ନୂଆଦିଲ୍ଲୀ, ୨୫ା୮: ଭାରତ-ଚାଇନା ସୀମା ବିବାଦର ସମାଧାନ ଲାଗି କୂଟନୈତିକ ଓ ସାମରିକ ସ୍ତରରେ ଆଲୋଚନା ଜାରି ରହିଛି। ଲଦାଖରେ ଚାଇନା ଅନୁପ୍ରବେଶ କରି ଟେଣ୍ଟ କରିବା ଓ ବିସ୍ତାରବାଦୀ ଆଭିମୁଖ୍ୟର ସମାଧାନ ଏ ପର୍ଯ୍ୟନ୍ତ ହୋଇପାରି ନାହିଁ। ଦୁଇଦେଶର ସେନା ଅଧିକାରୀସ୍ତରୀୟ ଆଲୋଚନା ୫ ଥର ହେଲାଣି। ତଥାପି ସମାଧାନ ହୋଇପାରି ନାହିଁ। ଆଲୋଚନା ମାଧ୍ୟମରେ ସୀମା ବିବାଦର ସମାଧାନ ହୋଇ ନ ପାରିଲେ ବିକଳ୍ପ ଭାବେ ସେନା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଚିଫ୍ ଅଫ୍ ଡିଫେନ୍ସ ଷ୍ଟାଫ୍(ସିଡିଏସ୍) ବିପିନ୍ ରାଓ୍ବତ୍ ସୋମବାର କହିଛନ୍ତି। ଚାଇନା ସେନାର ଲଦାଖରେ ସୀମା ଉଲ୍ଲଂଘନର କଡ଼ା ଜବାବ ଦିଆଯିବ ବୋଲି ସେ ପ୍ରକାଶ କରିଛନ୍ତି। ତେବେ ଚାଇନା ସେନାକୁ ପଛକୁ ହଟାଇବା ଲାଗି ସେନା ପକ୍ଷରୁ କିଭଳି ସାମରିକ ପଦକ୍ଷେପ ଗ୍ରହଣ କରାଯିବ, ସେ ସମ୍ପର୍କରେ ରାଓ୍ବତ୍ କିଛି କହିବାକୁ ମନା କରିଦେଇଛନ୍ତି। ଏପ୍ରିଲରୁ ଚାଇନା ଏଭଳି ଦୁଃସାହସ କରିଥିବାବେଳେ ଜୁନ୍ ୧୫ରେ ଦୁଇସେନା ମଧ୍ୟରେ ମୁହାଁମୁହିଁ ହୋଇଥିଲା। ଭାରତର ୨୦ ଯବାନ ଶହୀଦ ହୋଇଥିଲେ। ପରେ ଦୁଇଦେଶ ତିକ୍ତିତା ଦୂର ଲାଗି ସହମତି ପ୍ରକାଶ କରିବାରୁ ଆଲୋଚନା ଆରମ୍ଭ ହୋଇଥିଲା। ଆଲୋଚନା ମୁତାବକ ଚାଇନା ସେନା ସମ୍ପୂର୍ଣ୍ଣ ପ୍ରତ୍ୟାହାର କରାଯାଇ ନ ଥିବା ରାଓ୍ବତ୍ କହିଛନ୍ତି। ଫିଙ୍ଗର ୫, ଫିଙ୍ଗର ୮ରେ ଏବେବି ଚାଇନା ସେନା ଅଛନ୍ତି। ଏଲ୍ଏସିରେ ଦୁଇ ଦେଶର ସୈନ୍ୟ ଜଗି ରହିଥିବାବେଳେ ଆଲୋଚନା ଉପରେ ସମସ୍ତଙ୍କ ନଜର ରହିଛି। ଚାଇନା ପଛକୁ ନ ଫେରିଲେ କିମ୍ବା ଆଲୋଚନା ମାଧ୍ୟମରେ ସମାଧାନ ପନ୍ଥା ନ ବାହାରିଲେ ସେନା ବିକଳ୍ପ କଥା ଚିନ୍ତା କରାଯିବ ବୋଲି ରାଓ୍ବତ୍ ପ୍ରକାଶ କରିଛନ୍ତି।
