ଜୀବଜନ୍ତୁଙ୍କ ମଧ୍ୟରେ ଲଢ଼େଇ ହେଉଥିବାର ସୋସିଆଲ ମିଡିଆରେ ଅନେକ ସମୟରେ ଦେଖିବାକୁ ମିଳିଥାଏ। ଏସବୁ ଭିଡିଓକୁ କ୍ୟାମେରାରେ କଏଦ କରିବା ଜଣେ ଫଟୋଗ୍ରାଫର ପାଇଁ ବହୁତ କଷ୍ଟକର ବ୍ୟାପାର। ବର୍ତ୍ତମାନ ସୋସିଆଲ ମିଡିଆରେ ସେହିପରି ଏକ ଭିଡିଓ ଭାଇରାଲ ହେଉଛି। ଏହି ଭିଡିଓରେ ଏକ ବିଶାଳକାୟ ଆନାକୋଣ୍ଡା କୁମ୍ଭୀରକୁ ଆକ୍ରମଣ କରୁଥିବା ଦେଖାଯାଇଛି।
ଓାଇଲ୍ଡ ଲାଇଫ୍ ଫଟୋଗ୍ରାଫର କିମ୍ ସୁଲିବନ ବ୍ରାଜିଲର କୁଇଆବା ନଦୀରେ ଆନାକୋଣ୍ଡା ଓ କୁମ୍ଭୀରଙ୍କ ଲଢ଼େଇ ସମୟର ଫଟୋକୁ କ୍ୟାମେରାରେ କଏଦ କରିବାରେ ସଫଳ ହୋଇଛନ୍ତି। ନଦୀ କୂଳରେ ଉଭୟଙ୍କ ମଧ୍ୟରେ ପାଖାପାଖି ୪୦ ମିନିଟ୍ ଧରି ସଂଘର୍ଷ ଚାଲିଥିଲା। ଫଟୋଗ୍ରାଫର ଏହା ଦେଖି ନିଜ କ୍ୟାମେରାରେ ଏହି ଦୃଶ୍ୟର ଫଟୋ ଉଠାଇଥିଲେ। ଏବେ ଏହି ଭିଡିଓ ଖୁବ୍ ଭାଇରାଲ ହେଉଛି।
କିମ କହିଛନ୍ତି, ସେ ତାଙ୍କ ଜୀବନରେ କେବେ ବି ଏମିତି ଏକ ଦୃଶ୍ୟ ଦେଖି ନ ଥିଲେ। ଏଭଳି ଦୃଶ୍ୟକୁ ସେ ପ୍ରଥମ ଥର ପାଇଁ ଦେଖିଛନ୍ତି। ନଦୀକୂଳରେ କୁମ୍ଭୀର ଓ ଆନାକୋଣ୍ଡା ଲଢ଼େଇ କରୁଥିଲେ। କୁମ୍ଭୀରକୁ ଆନାକୋଣ୍ଡା ଚାରି ପଟରୁ ଗୁଡ଼ାଇ ଧରିଥିଲା। କୁମ୍ଭୀରଟି ବଞ୍ଚିବା ପାଇଁ ସଂଘର୍ଷ ଜାରି ରଖିଥିଲା। ତେବେ ଏହି ଘଟଣାର ଶେଷ କେମିତି ହେବ ତାହା ଦେଖିବାକୁ ସେ ସେଠାରେ ଅପେକ୍ଷା କରିଥିଲେ। କିଛି ସମୟର ଏହି ଲଢ଼େଇ ପରେ କୁମ୍ଭୀରଟି ପାଣି ଭିତରକୁ ଚାଲିଯାଇଥିଲା। ତା’ ପରେ ଆନାକୋଣ୍ଡା ବି ପାଣିରୁ ବାହାରି ଜଙ୍ଗଲକୁ ଚାଲିଯାଇଥିଲା।
