କେପ୍ଟାଉନ (ଦକ୍ଷିଣ ଆଫ୍ରିକା), ୫ା୧୨ (ଏପି)-କୋଭିଡ୍ ଟେଷ୍ଟରେ ଆଉ ଜଣେ ଖେଳାଳି ପଜିଟିଭ୍ ହେବାରୁ ଦକ୍ଷିଣ ଆଫ୍ରିକା ଓ ଇଂଲଣ୍ଡ ମଧ୍ୟରେ ଖେଳାଯିବାକୁଥିବା ପ୍ରଥମ ଅନ୍ତର୍ଜାତୀୟ କ୍ରିକେଟ ମ୍ୟାଚକୁ ଶୁକ୍ରବାର ସ୍ଥଗିତ ରଖାଯାଇଛି। ଏହି ମ୍ୟାଚ୍ ରବିବାରକୁ ଘୁଞ୍ଚାଇ ଦିଆଯାଇଥିବା ଦୁଇ ଦେଶର କ୍ରିକେଟ ଆସୋସିଏଶନ ପ୍ରକାଶ କରିଛନ୍ତି। ଉଭୟ ଦଳ, ମ୍ୟାଚ ଅଫିସିଆଲ ଏବଂ ମ୍ୟାଚ ସହିତ ସମ୍ପୃକ୍ତ ସମସ୍ତ ଅଫିସିଆଲଙ୍କ ହିତ ଓ ସୁରକ୍ଷା ଦୃଷ୍ଟିରୁ ଏହି ନିଷ୍ପତ୍ତି ନିଆଯାଇଥିବା କ୍ରିକେଟ ଦକ୍ଷିଣ ଆଫ୍ରିକା (ସିଏସ୍ଏ) ଏବଂ ଇଂଲଣ୍ଡ ଓ ଓ୍ବେଲ୍ସ କ୍ରିକେଟ ବୋର୍ଡ (ଇସିବି) ପକ୍ଷରୁ ସ୍ପଷ୍ଟ କରିଦିଆଯାଇଛି। ଉଭୟ ବୋର୍ଡର ସିଇଓ, ସିଏସ୍ଏର କୁଗ୍ୟାଣ୍ଡ୍ରି ଗୋଭେଣ୍ଡର ଏବଂ ଇସିବିର ଟମ୍ ହାରିସନ ମ୍ୟାଚ ସ୍ଥଗିତ ପାଇଁ ରାଜି ହୋଇଯାଇଥିଲେ। କରୋନା ସଂକ୍ରମିତ ଖେଳାଳିଙ୍କ ନାମ ପ୍ରକାଶ କରାଯାଇ ନାହିଁ। ତେବେ ନଭେମ୍ବର ମଧ୍ୟ ଭାଗରେ ଇଂଲଣ୍ଡ ଟୁର୍ ଆରମ୍ଭ ହେବାପୂର୍ବରୁ କରୋନା ଟେଷ୍ଟରେ ପଜିଟିଭ୍ ହେବାରେ ସେ ତୃତୀୟ ଦକ୍ଷିଣ ଆଫ୍ରିକୀୟ ଖେଳାଳି। କେପ୍ଟାଉନ୍ସ୍ଥିତ ହୋଟେଲର ବାୟୋବବଲରେ ପ୍ରବେଶ କରିବା ପୂର୍ବରୁ ଜଣେ ଖେଳାଳି ପଜିଟିଭ ଚିହ୍ନଟ ହୋଇଥିଲେ। ବାୟୋବବଲରେ ଦ୍ୱିତୀୟ ପଜିଟିଭ ଘଟଣା ନିକଟରେ ଶେଷ ହୋଇଥିବା ଟି୨୦ ସିରିଜ ପୂର୍ବରୁ ଦେଖିବାକୁ ମିଳିଥିଲା। ଏହି ସିରିଜରେ ଇଂଲଣ୍ଡ ୩-୦ରେ ବିଜୟ ଲାଭ କରିଥିଲା। ଦିନିକିଆ ସିରିଜ କାର୍ଯ୍ୟସୂଚୀରେ ପରିବର୍ତ୍ତନ ଫଳରେ ରବିବାର ଓ ସୋମବାର ପଛକୁ ପଛ ଦୁଇଟି ମ୍ୟାଚ ଖେଳାଯିବ। ବୁଧବାର ତୃତୀୟ ଅନ୍ତର୍ଜାତୀୟ ଦିନିକିଆ ସହ ଇଂଲଣ୍ଡ ଟୁର୍ ଶେଷ ହେବ। ଓପନିଂ ଗେମ୍ ବର୍ତ୍ତମାନ ପାର୍ଲ ସିଟି ନିକଟବର୍ତ୍ତୀ ବୋଲାଣ୍ଡ ପାର୍କଠାରେ ଖେଳାଯିବାକୁଥିବାବେଳେ କେପ୍ଟାଉନ୍ରେ ଶେଷ ଦୁଇ ଅନ୍ତର୍ଜାତୀୟ ଦିନିକିଆ ଖେଳାଯିବ।
