ଭାସ୍କୋ, ୨୪।୧୨- ସ୍ଥାନୀୟ ତିଳକ ମଇଦାନରେ ବୁଧବାର ଅନୁଷ୍ଠିତ ଇଣ୍ଡିଆନ ସୁପରଲିଗ୍ (ଆଇଏସ୍ଏଲ୍) ମ୍ୟାଚରେ ଏଫ୍ସି ଗୋଆ ୨-୧ ଗୋଲରେ ଜାମସେଦପୁର ଏଫ୍ସିକୁ ପରାସ୍ତ କରିଛି। ୩୩ତମ ମିନିଟରେ ଷ୍ଟିଫେନ ଏଜେଙ୍କ ଗୋଲ ବଳରେ ଜାମସେଦପୁର ପ୍ରଥମାର୍ଦ୍ଧରେ ଅଗ୍ରଣୀ ରହିଥିଲା। ମାତ୍ର ଦ୍ୱିତୀୟାର୍ଦ୍ଧରେ ଇଗର ଆଙ୍ଗୁଲୋଙ୍କ ଡବଲ ଗୋଲ ବଳରେ ଗୋଆ ନାଟକୀୟଭାବେ ବିଜୟୀ ହୋଇଥିଲା। ୯୦ ମିନିଟ ପର୍ଯ୍ୟନ୍ତ ଖେଳ ୧-୧ ସ୍ଥିତିରେ ଥିଲା। ମାତ୍ର ଇଞ୍ଜୁରି ଟାଇମ୍(୯୦+୪)ରେ ଆଙ୍ଗୁଲୋଙ୍କ ଗୋଲ ଜାମସେଦପୁରକୁ ପରାଜୟ ସ୍ବାଦ ଚଖାଇଲା। ପୂର୍ବରୁ ୬୪ତମ ମିନିଟରେ ଗୋଆକୁ ମିଳିଥିବା ପେନାଲ୍ଟି ସୁଯୋଗକୁ ସଦ୍ବ୍ୟବହାର କରି ବ୍ୟକ୍ତିଗତଭାବେ ପ୍ରଥମ ଗୋଲଟି ସ୍କୋର କରିଥିଲେ ଆଙ୍ଗୁଲୋ। ରୋମାଞ୍ଚକ ବିଜୟ ସହ ଗୋଆ ପୁରା ୩ ପଏଣ୍ଟ ପାଇ ଟେବୁଲର ୫ମ ସ୍ଥାନକୁ ଉନ୍ନୀତ ହୋଇଛି। ପୂର୍ବରୁ ଦଳ ୭ମ ସ୍ଥାନରେ ଥିଲା। ୮ ମ୍ୟାଚରୁ ୩ ବିଜୟ, ୨ ଡ୍ର ଓ ୩ ପରାଜୟ ସହ ଗୋଆ ୧୧ ପଏଣ୍ଟ ପାଇଛି। ଅନ୍ୟପକ୍ଷରେ ଜାମସେଦପୁର ଦ୍ୱିତୀୟ ପରାଜୟ ସହ ୬ଷ୍ଠ ସ୍ଥାନକୁ ଖସିଛି। ଦଳ ୮ ମ୍ୟାଚରୁ ୨ ବିଜୟ, ୨ ପରାଜୟ ଓ ୪ ଡ୍ର ସହ ୧୦ ପଏଣ୍ଟରେ ରହିଛି। ଗୋଆର ଇଡୁ ବେଡିଆ ପାସ୍ ଅଫ୍ ଦି ମ୍ୟାଚ ଏବଂ ଜର୍ଜ ମେଣ୍ଡୋଜା ହିରୋ ଅଫ୍ ଦି ମ୍ୟାଚ ପୁରସ୍କାର ପାଇଛନ୍ତି।
