ମାଲକାନଗିରି,୨୨ା୧୦(ଡି.ଏନ୍.ଏ.)-ମାଲକାନଗିରି ଜିଲାରେ ଅନେକ ଆଭ୍ୟନ୍ତରୀଣ ଅଞ୍ଚଳରେ ବନ୍ୟା ସମୟରେ ନଦୀ ପାରହୋଇ ଅଞ୍ଚଳବାସୀ ଯାତାୟାତ ପାଇଁ ଅସୁବିଧାର ସମ୍ମୁଖୀନ ହୁଅନ୍ତି। ଏପରିକି ଲାଉତୁମ୍ବା, କଦଳୀ ଗଛର ଭାର, ପେଟତଳେ ହାଣ୍ଡି ଦେଇ ବିପଦସଙ୍କୁଳ ଅବସ୍ଥାରେ ଲୋକେ ନଦୀ ପାର ହୋଇଥାନ୍ତି। ନିକଟରେ ଚିତ୍ରକୋଣ୍ଡା ବ୍ଲକ ସ୍ବାଭିମାନ ଅଞ୍ଚଳ ରାଲେଗେଡ଼ା ପଞ୍ଚାୟତ ନେରୁଡୁପାଲି ନାଳ ପାରହୋଇ ଅଙ୍ଗନଓ୍ବାଡି କର୍ମୀ, ଶିକ୍ଷକମାନେ ସେମାନଙ୍କ କର୍ତ୍ତବ୍ୟ ତୁଲାଇବା ପାଇଁ ଲାଉତୁମ୍ବା ଅଣ୍ଟାରେ ବାନ୍ଧି ନାଳପାର ହୋଇ ରାଲେଗେଡା ଯାଇଥିଲେ। ସେହିପରି ସୁଆପାଲି ଗ୍ରାମର ଅଙ୍ଗନଓ୍ବାଡି କର୍ମୀ ପ୍ରମିଳା ପାଙ୍ଗୀ ଓ ନେରୁଡୁପାଲି ଗ୍ରାମର ଅଙ୍ଗନଓ୍ବାଡି କର୍ମୀ ହେମଲତା ଶିଶା ଅଣ୍ଟାରେ ଲାଉତୁମ୍ବା ବାନ୍ଧି ନିଜ ଜୀବନକୁ ବାଜି ଲଗାଇ ନେରୁଡୁପାଲି ନାଳ ପାରି ହୋଇ ଲୋକଙ୍କୁ ସେବା ଯୋଗାଇ ଦେଇଥିଲେ। ଏହି ଖବର ଗଣମାଧ୍ୟମରେ ପ୍ରକାଶ ପାଇବା ପରେ ମହିନ୍ଦ୍ରା କମ୍ପାନୀ ମାଲିକ ଆନନ୍ଦ ମହିନ୍ଦ୍ରା ଉକ୍ତ ଅଞ୍ଚଳର ଲୋକଙ୍କ ପାଇଁ ଏକ ମୋଟର ବୋଟ୍ ଯୋଗାଇଦେବାକୁ କହିଛନ୍ତି। ଫଳରେ ସରକାରୀ କର୍ମଚାରୀ ଏବଂ ସାଧାରଣ ଲୋକେ ବୋଟ୍ ଯୋଗେ ନାଳପାର ହୋଇ ଯାତାୟାତ କରିପାରିବେ। ମହିନ୍ଦ୍ରାଙ୍କ ଏପରି ନିଷ୍ପତ୍ତିକୁ ଅଞ୍ଚଳବାସୀ ସ୍ବାଗତ କରିଛନ୍ତି।
