୁ କରି ପୋଲିସ ତଦନ୍ତ ଆରମ୍ଭ କରିଥିଲା। ଗଜେନ୍ଦ୍ର କଟକ ସିଡିଏ-୭ ଅଞ୍ଚଳରେ ରହୁଥିବାର ଖବର ପାଇ ବୁଧବାର ରାତିରେ ଏକ ପୋଲିସ ଟିମ୍ ସେଠାରେ ଚଢ଼ାଉ କରି କାବୁ କରିଥିଲେ। ଥାନାରେ ଅଟକ ରଖି ପଚାରା ଉଚରା କରିବା ବେଳେ ଚାକିରିରୁ ଗଜେନ୍ଦ୍ର ନିଲମ୍ବିତ କରିବା ଯୁବତୀଙ୍କଠାରୁ ନେଇଥିବା ଟଙ୍କାକୁ ମାମଲାରେ ଖର୍ଚ୍ଚ କରିଦେଇଥିବା ନେଇ ଗଜେନ୍ଦ୍ର ପୋଲିସ ନିକଟରେ ପ୍ରକାଶ କରିଥିଲେ। ଗୁରୁବାର ପୋଲିସ ଗିରଫ କରି କୋର୍ଟ ଚାଲାଣ କରିଥିବା ନେଇ ସୂଚନା ଦେଇଛି।
