ଭୁବନେଶ୍ୱର,୧।୨ (ବ୍ୟୁରୋ): ବିଶ୍ୱକପ୍ ହକି ପାଇଁ ନବବଧୂ ପରି ସଜେଇ ହୋଇଛି ରାଜଧାନୀ ଭୁବନେଶ୍ୱର। ସହରର ସ୍ବଚ୍ଛତା ସହିତ ସୌନ୍ଦର୍ଯ୍ୟକରଣ ଉପରେ ବିଏମ୍ସି ବିଶେଷ ଭାବେ ଗୁରୁତ୍ୱାରୋପ କରିଥିଲା। ସହରର କାନ୍ଥବାଡ଼ ସହିତ ଓଭରବ୍ରିଜ୍, ରାସ୍ତାଘାଟ, ମୁଖ୍ୟ ଛକ ଆଦି ବିଭିନ୍ନ ସ୍ଥାନ ନୂଆ ରୂପ ପାଇଥିଲା। ତେବେ ହକି ପୂର୍ବରୁ ଯେଉଁ ଅନୁପାତରେ କାମ ହେବାକୁ ନିର୍ଦ୍ଧାରଣ କରାଯାଇଥିଲା ତାହା ହୋଇପାରି ନ ଥିଲା। ଅପରପକ୍ଷେ ସହରକୁ ହକି ପ୍ରଶଂସକଙ୍କ ଆଗମନ କାରଣରୁ ଆଉ କାମ କରିବା ମଧ୍ୟ ସମ୍ଭବ ହୋଇ ନ ଥିଲା। ତେବେ ବନ୍ଦ ରହିଥିବା ସୌନ୍ଦର୍ଯ୍ୟକରଣ କାମ ଆଉଥରେ ସୋମବାରଠାରୁ ଆରମ୍ଭ ହୋଇଛି। ସେହିପରି ହକି ସରିବା ପରେ ମଧ୍ୟ ସହରର ସୌନ୍ଦର୍ଯ୍ୟକରଣ, ସବୁଜିମା, ସ୍ବଚ୍ଛତା କିଭଳି ବଳବତ୍ତର ରହିବ ସେଥିପାଇଁ ଏବେ ପଦକ୍ଷେପ ନିଆଯାଉଛି। ଏନେଇ ବିଏମ୍ସିର ବିଭିନ୍ନ ଅଧିକାରୀଙ୍କ ମଧ୍ୟରେ ଦାୟିତ୍ୱ ବଣ୍ଟନ କରାଯାଇଛି। ବର୍ତ୍ତମାନ ସହରର ୨୭ଟି ସ୍ଥାନରେ ପ୍ଲେସ୍ମେକିଂ କରାଯାଇଥିବାବେଳେ ତାହାକୁ ୬୦କୁ ବୃଦ୍ଧି କରାଯାଇଛି। ଖୁବ୍ଶୀଘ୍ର ଚିହ୍ନଟ ହୋଇଥିବା ବାକି ୩୩ଟି ସ୍ଥାନର ରୂପରେଖ ବଦଳିବ। ସେହିପରି ସୌନ୍ଦର୍ଯ୍ୟକରଣ କରାଯାଇଥିବା ସ୍ଥାନଗୁଡିକ ଯେପରି ଖୋଳାଖୋଳି ନ ହୁଏ, ରାସ୍ତାରେ ଶୁଖିଲା ଡାଳ ନ ପଡେ, ଗଛରେ ନିୟମିତ ପାଣି ଦେବା, ଚ୍ରିତ୍ରରୁ ରଙ୍ଗ ଛାଡିଲେ ତାହା କରିବା ଭଳି ଅନ୍ୟାନ୍ୟ ରକ୍ଷଣାବେକ୍ଷଣ କାର୍ଯ୍ୟ ସମ୍ପୃକ୍ତ ଅଧିକାରୀଙ୍କ ଦାୟିତ୍ୱରେ ରହିବ। ଏହାଦ୍ୱାରା ରାଜଧାନୀ ଭୁବନେଶ୍ୱରର ସ୍ବଚ୍ଛତା ଏବଂ ସୁନ୍ଦରତା ସର୍ବଦା ବଜାୟ ରହିପାରିବ। ହକି ପାଇଁ କୋଟି କୋଟି ଟଙ୍କା ଖର୍ଚ୍ଚ କରି ସହରର ରୂପରେଖ ବଦଳାଯାଇଥିବାରୁ ଏବେ ବିଏମ୍ସିକୁ ବିଭିନ୍ନ ମହଲରୁ ପ୍ରଶଂସା କରାଯାଉଛି। ଅପରପକ୍ଷେ ଆଗକୁ ସ୍ବଚ୍ଛ ସର୍ବେକ୍ଷଣ ଥିବାରୁ ବିଏମ୍ସି ସ୍ବଚ୍ଛତା ଓ ସୌନ୍ଦର୍ଯ୍ୟକରଣକୁ ଆହୁରି ବଢ଼ାଇବାକୁ ସୁଯୋଗ ପାଇଛି।
