ଭୋପାଳ,୧୪ ।୯: ବର୍ତ୍ତମାନ ସମୟରେ ସରକାର କହୁଛନ୍ତି କନ୍ୟା ଭ୍ରୁଣ ହତ୍ୟା କରନ୍ତୁ ନାହିଁ । ଏମାନେ ଦେଶର ଭବିଷ୍ୟତ । ଏହାପରେ ବି ଅନେକ ଲୋକ ଝିଅଟିଏ ଜନ୍ମ ହେଲେ ମନ ଖରାପ କରୁଛନ୍ତି । ଆଉ କେହି କେହି ଝିଅକୁ ଅଲୋଡା ବୋଲି ବି ଭାବୁଛନ୍ତି । କିନ୍ତୁ ଏହାର ବ୍ୟତିକ୍ରମ ଦେଖିବାକୁ ମିଳିଛି ମଧ୍ୟପ୍ରଦେଶରେ । ଏବେ ସୋସିଆଲ ମିଡିଆରେ ଏକ ଫଟୋ ଭାଇରାଲ ହେବାରେ ଲାଗିଛି । ଯେଉଁଥିରେ ଲୋକେ ମାଗଣାରେ ଗୁପଚୁପ ଖାଇବାକୁ ଭିଡ ଲଗାଇଥିବା ଦେଖାଯାଉଛି । ଘଟଣାଟି ହେଲା ମଧ୍ୟପ୍ରଦେଶ ଭୋପାଳର କୋଲାର ସ୍ଥିତ ବୀମା କୁଞ୍ଜରେ ଲମ୍ବା ଲାଇନରେ ଲୋକେ ଗୁପଚୁପ ଷ୍ଟଲ ପାଖରେ ଭିଡ ଲଗାଇଛନ୍ତି । ତେବେ ମିଳିଥିବା ସୂଚନା ଅନୁଯାୟୀ, ସେଠାକାର ଆଞ୍ଚଲ ଗୁପ୍ତା ନାମକ ଜଣେ ବ୍ୟକ୍ତିଙ୍କ ଘରକୁ କନ୍ୟା ସନ୍ତାନଟିଏ ଆସିବାରୁ ସେ ଖୁସିରେ ଲୋକଙ୍କୁ ମାଗଣାରେ ଗୁପଚପ ଖାଇବାକୁ ଦେଉଛନ୍ତି । ଏମିତିକି ସେହି ବାଟ ଦେଇ ଯାଉଥିବା ବ୍ୟକ୍ତିଙ୍କୁ ମଧ୍ୟ ଗୁପଚୁପ ଖାଇ ଦେଇ ଯିବାକୁ ସେ ଅନୁରୋଧ କରୁଛନ୍ତି । ଯାହାର ଯେତେ ଇଚ୍ଛା ପେଟଭଳି ଗୁପଚୁପ ଖାଇବାକୁ ଆଞ୍ଚଲ ଅନୁରୋଧ କରୁଛନ୍ତି । କାରଣ ତାଙ୍କର କନ୍ୟା ସନ୍ତାନଟିଏ ହୋଇଛି । ଏହା ଏବେ ଅନ୍ୟମାନଙ୍କ ପାଇଁ ଉଦାହରଣ ପାଲଟି ଯାଇଛି ।
