ଅମରପାଲି,୨୧।୭(ପୀତାମ୍ବର ସାହୁ): ସୁବର୍ଣ୍ଣପୁର ଜିଲା ଉଲୁଣ୍ଡା ବ୍ଲକର ଯାଲୋଏ ଗ୍ରାମର ମେଧାବୀ ଛାତ୍ର ଅରୋଶିଷ ପଣ୍ଡା ଚଳିତ ବର୍ଷର ଏନଇଇଟି (NEET UG) ପ୍ରବେଶିକା ପରୀକ୍ଷାରେ ଉଲ୍ଲେଖନୀୟ ସଫଳତା ହାସଲ କରିଛନ୍ତି। ସେ ସମୁଦାୟ ୭୨୦ ନମ୍ବରରୁ ୫୭୨ ନମ୍ବର ରଖି ସର୍ବଭାରତୀୟ ସ୍ତରରେ ୨୧,୪୭୧ ରାଙ୍କ ହାସଲ କରିଛନ୍ତି। ଦ୍ୱିତୀୟ ପ୍ରଚେଷ୍ଟାରେ ଏହି ସଫଳତା ପାଇ ସେ ସମଗ୍ର ଅଞ୍ଚଳ ପାଇଁ ଗର୍ବ ଓ ଗୌରବ ଆଣିଦେଇଛନ୍ତି।
ଅରୋଶିଷଙ୍କ ମାତା ସସ୍ମିତା ଶତପଥୀ ଜଣେ ସାମୟିକ କଳା ଶିକ୍ଷୟିତ୍ରୀ ହୋଇଥିବାବେଳେ ପିତା ମହାଦେବ ପଣ୍ଡା ଯାଲୋଏ ଅରବିନ୍ଦ ପୂର୍ଣ୍ଣାଙ୍ଗ ଶିକ୍ଷା କେନ୍ଦ୍ରର ଅଧ୍ୟକ୍ଷ ଅଟନ୍ତି। ନିୟମିତ ପରିଶ୍ରମ ହିଁ ସଫଳତାର ମୂଳମନ୍ତ୍ର ବୋଲି ମତ ଦେଇ ଅରୋଶିଷ ପ୍ରତିଦିନ ୧୨ରୁ ୧୪ ଘଣ୍ଟା ପାଠପଢ଼ା କରୁଥିଲେ। ତାଙ୍କର ଏହି ସଫଳତାର ଶ୍ରେୟ ସେ ନିଜର ମାତାପିତା, ଶିକ୍ଷକ, ପରିବାର ସଦସ୍ୟ ଏବଂ ସାଙ୍ଗସାଥୀମାନଙ୍କୁ ପ୍ରଦାନ କରିଛନ୍ତି।
ଶିକ୍ଷାଗତ ପୃଷ୍ଠଭୂମିକୁ ଦେଖିଲେ, ଅରୋଶିଷ ପ୍ରଥମରୁ ପଞ୍ଚମ ଶ୍ରେଣୀ ପର୍ଯ୍ୟନ୍ତ ଯାଲୋଏ ଅରବିନ୍ଦ ପୂର୍ଣ୍ଣାଙ୍ଗ ଶିକ୍ଷା ଗବେଷଣା କେନ୍ଦ୍ରରେ ପଢ଼ିଥିଲେ। ପରେ ସୋନପୁରସ୍ଥିତ ସାହାରା ଟ୍ରଷ୍ଟ ହାଇସ୍କୁଲରୁ ଦଶମ ଶ୍ରେଣୀରେ ୮୯ ପ୍ରତିଶତ ନମ୍ବର ରଖି ଉତ୍ତୀର୍ଣ୍ଣ ହୋଇଥିବାବେଳେ ବଲାଙ୍ଗୀରସ୍ଥିତ ଯୁବୋଦୟ କଲେଜରୁ ଯୁକ୍ତ ଦୁଇ ବିଜ୍ଞାନରେ ୭୦ ପ୍ରତିଶତ ନମ୍ବର ସହ କୃତକାର୍ଯ୍ୟ ହୋଇଥିଲେ।
ବିଶେଷକରି ଚଳିତ ବର୍ଷ ସେ ଆଇଜର (IISER) ପ୍ରବେଶିକା ପରୀକ୍ଷାରେ ୧୪୬ ନମ୍ବର ରଖି କୃତକାର୍ଯ୍ୟ ହୋଇଥିଲେ ମଧ୍ୟ ଭବଷ୍ୟତରେ ଜଣେ ଭଲ ଡାକ୍ତର ହେବାର ସ୍ବପ୍ନକୁ ସାକାର କରିବା ଲକ୍ଷ୍ୟରେ ସେ ଏନଇଇଟିକୁ ହିଁ ପ୍ରାଥମିକତା ଦେଇଥିଲେ। ତାଙ୍କର ଏହି ଜହ୍ନିତ ସଫଳତା ପାଇଁ ବିଭିନ୍ନ ମହଲରୁ ତାଙ୍କୁ ଶୁଭେଚ୍ଛା ଓ ସମ୍ବର୍ଦ୍ଧନାର ସୁଅ ଛୁଟିଛି।
