ଚେନ୍ନାଇ,୨୮।୧୦ (ଆଇଏଏନ୍ଏସ୍):ବରିଷ୍ଠ ଆଇଏଏସ୍ ଅଫିସର ତଥା ଆଣ୍ଡାମାନ ନିକୋବର ଦ୍ୱୀପପୁଞ୍ଜର ପୂର୍ବତନ ମୁଖ୍ୟ ଶାସନ ସଚିବ ଜିତେନ୍ଦ୍ର ନାରାୟଣ ନିଯୁକ୍ତି ପାଇଁ ସେକ୍ସ ର଼୍ୟାକେଟ୍ର ମୁଖ୍ୟ ଥିବା ଜଣାପଡ଼ିଛି। ତାଙ୍କର ପୋର୍ଟ ବ୍ଲେୟାର ବାସଭବନକୁ ୨୦ ଜଣ ମହିଳାଙ୍କୁ ନିଆଯାଇଥିବା ଅଭିଯୋଗ ହୋଇଛି। ସେହି ମହିଳାମାନଙ୍କୁ ଯୌନ ଶୋଷଣ କରାଯିବା ପରେ ସରକାରୀ ନିଯୁକ୍ତି ଦିଆଯାଇଥିଲା। ଜଣେ ୨୦ ବର୍ଷୀୟା ଯୁବତୀ ଜିତେନ୍ଦ୍ର ନାରାୟଣ ଏବଂ ଆଣ୍ଡାମାନ ନିକୋବରର ତତ୍କାଳୀନ ଶ୍ରମ କମିଶନର ଆର୍.ଏଲ୍. ଋଷିଙ୍କ ବିରୋଧରେ ଯୌନ ଶୋଷଣ ଓ ଗଣବଳାତ୍କାର ଅଭିଯୋଗ ଆଣିବା ପରେ ଘଟଣା ପଦାକୁ ଆସିଥିଲା। ଯୁବତୀଙ୍କ ଅଭିଯୋଗ ଅନୁଯାୟୀ ଜଣେ ବ୍ୟକ୍ତି ତାଙ୍କୁ ଶ୍ରମ କମିଶନରଙ୍କ ସହ ପରିିଚିତ କରାଇବା ପରେ ତତ୍କାଳୀନ ମୁଖ୍ୟସଚିବଙ୍କ ଘରକୁ ନିଆଯାଇଥିଲା। ସେଠାରେ ତାଙ୍କୁ ଜବରଦସ୍ତ ମଦ ପିଆଯାଇଥିଲା ଏବଂ ମୁଖ୍ୟସଚିବ ଓ ଶ୍ରମ କମିଶନର ତାଙ୍କୁ ବଳାତ୍କାର କରିଥିଲେ ବୋଲି ଯୁବତୀ ଜଣକ ଅଭିଯୋଗରେ ଦର୍ଶାଇଥିଲେ। ମୁଖ୍ୟ ସଚିବ ପୋର୍ଟ ବ୍ଲେୟାରରୁ ନୂଆଦିଲ୍ଲୀ ବଦଳି ହେବା ପରେ ତାଙ୍କ ବାସଭବନରେ ଲାଗିଥିବା ସିସିଟିଭି କ୍ୟାମେରାର ହାର୍ଡ ଡିସ୍କକୁ ଲିଭାଯିବା ସହ ଡିଜିଟାଲ ଭିଡିଓ ରେକର୍ଡରକୁ ହଟାଇ ଦିଆଯାଇଥିବା ଅଭିଯୋଗ ହୋଇଛି। ଯୌନ ଶୋଷଣ ରିପୋର୍ଟ ଆସିବା ପରେ ସ୍ବରାଷ୍ଟ୍ର ମନ୍ତ୍ରଣାଳୟ ତାଙ୍କୁ ଚାକିରିରୁ ନିଲମ୍ବନ କରିଛି।
