ନୂଆଦିଲ୍ଲୀ,୮ା୪: କେନ୍ଦ୍ର ପର୍ଯ୍ୟଟନ ମନ୍ତ୍ରଣାଳୟ ଦ୍ୱାରା ପ୍ରଚାର ପ୍ରସାର କରାଯାଉଥିବା ଦେଶର ୭ ମୋକ୍ଷ କ୍ଷେତ୍ର (ସପ୍ତ ମୋକ୍ଷ ପୁରୀ) ମଧ୍ୟରେ ଓଡ଼ିଶାର ପୁରୀ ସ୍ଥାନ ପାଇଛି। ଅନ୍ୟ କ୍ଷେତ୍ରଗୁଡ଼ିକ ହେଲା ଅଯୋଧ୍ୟା, ମଥୁରା, ହରିଦ୍ୱାର, ବାରାଣସୀ, ଉଜ୍ଜୟିନୀ ଏବଂ ଦ୍ୱାରକା। ପର୍ଯ୍ୟଟନ ଓ ତୀର୍ଥଯାତ୍ରାକୁ ପ୍ରୋତ୍ସାହିତ କରିବାରେ ଏହା ସହାୟକ ହେବ। ସପ୍ତ ମୋକ୍ଷ ପୁରୀର ପ୍ରଚାର ପ୍ରସାର କେବଳ ଦେଶ ଭିତରେ ନୁହେଁ ବିଦେଶ ବଜାରରେ ମଧ୍ୟ ଇଲେକ୍ଟ୍ରୋନିକ, ଛାପା ଓ ଡିଜିଟାଲ ଗଣମାଧ୍ୟମରେ କରାଯାଉଥିବା ମନ୍ତ୍ରଣାଳୟ କହିଛି। ପର୍ଯ୍ୟଟନ ମନ୍ତ୍ରଣାଳୟ ଓ୍ବେବ୍ସାଇଟ ଏବଂ ସୋସିଆଲ ମିଡିଆ ହ୍ୟାଣ୍ଡଲ ଜରିଆରେ ବିଭିନ୍ନ ପର୍ଯ୍ୟଟନ କ୍ଷେତ୍ର ଓ ଉତ୍ପାଦଗୁଡ଼ିକର ପ୍ରଚାର ପ୍ରସାର ହେଉଛି। ଚିହ୍ନଟ ତୀର୍ଥସ୍ଥଳ ଓ ଐତିହ୍ୟ ସ୍ଥାନଗୁଡ଼ିକର ସମନ୍ବିତ ବିକାଶ ଲକ୍ଷ୍ୟରେ କେନ୍ଦ୍ର ସରକାର ପର୍ଯ୍ୟଟନ କାୟାକଳ୍ପ ଏବଂ ଆଧ୍ୟାତ୍ମିକ, ଐତିହ୍ୟ ବୃଦ୍ଧି ଅଭିଯାନ ଜାତୀୟ ମିଶନ (ପ୍ରସାଦ) ଯୋଜନାରେ ଏଥିପାଇଁ ଆର୍ଥତ୍କ ସହାୟତା ଯୋଗାଇ ଦେଉଛନ୍ତି। ସେହିପରି ସ୍ବଦେଶ ଦର୍ଶନ ଯୋଜନାରେ ରାଜ୍ୟ ସରକାରଙ୍କ ଦ୍ୱାରା ଚିହ୍ନଟ ପର୍ଯ୍ୟଟନ ଭିତ୍ତିଭୂମିର ବିକାଶ ପାଇଁ କେନ୍ଦ୍ର ଆର୍ଥତ୍କ ସହାୟତା ଯୋଗାଇଦେଉଛି। ଯୋଜନା ଗାଇଡ୍ଲାଇନ ଅନୁଯାୟୀ ପୂର୍ବ ଅନୁଦାନର ବିନିଯୋଗ ପତ୍ର ଏବଂ ଉପଯୁକ୍ତ ପ୍ରୋଜେକ୍ଟ ରିପୋର୍ଟ ଦାଖଲ କରିବା ପରେ ପାଣ୍ଠି ମଞ୍ଜୁର ହୋଇଥାଏ ବୋଲି ମନ୍ତ୍ରଣାଳୟ କହିଛି।
