ନୂଆଦିଲ୍ଲୀ,୨୩।୬: କେନ୍ଦ୍ରୀୟ ମନ୍ତ୍ରୀମଣ୍ଡଳରେ ଅଦଳବଦଳ ନେଇ ଚାଲିଥିବା ଚର୍ଚ୍ଚା ମଧ୍ୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଙ୍ଗଳବାର ରାଷ୍ଟ୍ରପତି ଭବନରେ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ଭେଟିଛନ୍ତି। ପିଏମ ମୋଦୀଙ୍କ ଏହି ସାକ୍ଷାତକାର ପରେ ରାଜନୈତିକ ମହଲରେ ହଲଚଲ ଜୋର୍ ଧରିଛି। ରାଷ୍ଟ୍ରପତି ଭବନ ପକ୍ଷରୁ ଏହି ସାକ୍ଷାତକାରର କିଛି ଫଟୋ ମଧ୍ୟ ସେୟାର କରାଯାଇଛି।
ରାଷ୍ଟ୍ରପତି ଭବନ ପକ୍ଷରୁ ସୋସିଆଲ ମିଡିଆ ପ୍ଲାଟଫର୍ମ ‘ଏକ୍ସ’ (X)ରେ ଏକ ପୋଷ୍ଟ ସେୟାର କରି ଲେଖାଯାଇଛି, ‘ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ରାଷ୍ଟ୍ରପତି ଭବନରେ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ସାକ୍ଷାତ କରିଛନ୍ତି।’ ଗୁରୁତ୍ୱପୂର୍ଣ୍ଣ କଥା ହେଉଛି, ପ୍ରଧାନମନ୍ତ୍ରୀ ଏବଂ ରାଷ୍ଟ୍ରପତିଙ୍କ ଏହି ବୈଠକ ପଦ୍ମ ପୁରସ୍କାର ପାଇଁ ଆୟୋଜିତ କାର୍ଯ୍ୟକ୍ରମର ଠିକ ପୂର୍ୱରୁ ଅନୁଷ୍ଠିତ ହୋଇଛି।
ଜାତୀୟ ରାଜଧାନୀର ରାଜନୈତିକ ସ୍ତରରେ ମନ୍ତ୍ରୀମଣ୍ଡଳ ଅଦଳବଦଳକୁ ନେଇ ଜୋରଦାର ଚର୍ଚ୍ଚା ଚାଲିଥିବାରୁ ଏହି ବୈଠକ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ବିବେଚନା କରାଯାଉଛି। ଗୋଟିଏ ଦିନ ପୂର୍ୱରୁ, କେରଳର ବରିଷ୍ଠ ବିଜେପି ନେତା ଜର୍ଜ କୁରିଅନ ରାଜ୍ୟ ସଭା କାର୍ଯ୍ୟକାଳ ଶେଷ ହେବା ପରେ କେନ୍ଦ୍ରୀୟ ମନ୍ତ୍ରୀମଣ୍ଡଳରୁ ଇସ୍ତଫା ଦେଇଛନ୍ତି। କୁରିଅନ (୬୫) ସଂଖ୍ୟାଲଘୁ ବ୍ୟାପାର ସହିତ ମତ୍ସ୍ୟପାଳନ, ପଶୁପାଳନ ଏବବଂ ଡାଏରୀ ମନ୍ତ୍ରଣାଳୟରେ ରାଷ୍ଟ୍ରମନ୍ତ୍ରୀ ଥିଲେ। ରାଷ୍ଟ୍ରପତି ଭବନରୁ ଜାରି ଏକ ପ୍ରେସ ବିଜ୍ଞପ୍ତି ଅନୁଯାୟୀ, ରାଷ୍ଟ୍ରପତି ମୁର୍ମୁ କୁରିଅନଙ୍କ ଇସ୍ତଫା ଗ୍ରହଣ କରିଛନ୍ତି।
ଜର୍ଜ କୁରିଅନ କୋଟାୟମର ବାସିନ୍ଦା ଅଟନ୍ତି। ୨୦୨୪ରେ ମୋଦୀ ସରକାର ୩.୦ରେ ତାଙ୍କୁ ମନ୍ତ୍ରୀ କରାଯାଇଥିଲା, ଯାହା କେରଳରୁ ଦଳର ଖ୍ରୀଷ୍ଟିଆନ ଆଉଟରିଚ ରଣନୀତିର ଏକ ଅଂଶ ଥିଲା। କେରଳ ବିଧାନସଭା ର୍ନିବାଚନ ୨୦୨୬ରେ କଞ୍ଜିରାପ୍ପଲ୍ଲୀ ଆସନରୁ ବିଜେପି ପ୍ରାର୍ଥୀ ଭାବେ ପ୍ରତିଦ୍ୱନ୍ଦ୍ୱିତା କରିଥିବା କୁରିଅନ ର୍ନିବାଚନରେ ପରାଜିତ ହୋଇଥିଲେ।
କୁରିଅନ କେରଳ ବିଜେପିର ଜଣେ ବରିଷ୍ଠ ନେତା ଏବଂ ଖ୍ରୀଷ୍ଟିଆନ ସମୁଦାୟର ଏକ ପ୍ରମୁଖ ଚେହେରା, ତେଣୁ ତାଙ୍କର ଇସ୍ତଫା ଦେବା ଏବେ ଚର୍ଚ୍ଚାର ବିଷୟ ପାଲଟିଛି। କେରଳ ବିଜେପିର ଉପସଭାପତି, ମୁଖପାତ୍ର, ସଂଖ୍ୟାଲଘୁ ମୋର୍ଚ୍ଚାର ଜାତୀୟ ଉପସଭାପତି ଏବଂ ଜାତୀୟ ସଂଖ୍ୟାଲଘୁ କମିଶନ (National Commission for Minorities)ର ବୋର୍ଡ ସଦସ୍ୟ ଭାବରେ ସେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛନ୍ତି।
