ଭୁବନେଶ୍ୱର,୨୮ା୬(ବ୍ୟୁରୋ): ବହୁ ବାଦବିବାଦ ଭିତରେ ସୁପ୍ରିମ୍କୋର୍ଟଙ୍କ ଅନୁମତି ପରେ ଗତ ୨୩ ତାରିଖରେ ପୁରୀରେ ବିନା ଭକ୍ତରେ ଅନୁଷ୍ଠିତ ହୋଇଥିଲା ରଥଯାତ୍ରା। ବିଶେଷକରି ଖୁବ୍କମ୍ ସମୟ ଭିତରେ ଶୃଙ୍ଖଳାରକ୍ଷା ଓ ସୁରୁଖୁରୁରେ ରଥଯାତ୍ରା କରିବା ପୋଲିସ ପାଇଁ ବଡ଼ ଚ୍ୟାଲେଞ୍ଜ ଥିଲା। ପୋଲିସ ଡିଜି ଯୁଦ୍ଧକାଳୀନ ଭିତ୍ତିରେ ସ୍ଥିତିର ସମୀକ୍ଷା କରିଥିଲେ। କେଉଁ ଅଧିକାରୀମାନେ କେଉଁ ଦାୟିତ୍ୱରେ ରହିବେ ଓ ରଥଯାତ୍ରାରେ କେଉଁମାନେ ସାମିଲ ହେବେ ତାହାର ମଧ୍ୟ ଟିକିନିଖି ତାଲିକା ହୋଇଥିଲା। ଏହାବାଦ୍ ଅନ୍ୟମାନଙ୍କୁ ସେଠାକୁ ଯିବା ଉପରେ କଟକଣା ଲାଗୁ କରାଯାଇଥିଲା। ହେଲେ ପୋଲିସ କରିଥିବା ନିୟମକୁ ଖୋଦ୍ ପୋଲିସ ବିଭାଗର ଦୁଇ ଉଚ୍ଚ ପଦସ୍ଥ ଅଧିକାରୀ ଭାଙ୍ଗିଥିବା ଘଟଣା ଏବେ ପଦାକୁ ଆସିଛି। କମିଶନରେଟ ପୋଲିସରେ କାର୍ଯ୍ୟ କରୁଥିବା ଜଣେ ଏସିପି ଓ ଏକ ଜିଲାର ଜଣେ ଡିଏସ୍ପି ନିଜ କ୍ଷମତାର ଦୁରୁପଯୋଗ କରି ପୁରୀ ଯାଇ ରଥଯାତ୍ରାରେ ସାମିଲ ହୋଇଥିଲେ। ଏନେଇ ଅଭିଯୋଗ ଉପରସ୍ତରରେ ପହଞ୍ଚତ୍ବା ପରେ ତଦନ୍ତ ନିର୍ଦ୍ଦେଶ ଦିଆଯାଇଥିଲା। ଇତିମଧ୍ୟରେ ଡିଜିପିଙ୍କୁ ରିପୋର୍ଟ ଦିଆଯାଇଥିବାବେଳେ ବଦନାମ ଭୟରେ ଘଟଣାକୁ ଚପାଇ ଦେବାକୁ ଉଦ୍ୟମ ଚାଲିଥିବା କୁହାଯାଉଛି।
ମିଳିଥିବା ସୂଚନାନୁସାରେ, ଦୁଇ ଅଫିସର ପୃଥକ ଭାବେ ସରକାରୀ ଗାଡି ବ୍ୟବହାର କରି ପୁରୀ ଯାଇଥିଲେ। ଏସିପି ଜଣକ ପୋଲିସ ପୋଷାକରେ ଓ ଡିଏସ୍ପି ଜଣକ ସାଦାପୋଷାକରେ ଥିଲେ। ବିଭିନ୍ନ ସ୍ଥାନରେ କଡ଼ା ଯାଞ୍ଚ ହୋଇଥିଲେ ମଧ୍ୟ ପୋଲିସ ଗାଡ଼ି ଯୋଗୁ ଅଟକାଯାଇ ନ ଥିଲା। ତେବେ ଡିଏସ୍ପି ଜଣକ ସାଦା ପୋଷାକରେ ଥିବା ଦେଖି ଗୋଟିଏ ସ୍ଥାନରେ ଡ୍ୟୁଟିରେ ଥିବା ଅଧିକାରୀ ଅଟକାଇଥିଲେ। ଏହାକୁ ନେଇ ସେଠାରେ ଅପ୍ରୀତିକର