ଭୁବନେଶ୍ୱର,୩।୫(ବ୍ୟୁରୋ): ବହୁ ଚର୍ଚ୍ଚିତ ଅଞ୍ଜନା ମିଶ୍ର ଗଣବଳାତ୍କାର ମାମଲାରେ ହାଇକୋର୍ଟଙ୍କୁ ଚିଠି ଲେଖିଛନ୍ତି ନିଜେ ପୀଡିତା। ସେ ତାଙ୍କ ଚିଠିରେ ଉଲ୍ଲେଖ କରିଛନ୍ତି ଯେ, ତାଙ୍କ ବଳାତ୍କାର ପଛରେ ଏକ ବଡ଼ ଷଡ଼ଯନ୍ତ୍ର ଥିଲା। ଗିରଫ ହୋଇଥିବା ସମସ୍ତ ଅଭିଯୁକ୍ତ ଗଣବଳାତ୍କାରରେ ସାମିଲ ଥିଲେ। ପ୍ରତିଶୋଧ ନେବାପାଇଁ ଷଡ଼ଯନ୍ତ୍ର କରାଯାଇ ତାଙ୍କୁ ବଳାତ୍କାର କରାଯାଇଥିଲା। ମୁଖ୍ୟ ଅଭିଯୁକ୍ତ ବିବନ ବିଶ୍ୱାଳ ଧରାପଡ଼ିଥିଲେ ମଧ୍ୟ ସିବିଆଇ ଷଡ଼ଯନ୍ତ୍ର ଦିଗରେ ତଦନ୍ତ କରୁନାହିଁ। ଷଡ଼ଯନ୍ତ୍ରର ପର୍ଦ୍ଦାଫାଶ ସହ ସମ୍ପୃକ୍ତ ଷଡ଼ଯନ୍ତ୍ରକାରୀଙ୍କୁ ସାମ୍ନାକୁ ଆଣିବାକୁ ସିବିଆଇକୁ ନିର୍ଦ୍ଦେଶ ଦେବା ପାଇଁ ଅଞ୍ଜନା ନିବେଦନ କରିଛନ୍ତି। ତେବେ ନିଜ ଓକିଲଙ୍କ ଅନୁପସ୍ଥିତିରେ ଅଞ୍ଜନା ନିଜେ ଗତ ୫ ତାରିଖରେ ଏହି ଚିଠି ଲେଖିଥିବା କହିଛନ୍ତି।
ଦୀର୍ଘ ୨୨ବର୍ଷ ପରେ ଅଞ୍ଜନା ମିଶ୍ର ଗଣବଳାତ୍କାର ଘଟଣାର ମୁଖ୍ୟ ଅଭିଯୁକ୍ତ ବିବନଙ୍କୁ ମହାରାଷ୍ଟ୍ର ପୁଣେରୁ ଗିରଫ କରିଥିଲା କମିଶନରେଟ୍ ପୋଲିସ। ବିବିନଙ୍କ ଗିରଫ ପରେ ପୀଡିତା ଅଞ୍ଜନାଙ୍କୁ ନ୍ୟାୟ ମିଳିଲା ବୋଲି ରାଜ୍ୟରେ ଚର୍ଚ୍ଚା ଜୋର ଧରିଥିଲା। ଏହି ମାମଲାର ତଦନ୍ତଭାର ସିବିଆଇ ହାତରେ ଥିବାରୁ ଗିରଫ ପରେ କମିଶନରେଟ ପୋଲିସ ଅଭିଯୁକ୍ତ ବିବନଙ୍କୁ ହସ୍ତାନ୍ତର କରିଥିଲା। ଏହାପରେ ଚୁପ୍ ବସିଥିବା ସିବିଆଇ ହଠାତ୍ ତତ୍ପର ହୋଇପଡ଼ିଥିଲା। ଚାର୍ଜଶିଟ୍ ଦାଖଲ କରିବାକୁ ଲାଗି ପଡିବା ସହ ବିବନ କେମିତି ଓଡ଼ିଶା ବାହାରକୁ ଖସିବାରେ ସମର୍ଥ ହେଲା ଓ ଏତେଦିନ କେଉଁଠାରେ ଲୁଚିଥିଲେ ସେସବୁ ଦିଗରେ ତଦନ୍ତ କରି ପ୍ରମାଣ ଯୋଗାଡ଼ କରିଥିଲା। ତେବେ ପୀଡିତା
ଅଞ୍ଜନା ଯେଉଁ ଦାବି ବାରମ୍ବାର ଦୋହରାଉଛନ୍ତି ସେ ଦିଗରେ ସିବିଆଇ ପକ୍ଷରୁ କୌଣସି ଆଖିଦୃଶିଆ ତଦନ୍ତ ଦେଖିବାକୁ ମିଳୁନାହିଁ।
