ଭୁବନେଶ୍ୱର,୧୪ା୧୨(ସରୋଜ ଜେନା): ଜବାହାରଲାଲ ନେହେରୁ ଇନ୍ଡୋର ଷ୍ଟାଡିୟମରେ ମଙ୍ଗଳବାର ଠାରୁ ଆରମ୍ଭ ହୋଇଯାଇଛି ବିଡବ୍ଲ୍ୟୁଏଫ ଟୁର୍ ସୁପର-୧୦୦ ଓଡ଼ିଶା ମାଷ୍ଟର୍ସ ବ୍ୟାଡମିଣ୍ଟନ ଟୁର୍ନାମେଣ୍ଟ। ୨୭ ଦେଶରୁ ୩୦୦ ପ୍ରତିଯୋଗୀ ଅଂଶଗ୍ରହଣ କରିଥିବା ଏହି ସମ୍ମାନଜନକ ଟୁର୍ନାମେଣ୍ଟର ରାଉଣ୍ଡ ଅଫ୍-୧୬ରେ ପ୍ରକାଶ କରିଛନ୍ତି ଭାରତୀୟ ମହିଳା ଡବଲ୍ସ ଯୋଡି ଅଶ୍ୱିନୀ ପୋନାପ୍ପା ଓ ତନିଶା କାଷ୍ଟ୍ରୋ। ଏହା ବ୍ୟତୀତ ମହିଳା ସିଙ୍ଗଲ୍ସରେ ଉନ୍ନତି ହୁଦା ଓ ପୁରୁଷ ସିଙ୍ଗଲ୍ସରେ କିରଣ ଜର୍ଜ ମଧ୍ୟ ନିଜ ମ୍ୟାଚ୍ରେ ବିଜୟୀ ହୋଇଛନ୍ତି।
କ୍ରମାଗତ ଦୁଇଟି ସୁପର-୧୦୦ ସିରିଜ୍ ଟୁର୍ନାମେଣ୍ଟ ବିଜୟୀ ହୋଇ ଆସିଥିବା ଅଶ୍ୱିନୀ ପୋନାପ୍ପା ଓ ତନିଶା କାଷ୍ଟ୍ରୋଙ୍କ ଯୋଡି ୟୁଏଇର ଏଲିନା ଖାତୁନ ଓ ନୟୋନିକା ରାଜେଶଙ୍କୁ ୨୧-୭ ଓ ୨୧-୧୪ ସେଟରେ ପରାସ୍ତ କରିଛନ୍ତି। ଅନ୍ୟତମ ମହିଳା ଡବଲ୍ସ ଯୋଡି ପଲକ ଅରୋରା ଓ ଉନ୍ନତି ହୁଦା ୨୧-୭ ଓ ୨୧-୧୩ରେ ନିଜ ଦେଶର ସିମରନ୍ ସିଙ୍ଘି ଓ ରିତିକା ଠାକେରଙ୍କୁ ପରାସ୍ତ କରିଛନ୍ତି। ସେହିପରି ଦିନର ପ୍ରଥମ ମିକ୍ସଡ ଡବଲ୍ସ ମ୍ୟାଚରେ ଅଶ୍ୱିନୀ ପୋନାପ୍ପା ଓ ରୋହନ କପୁର ବିଜୟ ହାସଲ କରି ପରବର୍ତ୍ତୀ ରାଉଣ୍ଡରେ ପ୍ରବେଶ କରିଥିଲେ। ଉଭୟ ଖେଳାଳି ମାଲେସିଆର ଟିଙ୍ଗ ଶି ଓ୍ବି ଓୟେନ୍ ଓ ଗାନ ଜିଙ୍ଗ ଏର୍ଙ୍କୁ ୨୧-୧୯ ଓ ୨୧-୧୫ ସେଟରେ ପରାସ୍ତ କରିଥିଲେ। ମହିଳା ସିଙ୍ଗଲ୍ସରେ ଟୁର୍ନାମେଣ୍ଟର ଟପ୍ସିଡ୍ ରହିଥିବା ଚାଇନିଜ ତାଇପେର ଓ୍ବେନ୍ ଚି ହୁ ୨୧-୧୪, ୨୧-୧୪ରେ ଓ୍ବିକ୍ଟୋରିଆ ଡାବଜିନସ୍କାଙ୍କୁ ପରାସ୍ତ କରିଥିଲେ।
ମହିଳା ସିଙ୍ଗଲ୍ସରେ ପ୍ରତିଭାବାନ ଉନ୍ନତି ହୁଦା ୨୧-୧୦ ଓ ୨୧-୮ରେ ଉଗାଣ୍ଡାର ହୁସିନା କୋବୁଗାବେଙ୍କୁ ପରାସ୍ତ କରିଥିଲେ। ପୁରୁଷ ସିଙ୍ଗଲ୍ସରେ ଚିରାଗ୍ ସେନ୍ ୨୧-୧୨ ଓ ୨୧-୯ ସେଟ୍ରେ ସନିଥ୍ ଦୟାନନ୍ଦ ସିମୋଗାଙ୍କୁ ହରାଇଥିଲେ। ଡିଫେଣ୍ଡିଂ ଚାମ୍ପିୟନ କିରଣ ଜର୍ଜ ୨୧-୧୨, ୧୦-୨୧ ଓ ୨୧-୧୨ ସେଟରେ ସତୀଶ କୁମାରଙ୍କୁ ହରାଇ ପରବର୍ତ୍ତୀ ରାଉଣ୍ଡକୁ ଉନ୍ନୀତ ହୋଇଥିଲେ।