ସ୍ଥିତି ସୃଷ୍ଟି ହୋଇଥିଲା। ସେମାନେ ବଡ଼ଦାଣ୍ଡରେ ପହଞ୍ଚତ୍ବା ପରେ ରଥଟଣାରେ ମଧ୍ୟ ସାମିଲ ହୋଇଥିବା ସିସିଟିଭି ଫୁଟେଜରୁ ଦେଖିବାକୁ ମିଳୁଛି। କେତେଜଣ ପୋଲିସ ଅଧିକାରୀ ଏ ସମ୍ପର୍କରେ ଏସ୍ପିଙ୍କୁ ଜଣାଇବା ପରେ ଘଟଣା ଡିଆଇଜିଙ୍କ ପାଖରେ ପହଞ୍ଚତ୍ଲା। ପୁରୀ ଏସ୍ପି ଓ ଡିଆଇଜି ସ୍ତରୀୟ ତଦନ୍ତ ରିପୋର୍ଟ ପୋଲିସ ଡିଜିଙ୍କୁ ଦିଆଯାଇଥିବା ପୋଲିସ ବିଭାଗର ଜଣେ ଉଚ୍ଚ ପଦସ୍ଥ ଅଧିକାରୀଙ୍କଠାରୁ ଜଣାପଡିଛି। ଉକ୍ତ ସୂତ୍ର ଅନୁସାରେ, ପୋଲିସର ଅଫିସରମାନେ ନିଜର ବ୍ୟକ୍ତିଗତ କାର୍ଯ୍ୟ ପାଇଁ ଏଭଳି ନିୟମକୁ ଉଲ୍ଲଂଘନ କରି ପୁରୀ ଯାଉଥିବାରୁ ଗତ ୨୪ ତାରିଖରେ ପୋଲିସ ମୁଖ୍ୟାଳୟ ପକ୍ଷରୁ ତରବରିଆ ଭାବେ ଏକ ପ୍ରେସ୍ ବିଜ୍ଞପ୍ତି ପ୍ରକାଶ ପାଇଥିଲା। କଟକଣା ସମୟରେ ବିନା କାର୍ଯ୍ୟରେ କୌଣସି ପୋଲିସ ଅଫିସର ପୁରୀ ଯାଇପାରିବେ ନାହିଁ। କାମ ଥିଲେ ପୋଲିସ ମୁଖ୍ୟାଳୟରୁ ଅନୁମତି ନେଇଯିବାକୁ ନିର୍ଦ୍ଦେଶ ରହିଛି।
ତେବେ ଏହି ଦୁଇ ଅଫିସର ପୂର୍ବରୁ ଏକାଧିକ ଘଟଣାରେ ବିବାଦକୁ ଆସିଛନ୍ତି। କମିଶନରେଟ ପୋଲିସର ସମ୍ପୃକ୍ତ ଏସିପିଙ୍କ ବିରୋଧରେ ମଧ୍ୟ ପୂର୍ବରୁ ଶୃଙ୍ଖଳା ଭଙ୍ଗ ଅଭିଯୋଗ ହୋଇଛି। ଏଥିପାଇଁ ସେ ନିଲମ୍ବିତ ହୋଇଥିବାବେଳେ ଡିଏସ୍ପିଙ୍କ ନାଁରେ ମଧ୍ୟ ବହୁ ସମୟରେ ଅଭିଯୋଗ ଆସିଛି। ସେହିଭଳି ପୂର୍ବରୁ ମଧ୍ୟ ବଡଚଣା ଥାନା ଅଧିକାରୀ ଲକ୍ଡାଉନ ନିୟମ ଭାଙ୍ଗି ଚୋରା ଗାଡିରେ ପରିବାର ସହ ପୁରୀ ବୁଲିବାକୁ ଆସି ନିଲମ୍ବିତ ହୋଇଛନ୍ତି। ଏଭଳି କେତେଜଣ ଅମାନିଆ ପୋଲିସ ଅଧିକାରୀଙ୍କ ପାଇଁ ଖାକିରେ କଳଙ୍କ ଲାଗିଛି। ତେବେ ବର୍ତ୍ତମାନର ଘଟଣା ସମ୍ପର୍କରେ ପୁରୀ ଏସ୍ପି ଉମାଶଙ୍କର ଦାଶଙ୍କ ପଚାରିବାରୁ ସେ ଏହାକୁ ଏଡାଇ ଯାଇ କ’ଣ ହୋଇଛି ମୁଁ ବୁଝୁଛି ବୋଲି କହି ଫୋନ୍ କାଟି ଦେଇଥିଲେ।
