ଚେନ୍ନାଇ, ୨୫ା୧୦ (ପି.ଟି.)-ଆର୍. ବୈଶାଳୀ ଓ ବି. ଅଧିବନଙ୍କ ପ୍ରଭାବୀ ପ୍ରଦର୍ଶନ ଯୋଗୁ ଟପ୍ ସିଡ୍ ଭାରତର ଉଭୟ ମହିଳା ଓ ପୁରୁଷ ଦଳ ଏସିଆନ ଅନ୍ଲାଇନ୍ ଟିମ୍ ଚେସ୍ ଚାମ୍ପିୟନଶିପ୍ର ଫାଇନାଲରେ ପ୍ରବେଶ କରିଛନ୍ତି। ଶନିବାର ସେମାନେ ଯଥାକ୍ରମେ ମଙ୍ଗୋଲିଆ ଓ କାଜାଖସ୍ତାନ ବିପକ୍ଷରେ ବିଜୟ ହାସଲ କରିଛନ୍ତି। ମହିଳା ଦଳ ୩.୫-୦.୫ ଏବଂ ୪-୦ରେ ବିଜୟ ଲାଭ କରିଥିବାବେଳେ ପୁରୁଷ ଦଳ ୨.୫-୧.୫ ଏବଂ ୩.୧ରେ ବିଜୟୀ ହୋଇଛି। ପୁରୁଷ ବିଭାଗରେ ବି. ଅଧିବନ ଟପ୍ ବୋର୍ଡର ଉଭୟ ମ୍ୟାଚ୍ରେ ରିନାତ ଜୁମାବାୟେଭଙ୍କୁ ପରାସ୍ତ କରିଥିଲେ। ପ୍ରଥମ ମ୍ୟାଚ୍ରେ ଅଧିବନଙ୍କ ବିଜୟ ହାସଲ କରିଥିବାବେଳେ ନିହାଲ ସରିନ୍. ଏସ୍ପି ସେଥୁରମନ ଏବଂ କେ. ଶଶିକିରଣ ସେମାନଙ୍କ ଗେମ୍ ଡ୍ର’ ରଖିଥିଲେ। ଦ୍ୱିତୀୟ ମ୍ୟାଚ୍ରେ ଅଧିବନ, ସରିନ ଏବଂ ସେତୁରମଣ ସେମାନଙ୍କ ଗେମ୍ରେ ବିଜୟ ହାସଲ କରିଥିବାବେଳେ ଡେନିସ ମାଖନେଭଙ୍କଠାରୁ ଶଶିକିରଣ ପରାଜିତ ହୋଇଯାଇଥିଲେ। ସୂର୍ଯ୍ୟ ଶେଖର ଗାଙ୍ଗୁଲିଙ୍କ ନେତୃତ୍ୱାଧୀନ ଭାରତୀୟ ଦଳ ରବିବାର ଫାଇନାଲରେ ଅଷ୍ଟ୍ରେଲିଆକୁ ଭେଟିବ। ଗାଙ୍ଗୁଲି କିନ୍ତୁ ଶନିବାର ମ୍ୟାଚ ଖେଳି ନ ଥିଲେ। ମହିଳା ସେମିଫାଇନାଲରେ କିନ୍ତୁ ଭାରତ ଉଭୟ ମ୍ୟାଚରେ ସହଜ ବିଜୟ ହାସଲ କରିଥିଲେ। ପ୍ରାଥମିକ ପର୍ଯ୍ୟାୟରେ ଟପ୍ ବୋର୍ଡରେ ସ୍ବର୍ଣ୍ଣ ପଦକ ଲାଭ କରିଥିବା ଆର. ବୈଶାଳୀ ବାତଖୁୟାଗ ମଙ୍ଗୁଟୁଲ୍ ବିପକ୍ଷ ଉଭୟ ଗେମ୍ ଜିତିଥିଲେ। ପ୍ରଥମ ମ୍ୟାଚରେ ବୈଶାଳୀଙ୍କ ବ୍ୟତୀତ ପଦ୍ମିନୀ ରାଉତ ଓ ପି. ନନ୍ଧିଧା ସେମାନଙ୍କ ବିପକ୍ଷ ଗେମ୍ରେ ବିଜୟୀ ହୋଇଥିବାବେଳେ ଗୋମ୍ସ ତାଙ୍କ ଗେମ୍ ଡ୍ର ରଖିଥିଲେ। ଦ୍ୱିତୀୟ ମ୍ୟାଚରେ ବୈଶାଳୀ, ଭକ୍ତି କୁଲକର୍ନୀ, ରାଉତ ଓ ନନ୍ଧିଧାଙ୍କ ବିଜୟ ଫଳରେ ଭାରତୀୟ ଦଳ ୪-୦ରେ ଜିତିଥିଲା।
