ଅନୁଗୋଳ ଅଫିସ, ୨୮ା୬: ଚଲାପଥ ଛାଡ଼ି ହାତୀ ଜନବସତି ଆଡ଼େ ଯାଉଥିଲେ ଏବେ ଆଗୁଆ ସତର୍କ କରିହେବ ଲୋକଙ୍କୁ। ଏହାଦ୍ୱାରା ହାତୀ ସହ ମଣିଷର ମୁହାଁ ମୁହିଁ କୁ ଏଡ଼ାଇ ଦିଆଯିବା ସହ ହାତୀକୁ ଜଙ୍ଗଲ ମଧ୍ୟକୁ ତୁରନ୍ତ ଘଉଡ଼ାଇ ଦିଆଯାଇପାରିବ। ତେବେ ଏସବୁ ସମ୍ଭବ କରିବାରେ ବନ ବିଭାଗକୁ ସହଯୋଗ କରିବେ ସ୍ଥାନୀୟ ଜନସାଧାରଣ। ଏଥିପାଇଁ ବନ ବିଭାଗ ପକ୍ଷରୁ ‘ଅନୁଗୋଳ ବନସାଥୀ’ ମୋବାଇଲ୍ ଆପ୍ ବିକଶିତ କରାଯାଇଥିବା ବେଳେ ଶନିବାର ଅନୁଗୋଳ ବନଖଣ୍ଡରେ ଏହାର ଆରମ୍ଭ କରାଯାଇଛି।
ଅନୁଗୋଳ ବନଖଣ୍ଡ ଅଧିକାରୀ ଭି.କାର୍ତ୍ତିକଙ୍କ ଉପସ୍ଥିତିରେ ଅନୁଗୋଳ ରେଞ୍ଜର କଲେଜ୍ରେ ଏହି ମୋବାଇଲ୍ ଆପ୍ର ଉଦ୍ଘାଟନ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ଏଥିରେ କଲେଜର କର୍ମଚାରୀମାନେ ଉପସ୍ଥିତ ଥିଲେ। ଜିଲାର ଅନୁଗୋଳ, ବଅଁରପାଳ, ତାଳଚେର, କାଣିହଁା ଓ ଛେଣ୍ଡିପଦା ରେଞ୍ଜରେ ଏହି ବନସାଥୀ ଆପ୍ କାର୍ଯ୍ୟ କରିବ। ଗୁଗୁଲ ପ୍ଲେ ଷ୍ଟୋରରୁ ଏହି ଆପ୍ ମାଗଣାରେ ସ୍ଥାନୀୟ ଲୋକେ ଡାଉନ୍ଲୋଡ କରିବା ସହ ଏଥିରେ ଯୋଡ଼ି ହୋଇପାରିବେ ବୋଲି ବନଖଣ୍ଡ ଅଧିକାରୀ କାର୍ତ୍ତିକ ପ୍ରକାଶ କରିଛନ୍ତି। ସେ କହିଛନ୍ତି, ଏହି ଆପ୍ ଦ୍ୱାରା ବନ୍ୟଜନ୍ତୁ ଓ ମଣିଷଙ୍କ ମଧ୍ୟରେ ଅନେକ ସମୟରେ ଉପୁଜୁଥିବା ମୁହାଁ ମୁହିଁ ସ୍ଥିତିକୁ ରୋକିହେବ। ବନ୍ୟଜନ୍ତୁମାନଙ୍କ ଗତିବିଧି ସମ୍ବନ୍ଧୀୟ ସୂଚନା ପ୍ରଭାବିତ ହେଉଥିବା ଗ୍ରାମର ଲୋକଙ୍କ ନିକଟରେ ପହଞ୍ଚାଇହେବ। ସ୍ଥାନୀୟ ଲୋକେ ମଧ୍ୟ ଆପ୍ ମାଧ୍ୟମରେ ବନ୍ୟଜନ୍ତୁଙ୍କ ସୂଚନା ବିଭାଗକୁ ଦେଇପାରିବେ। ଏଥିପାଇଁ ଅନୁଗୋଳ ବନଖଣ୍ଡରେ କେନ୍ଦ୍ରୀୟ ନିୟନ୍ତ୍ରଣ କକ୍ଷ ରହିବ। ଲୋକେ ଟୋଲ ଫ୍ରି ନମ୍ବର-୧୮୦୦୩୧୫୫୫୫୫କୁ କଲ୍ କରି ଜଙ୍ଗଲ ଓ ବନ୍ୟଜନ୍ତୁଙ୍କ ସମ୍ପର୍କରେ ତଥ୍ୟ ପ୍ରଦାନ କରିପାରିବେ। ଏହି ଆପ୍ ବନ୍ୟଜନ୍ତୁଙ୍କ ସମ୍ପର୍କରେ ସୂଚନା, ଅଭିଯୋଗ ପଞ୍ଜୀକରଣ ସହ ସମାଧାନ ଓ ଚାରା ଆବଶ୍ୟକତା ଆଦି ୩ ପ୍ରକାର ସେବା ଦେଇପାରିବ ବୋଲି ବନଖଣ୍ଡ ଅଧିକାରୀ କାର୍ତ୍ତିକ ପ୍ରକାଶ କରିଛନ୍ତି।
